السلام عليكم ورحمة الله وبركاته

أولا نحمد الله ونشكره جزيل الشكر على نعمه

يا اخوان أكيد الكل لاحظ ان الشعب السعودي هابين بالمطاعم بشكل مفجع

والمصيبة هي بقايا الطعام

اللي خلاني اكتب هذا الموضوع شي لاحظته أمس في مطعم فاخر

وبكل صراحه كانت أول زياره لي أنا وصديقي لهذا المطعم المعروف بغلاءه الفاحش

المهم في ثلاثه أشخاص جو وطلبوا وطلع طلبهم ب 480 ريال
المصيبه انهم أكلوا شي لا يكاد يذكر وباقي الاكل زي ما هو عالطاولة

هذا شي خلاني التفت لباقي الطاولات وشفتها بنفس الطريقة

في هذا الموضوع حبيت نتناقش
هل من طريقة تعلم الناس كيف يآخذون حاجتهم بس ؟؟
بغض النظر عن المبلغ
المؤسف بالموضوع هو التبذير
الاكل ينرمي بالزبايل الله يكرمكم
نسمع الناس تقول وده للجميعه الخيريه واللي يقول اعطه فقراء
بس هذا مجرد كلام محد طبقه

بدال ما نبحث عن حلول لتصريف الاكل الزايد
اقترح نبحث عن طريقه نتعلم كيف نآخذ حاجتنا بدون ما يكون فيه شي زايد

يا ليت تآخذون الموضوع بجدية والبحث لايجاد حل لمشكلة الاسراف
















تذكروا قول الله عز وجل
(( وَإِذَا أَرَدْنَا أَن نُّهْلِكَ قَرْيَةً أَمَرْنَا مُتْرَفِيهَا فَفَسَقُوا فِيهَا فَحَقَّ عَلَيْهَا القَوْلُ فَدَمَّرْنَاهَا تَدْمِيراً))16 الإسراء

اللي بالصوره الاولى (( مهايطين ))

حرام بالله ما فيهم الرجال


قسم بالله لو عزمني شخص وجاب لي صحن هالكبر والله العظيم ما اقلط عليه

اطلع من المجلس كله


لانه حرررراااااااااااام . وقلة ذوق وكل شي



غير اللي يصير بالزواجات قسممممم اقوى انواع الاسراف



خلها على ربك

لاحظ رؤساء أكبر دولتين في العالم
كيف أخذو حاجتهم فقط

وعندنا في العادات والتقاليد لازم نسرف
اذا جاء ضيف رصوا الصحون وقاموا وتركوها

والمشكلة ما فيه امل تقدر تكلمهم بالموضوع اساسا
لانها عادات وتقاليد

مع انها غلط 100%

انا ابي افهم كيف تعلموا الغرب يآخذون حاجتهم

وزي ما قلت يا أخ جد ولعب
الأعراس لحالها هذي يبي لها حلقة في برنامج داوود الشريان
انا وصل عمري 26 ماني قادر اعرس والحين قاعد اراجع بشركه ان شاء الله يقبلوني
يبي لي اقل شي سنه بعد الوظيفه اقدر اجمع لي كم قرش وأتسلف وعلشان يوافق البنك يعطيك قرض لازم تكمل سنه اذا كنت موظف بشركه

اخوي يوم اعرس بعد الزواج ما يبقى له من راتبه الا 1500 ريال
الباقي يروح في ديوون
وكلها ديون عشان يعرس

فوق ان المهور غالية
الذبايح والقصور ومسلزمات العرس تقصم الظهر

والله اني اتمنى أهلي يوافقون واطلع آخذ لي مره من دولة عربية
على الاقل الزواج بيكون متيسر والمهر مقدور عليه وبعد الزواج بيكون جيبك مليان تقدر تعيش حياه حلوه

لكن ادري لو بس اكلمهم بالموضوع بيطلعوني من المله
بأصير مرتد بنظرهم ويتبرون مني



الله يعين بس موضوعنا عن الاسراف وشطحنا
انا اقترح يكون في حمله توعوية عن الاسراف
والمجتمع كله المفروض يتعاون مع هالحمله
الله انعم علينا ما نبي نكفر بالنعمه

واذا فيه برشورات عن الاسراف والتبذير
كل واحد يطبع له مجموعه بما يقارب 100 ريال
ويعتبر ال 100 ريال صدقة لوجه الله

ونوزع البرشورات عالناس أو أقل شي يحطها على طاولة استقبال الطلبات في المطعم وكل من جاء يسحب له وحده
واهم شي بالبروشور نوصل للناس معلومه
( لا تخاف تراك بتشبع )
يجي واحد جايع يطلب طلب يكفي 10 أنفار
بعدين يقوم ويتركه

سعدت بمشاركتك أخ جد ولعب
بعد أن أصابني اليأس يوم شفت الموضوع محد رد عليه

لافندر اند دايسي
يا هلا بالآنسه اللغوية
ردك حطمني

فعلا حسيت اني اشتريت شريط مسجل واهديته لأصم
كلامي كثير وابربر
لكن واقعيا ما فيه بيدي حل يغير ثقافه توارثها شعب بأكمله

أشكرك لك طلتك الجميلة اخت لافندر اند دايسي

من جد شي يحزن صراحة وفيه ناس تروح الزبايل ( الله يكرمكم) تدور شي تاكله

يتمنون اللقمة وماحد حاس مرة يتقطع قلبي لما اشوف هالمقاطع باليوتيوب بس مابيدي حيلة

وحتى الجمعيات ماحسها نفعت مرة

وفيه ناس يجي عندهم دايم فايض اكل من العزايم يدقون كثير عالجمعية ومايردون

وفي الاخير يقطونه الله لا يعاقبنا

الله يعين

ليه مايكون فيه نظام حق هالشي

مثلا اذا صار زواج مفروض تدري الجمعية اساس تجي بعدين ياخذون الاكل الفايض

ويكون فيه تنظيم لان اكيد فيه اكثر من عرس بيوم ومو شرط الاعراس المطاعم مثلا

يعطيك العافية على الموضوع الاكثر من رائع

لاحول ولاقوة إلا بالله
عادات غبية يبي من ينتزعها من مجتمعنا

الكبار ماعاد نقدر عليهم بس إن شاء الله البركة في جيلنا
واللي بعدنا الله يقدرنا ونصير قادة لكل ماهو جميل ووسطي
نبتعد عن العادات اللي تخالف الدين بكل شيء ونمشي ورا الدين
يكون الدين أولا بكل شيء مو مثل الحين العادات والتقاليد أولاً
الله يهدينا وينور بصايرنا عالحق .

وعليكم السلام ورحمة الله وبركاته

قال تعالى: (ولئن شكرتم لأزيدنكم)
فأين شكر النعمة هنا ؟!!

وقال (إن المسرفين كانوا إخوان الشياطين )
هؤلاء حتى كلمة إسراف أحس قليلة عليهم
هذا جحود للنعمة والعياذ بالله وكأنهم هم أصحاب هذه الأرزاق ويتصرفون فيها كيفما يشاؤون
اللهم عافنا مما إبتلاهم به وإجعلنا ممن يشكرونك في السراء والضراء

ولا تؤاخذنا بما فعل السفهاء منا

شكرا لك أخي على الموضوع القيم
نفع الله بك

يعطيك العافيه صاحب الموضوع ع اللفته الكريمه منك بخصوص هالموضوع

اكبر غلط انا نمشي وراء العادات الي ضد كتاب الله وسنة رسوله صلى الله عليه وسلم

الاسراف مصيبه بصراحه والله يمهل ولايهمل لمن لايشكر النعم

واكبر دليل تفشي الامراض منها السكر والضغط ولايكاد يخلو منزل منها

يارب لاتعاقبنا وارحمنا انت ارحم الراحمين


اللهم لك شكر ع ما انعمت علينا ....


مشاركة بسيطة