السلام
حبايبي ما اطول عليكم انا عندي 45000 وناوي افتح مغسله ملابس وطبعا ناوي استقدم عامل مغسله على كفالتي ( احب اكون نظامي شوي ) يعني ما اجيب عمال من برا
هذي كانت خطتي لكن بعد اطلاعي على الاراء في هذا المنتدى ومنتديات اخرى وجدت ان اغلب الشعب ما يفضلو هذي الطريقه الي هي طريقة تاجير المحل على العامل فما ادري ليه وش السبب مع اني اشوف انه اريح للراس واضمن للربح يعني مثلكم عارف لو حبيت اشغل المغسله لحسابي بينضحك علي وثاني يوم بقفل المغسله لذلك اشوف التاجير افضل خل العامل يسترزق ويجيب لك رزق ( الا هو الايجار طبعا )
فما ادري وش رايكم وخصوصا الي ضد الايجار يهمني رايه ياليت يوضح لي ليه هو ضد الايجار
تحياتي وبانتظار ردودكم

لأنه يعطيك 2000 ريال و6000 آلاف أو أكثر له

وبعد شهر بيطمع ويقولك 2000 كثير والمحل مافي شغل كويس ويخليها 1500 ريال

وبعد شهر يقولك العلاقات والأكياس زاد سعرها ويعطيك 1000 ريال

وبعد كم شهر يكون كون له ثروة طيبة ويشوف له سعودي مثلك همه يحصل على 2000 ريال وهو منسدح ويفتح محل خاص به ويشغل ولد عمه فيه

وتستمر الحكاية حتى يومنا هذا اللي صار السعودي ما يقدر يفتح مغسلة لأن في كل شارع 10 مغاسل ماسكها بنقله وهنود بأسماء سعوديين يعطونهم كم قرش يسكتونهم والباقي لهم



الحل تسلم المحل لسعودي عاطل ماعنده وظيفة وتقوله هذي مغسلة جاهزة عليك مسؤولية إدارتها ومتابعتها وجلب البضاعة من علاقات وأكياس وصابون وخلافة لها ومحاسبة العامل كل شهر بالمبلغ الفلاني وتعطيني مبلغ تحدده أنت والباقي للسعودي

تستفيد انك فتحت باب رزق لأخوك السعودي وحصلت على الـ 2000 اللي تبيها ومنعت الوافدين من السيطرة على السوق

والله ولي التوفيق

بأختصار لو ماكلت بيدك ماتشببع

ليش حنى مانوقف على حلالنا ونتعب عليه وش فيها لاجلسست في المحل وحسبت ورا الهندي وش فيها لاسويت حوافزز للهندي بحيث لاطلع اكثرر ياكثررر مبلغ متفق عليه يزيد وينقص مع دخله والتارقت الي يحققه

بصراحه اذا انت يالغالي منت حول المحل ولا راسك يعورك لاتدخل مشروع وجمد فلووسك عندك

لان ماحد بيخدمك لو ماخدمت نفسك

قصه صغيره حدثت لأخي تقريباً في عام 1414 هـ

كان يعمل في مؤسسة خاصة تتعامل في مواد البناء
معقب للدوائر الحكومية وكان يشتغل دوامين مع العلم بأن اعماله ما تتطلب دوامين لكن

هو شرط صاحب المؤسسة وكان راتبه 3500 ريال

بعد ثلاث سنوات ونصف من التعامل مع صاحب المؤسسة طلب إجازة للذهاب للحج لكن رد صاحب المؤسسة كان

بالرفض بسبب معاملات العماله يجب ان تنتهي قبل العيد وللحالات الطارئه

طالب بالزيادة في الراتب ورفض صاحب المؤسسة

طالب صاحب المؤسسة من أخي أن يداوم في المساء دوام كامل بدل المجيء لمدة ساعه

وأخذ الطلبات والذهاب والا فسوف ييخفض من الراتب

ذهب أخي لصاحب المؤسسة وقال له بالحرف الواحد " اريد منك معاملتي كما تعامل الأجانب "

فإستفسر منه صاحب المؤسسة :- كيف يعني ؟؟

كان رد أخي له :- إدفع قيمة الفيزا وكأني عامل أجنبي - إدفع لتجديد إقامه كما تفعل للأجنبي - إدفع للسكن أو أمن لي غرفه مع أي مجموعة للعمال - إدفع لي مقابل المستشفى في حال المرض - إدفع لي بدل إجازات إذا رغبت في هذا - وكل خمس سنوات أعمل معك أطالب بإجازة لمدة ثلاثه شهور متواصلة - إدفع لي عن المواصلات فأنا معقب ولست سائق - إدفع لي اوفر تايم في حال كانت هناك مسألة مستعجله

حسبها صاحب المؤسسة فقرر زيادة راتب أخي وإعطاؤه إجازة

لكن أخي طالب بمعاملة الأجنبي .


البعض يعامل ابن البلد وكأنه سلعة في يديه يتحكم فيه ويسيء النية به ........ لكن الأجنبي في البلد يُعامل وكأنه جنيه ذهب نادر .

الأجنبي إذا رأى صاحب الحلال غير مهتم الا بتوفير المبلغ المتفق عليه فسوف يصبح ملك على الأمر ويبتز صاحب الحلال .

أي عامل تلاقيه دافع مبالغ للمجيء للبلد ويخاف من شيء إسمه خروج نهائي بدون توفير على الأقل ما دفعه هناك في بلده ........أي حركه قل له فقط ....... دام المشروع ما يضبط ياله مع السلامه روح بلدك
ومهله شهر نشوف يزبط الشغل ولا لا ......... تلاقيه خلال هالشهر يشتغل صح وتلاقي الخير

الله يرزقك من فضله يارب

جب لك عامل على كفالتك وشغله بالراتب

اما اذا جبته من الشارع اكيد بيستاجر منك المحل

اشكركم جميعا على الردود و على راسي لكن في البعض مثل اخوي "بزنس مان" يقول كلام نظري وحتى هو اذا جا يطبق ما سواه يعني لو جينا للتطبيق محد حولك يعني انا اتكلم عن نفسي مثلا موظف حكومي اداوم من 7,30 الى 2,30 واطلع من الدوام يالله اوصل البيت على 3 اتغدى واصلي العصر ويدوب ارتاح ساعه وبعدها تجيك طلبات والتزامات الاهل تودي هذا المستشفى وتودي الثاني السوق وتذاكر لثالث المهم ان الواحد ما عنده وقت يتابع المشروع متابعه دقيقه يعني مثلا لو هي بقالة معقولة في فواتير ومن الكلام ذا تتابعه ساعه ساعتين وانتهينا بس زي مغسله لازم اكون مسنتر عنده اقل شي 6 او7 ساعات عشان ما ينضحك علي ويقول مافي زبائن فبالصراحه اشوف الحل المناسب للمشاريع الي ما تقدر تضبط العمل فيه بفواتير ومن الكلام ذا ان الحل انك تاجره عليه طبعا بشرط ان العامل يكون على كفالتك لا تجيب من برا لان ما دمرنا الا العماله السائبه
وطبعا الي يقول دامك ماانت فاضي لا تسوي مشاريع اقوله لو راتب الواحد فينا يغطي التزاماته ما كان احد فكر في المشاريع كلن يدور راحت الراس بس مثلكم عارف ان رواتب الحكومه ما توكل عيش الايام ذي وصعب الواحد يحصر نفسه فيه مظطر الواحد يتحرك ويشوفله دخل ضافي
تحياتي للعموم

^

أخوي أنا ماقلت تابع المشروع بنفسك

أقولك دور على سعودي عاطل أخوك ولد عمك صديقك أخو صديقك ولد عم خال صديق جارك عاطل

المهم واحد عاطل سواء تعرفه أو تطلبه من مكتب العمل

وتسلمه المشروع ويكون مدير للمشروع ومسؤول عنه ويحاسبك كل شهر يعني مثله مثل الهندي لكن الفرق أنه ما يشتغل في المغسلة للكوي لكن يتابع العامل واحتياجات المغسلة

أنا عندي محل صغير مسلمه لواحد من معارفي عاطل هو مسؤول عنه كأنه محله وكل شهر أمره وأشيك على المحل وعلى حساباته ويعطيني المتفق عليه

الفائدة بدل ما يضحك عليك البنقالي ويعطيك 2000 ويسرق الباقي خل السعودي يعطيني 2000 وياخذ الباقي