كعادة اكثر مؤسساتنا الحكومية – فشل ذريع في تسجيل طالبي وظائف الجوازات والمباحث الكترونيا – لا ادري لماذا حينما نقرر ان نتقدم بعد ان نتقادم بكثير ( نجيب العيد )؟!


الكثير من المؤسسات الحكوميه قررت ان تخوض تجربة التسجيل الالكتروني بعدما اصحبت من الماضي في دول متقدمه كثيره لنفاجأ بفشلها الذريع في هذا المجال .. ماحدث في وظائف وزارة الداخليه يؤكد اننا في كل مره نقرر ان نخوض تجربة التقدم نفشل !! سوء تخطيط – خدمه رديئة – سيرفرات مضروبة – عشوائية وصعوبة في التقديم وكلام ماله داعي عشان تصل لصفحه التقديم ..

بلاش فصحى وخلونا عامي احسن _ الحين مو حرام اللي حصل للشباب في هالموقعين ؟!! وان جيت أبحكي عن سلبيات هذا التقديم فايش احكي وايش اخلي .. يعني خلصنا من موضوع التقديم عبر المواقع الرسمية واللي يتسلفون ويسافرون لها الشباب ويمكن بعد ماينقبلون عشان نقصان سنتمتر في الطول والا كيلو جرام في الوزن ناهيك عن الواسطة وطحنا في مشاكل المواقع الالكترونيه اللي تهضم حق الشباب حالها كحال الكثير من بؤر الفساد في البلد ؟!!

مو كفاية الهم اللي يعيشه الشاب من يوم تخرجه من الثانويه حتى يومنا هذا وبعد يزيدونه قهر وغبن وتعب وسهر وفلوس تروح للمقاهي بلاش وهو ينتظر ساعات وساعات عشان يفتح معه موقع رخيص سئ الخدمه فاشل من اجل ان يسجل بياناته ؟!!

انا ماقدمت في هذي الوظائف بس والله جربت اقدم لغيري .. صدقوني عشنا الامرين .. سهر – تعب – قهر – كل انواع الاشياء السيئه عشناها ..

تخيلوا بعد عشرين الف نقرة ماوس يفتح معنا الموقع وليته يفتح على الاستماره لا نرجع نضغط على توظيف وبعد عشرين الف نقره يفتح على صفحة شروط وبعد عشرين الف نقره يفتح على التخصص والشهادة وبعدين اذا لك حظ يفتح لك على الاستماره واذا كان حظك حلو ثاني ليله من المحاوله كويس انك تستمر في كتابة الاستمارة وبعد ايام من المحاوله كويس ان طلع لك رقم الطلب !!

والله مهزله صراحه .. فشل ذريع ولاحد يبرر لي بالله والا يقول لي ضغط ماضغط لان لو فيهم خير كانوا عملوا سيرفرات قويه و اصلا هذا اكبر دليل على ارقام البطاله في البلد اللي يخبونها عن العالم !!

مادري ليه عندي احساس ان العالم تتقدم واحنا نرجع ورا والتعقيدات كل مالها تزيد وربك حسبنا وحسب هالمساكين ونعم الوكيل ولانقول الا مايرضي الرب انا لله وانا اليه راجعون واحسن الله عزاكم وعظم الله اجركم في الوظائف ..

هذي الصوره لن ينساها الملايين

شر البليه مايضحك

أتوقع ان السبب ان الوظايف محجووزه من قبل لا تعلن وحركه التسجيل الكترونيا الالتسكيت العاطلين عشان مايكون لهم حجه

الله يعين ويصبرررنا عليهم

هذا يعتبر شيء عادي جداً نظرا لان اغلب المعاملات الحكومية من احدى سماتها البطء الشديد
واحب ان اضيف انه ليس موقع الجوازات وحدة ايضاً التقديم الذي حصل في وظائف جامعة الملك سعود ونظام الانتساب في جامعة الملك عبد العزيز يشترط على المتقدم سرعة ارسال الاوراق قبل صدور الموافقه على طلبه في الانتساب يعني لو فرضنا جدلاُ انه لم يتم قبول الطلب من المسؤول عن قيمة ارسال الاوراق 50 ريال عن طريق الدي اتش ال
تحياتي البعد الخامس وإن شاء الله نشوفك مدرس اد الدنيا

والله انها غبنة دوله بكبرها وعرضها السيرفس بطىء اليا متى على الحاله هذي
التقديم على وشك الانتهاااء وماصار شي اللي قدموواا ينعدون على الاصاابع
سهرااااان صار لي يومين عشان التقديم هذي دوووولة على وش على جندي كذا الامور معقده ليه ليه ليه خلونا نعيش وراضين بالجندي بواب

يعطيك العافيه على هالمقال أستاذنا

الله يقلعهم على بالهم البنقاليه ذولا متطورين قالو ايش قالو التقديم عن طريق الشبكة العنكبوتيه ولكي نخفف من الأزدحام ونيسر للمتقدم....


والله لو يخلونا نصف طوابير في حر الشمس انه افضل من النت
على الأقل تضمن لك شي بس هنا ماغير استفزاز


وماطفشني اكثر غير مزود الخدمة مشغول

ملييييييت منها

وعلى فكره اليوم ينتهي تقديم الجوازات


شكراً البعد الخامس

شباب الله يبارك فيكم امطروا ايميلهم بالرسائل عشان يمددوا التقديم لا اوصيكم على هالرابط http://www.academy.gdp.gov.sa/user/contactus.aspx

اولا ابشكرك من كل اعماق قلبي على صراحتك ووضوحك النبيل ولكن صدقني الى الان اصبحت كالمجهول يتخبط ولاادري مالحاصل بالفعل عموما تقبل احترامي وتقديري ودعواتي للجمبع بالتوفيق......

اشكرك عزيزي البعد الخامس - مبروك عليك عضو الشرف -
والله ثم والله اني منقهر اللين ما ولعت H
ياناس يا عالم في موقع حكومي فاتح تسجيل يكون كذا ؟؟؟؟!!!!!!!
الا هذه الدرجه ما فيه مساحات فاضيه بالنت او ان العشرين مليون كانو يسجلون بنفس الوقت
وهاذا الرابط كتبت فيه بعض الكلام لعلى وعسى فيه احد يشوفه من المسؤلين
https://www.btalah.com/t46754.html