مرحبا صبايا
أمس كانت مقابلتي "إعلام"
وصلت الوزارة الساعة 1:45 م <<بدري شووي
طبعا سجلنا أسماءنا بالترتيب ووزعوا علينا إستبانتين
الأولى فيها :
- الإسم وتاريخ الميلاد و الحالة الإجتماعية ورقم السجل المدني
- هل سافرتي للخارج؟ اذا نعم اذكري آخر ثلاث دول زرتيها
- اذكري نقاط القوة والضعف لديك
- ماإنجازاتك في الخمس سنوات الماضية
- مالسبب الذي يجعلنا نقبلك لهذة الوظيفة؟
الثانية فيها:
- أسئلة سلوكية على سبيل المثال (هل تقرأي في مختلف المعارف والفنون؟) وتضعي اشارة صح عند إحدى الخانات (منطقي جدا- منطقي بشكل ضعيف – متوسط- غير منطقي )
- أسئلة مقالية2 / عرفي العنصرية وهل سبق أن تعرضتي لها أو شاهدتي من يتعرض لها وإيش كان شعورك... هل سبق لك المساهمة إجتماعيا في المجالات التطوعية..
مع ملاحظة إن الإستبيان الأول خاص للدكتورات يعني يطلعو عليه قبل ماتدخلي عليهم او خلال مقابلتهم لك، والثاني يخضع للتصحيح"حسب كلام وحده من الموظفات"..
بعد كذا دخلت المقابلة سلمت وجلست – كانوا أربع دكتورات - وبدأت المقابلة بالسؤال الذي لامناص منه أبداً:
حدثينا عن نفسك؟
طبعا اتكلمت عن نفسي وبما إني مالي أي خبرة مهنية بدأت أتكلم عن أيام الدراسة والنشاط المكثف فيها من عمل الحملات واقامة وتنظيم المعارض والندوات والمؤتمرات ..الخ وان هذه الأنشطة حببتني في العمل الجماعي وعلمتني الإنضباط والمسؤولية الخ...
طبعاً هنا سألتني الدكتورة ايش أول شي تسويه لما تكونوا المجموعة ..قلت نختار الموضوع قالت لا الموضوع ممكن يكون محدد!! قلت كان لنا مطلق الحرية في اختيار الموضوع.. قالت لا شي حث عليه ديننا الإسلامي !!"هنا بديت أضيع" قلت الشورى بيننا قالت لا – طبعا طول هالوقت وأنا اعصر بمخي – بعدين بدأت البقية يسألوا..
سألت الدكتوره إذا أختلف اثنين بالفريق في اختيار الموضوع كيف تختارو بينهم؟ جاوبت: يكون الموضوع بالتصويت ..
وسألت الثانية: طيب معروف أن العمل الجماعي يسبب مشكلات وان وحده بالفريق تريح وماتسوي شي كيف قدرتوا تتصرفو في مثل هالوضع؟ جاوبت :صحيح هالشي موجود لكن أشرنا على الدكاترة أن يكون في تقرير يقدم بخصوص مايقوم فيه كل شخص بالفريق ..وبكذا أنضبط الجميع ..
وسألتني وحدة: قالت كم عدد المجموعات عادة، قلت 5 قالت ليش 5 ،قلت بالعادة 5،3 يعني يكون العدد فردي ..قالت وليش السبب تحديدا قلت عشان يكون فيه قائد للفريق ..هنا الكل بصوت واحد ايواااااا هذا هو جواب الدكتوره اللي سألتك وماعرفتي ،طبعا الدكتورة ذاتها قالت حديث النبي علية الصلاة والسلام بما معناه : (أن القوم يؤمرون أحدهم إذا سافروا) قلت اهاا..
بعدين تنوعت الأسئلة منها : تخرجتي لك ثلاث سنين أيش سويتي وكيف نميتي نفسك ، قلت لهم اني التحقت بدورات بعدين قاطعتني وحده وقالت عندي سيرتك مو مذكور أي دورات! قلت : هي دورات متخصصة مدتها بالأيام ،قالت ليه ماسجلتيها: قلت لما حاولت اسجلها مارضي يسجل الا دورات الشهور مثل دورات الحاسب واللغه قالت اهاا..بعدين كملت الإجابة وقلت اني قدمت بالعمل على الجامعة وجمعية الأخيرة قدمت عليها تقديمين الأول وظيفة والثاني تطوع ..قالوا ايش صار ع التطوع ؟ قلت اتصلوا مرة وطلبوا مني اجي واعتذرت لهم لاني مسافرة..قالوا وبعدين رحت لهم ؟..قلت لا لان هم قالوا راح نتصل عليك مرة ثانية..
سألتني قد تأخرتي عن محاضرة؟؟.. انا قلت لا قالوا ابداً قلت اتأخر بحدود الخمس للعشر دقايق وتدخلني الدكتورة.. قالوا ماقد تاخرتي أكثر؟؟!!..قلت ايوه لان صار لي حادث، قالوا لا خليك من الحوادث ماقد تأخرت بدون سبب ، قلت لا ما أذكر ..
سألت عن موقف محرج حصل لي <<اتحفظ ع الرد
بعدين سألوني سؤال : في كليتك لو كلية اللغة العربية استضافت الدكتورة حياة سندي واعترضت عليهم كلية الشريعة بنظرك ايش سبب الإعتراض؟؟
طبعا انا سكت فقط ثانية عشان أجمع نفسي..سألتني سريع قبل لا أجاوب تعرفي الدكتورة حياة سندي؟؟ قلت ايه الدكتورة حياة سندي معروفة هي عالمة وقالت وايش كمان حاليا قلت عضوة بمجلس الشورى وقالت ايش السبب اللي يخلي كلية الشريعة تعترض عليها قلت لانها عضوة بالمجلس بالإضافة إلى انها كاشفة لوجهها..
قاطعتني دكتورة وقالت انتي لو سافرتي للخارج راح تكشفي والا تغطي؟ قلت أكشف قالت ليش : قلت أكشف وجهي بس راح أكون متحجبه قالت ايوا هذا قصدي وقاطعت الثالثة قالت انتي تلبسي برقع ؟ قلت لا ألبس نقاب ..قالت ايش الفرق بين البرقع والنقاب كلهم واحد!..قلت البرقع فيها كذا – حطيت أصبعي أعلى أنفي - <<كتلة من العباطة
ههههههههه
طبعا هنا ضحكنا ..ورجعت لإجابة ع السؤال قلت أن كشف الوجه او تغطيته قضية خلافيه مايجوز ان تنكر المغطيه على الكاشفة والعكس صحيح..قالت ها خلاص وشكروني وقالوا لي عندك سؤال؟
قلت : فين راح يكون مقر العمل بجدة والا الرياض؟
جاوبتني وحدة وقالت: راح يكون مقرك العالم مالك مكان محدد يا ....، قلت مبدئيا عشان اكون على بينه مع أهلي ..قالت الله اعلم بجدة او بالرياض وفيه بعد كذا تدريب بالمعهد الدبلوماسي اللي يكون بالرياض هو بالغالب ان العمل يكون بالرياض ..هنا انتهى كل شي ^______^
خارج المقابلة:
من أسئلة المقابلة اللي جات للبنات :
سألوا وحدة لو اذا اتزوجت وخيرها زوجها بين الوظيفة وبينه كيف تتصرف ؟!!
كمان سؤال لوحدة مذيعة قالت لها مدامك مذيعة تسوي معانا لقاء تلفزيوني؟
كمان سألوا وحدة انتي تدخني؟؟ طبعا طلعت فعلا تدخن >>نقطة لاتحاولوا تكذبوا ع اللجنة لان وحدة منهم بتحلل شخصيتك من ردودك وحركاتك
سألوا وحدة كمان أيش آخر الاخبار؟ فردت بسؤال : في أي مجال؟ قالوا السياسي عندنا بالخارجية؟؟ .. طبعا الاجابة كانت اتفاقية اليابان اللي حصلت الثلاثاء .
وسألوا وحدة ايش الفرق بين الإشراق والإستشراق؟؟
وسألوا وحده ايش وجه الشبه بين الفلفل والليمون ؟؟
بالأخير يابنات أنتم بيدكم تحددوا مسار المقابلة لاتتفلسفوا كثير وخلوكم بمنطقة آمنة ..
طبعا العدد كان 15 حضر 13 وغابت 2
واليوم خلصت المقابلات بدري على الساعة 6:30 م
بالتوفيق للجميع ..
01-05-2013, 02:28 AM
العرض العادي
