السلام عليكم ورحمة الله وبركاته
انا عضوة جديدة ومتأملة فيكم خير يا أخواتي في الله
انا ادارية جديدة وماكان اختياري اداري ابدا لكن بما اني غير تربوية تم ترشيحي للاداري
مشكلتي تقديري ممتاز وطموحي اكون معلمة حاولت ادرس الدبلوم لكن الله ماكتب لي ترمين على التوالي اسجل وانسحب تنتابني ضيقة بصدري فاالحمد لله على كل حال والحين مهمومة يعني خلاص اظل ادارية لاخر العمر ماحبيت ها الوظيفه طموحي اعلى
ابي اعرف وجهات نظركم في موضوعي والشي الثاني هل فيه ادارية جديدة والحين تدرس دبلوم او ان كل وحدة توظفت اكتفت بوظيفتها ونست الوظيفه التعليمية

وعليكم السلام ورحمة الله وبركاته

يمكن كلامك صحيح بس الحمدلله انك توظفتي وانتي غير تربويه لان الغير تربويات مظلومات وانتي الحين حطيتي فينا امل انه نتوظف وبالنسبه للوظيفه الاداريه انا اشوف انها حلووه وغير بطاله وهذا شي مكتوب لك من رب العالمين كل واحد ورزقه وهذا رزقك
صدقيني بتحبين الوظيفه وبترتاحين فيها بس خلي نفسيتك مرتاحه

دعواتك لاخواتك الغيرتربويات وانا وحده منهم ان ربي يرزقنا الوظيفه العاجله


عندي سؤال اتمنى تجاوبينه كم لك متخرجه وايش تخصصك وهل تم ترشيحك بما انك غير تربويه على نقاطك لانه يقولون الغير تربويات مايحسبون نقاطهم


اتمنى لك التوفيق في حياتك

لاتنسينا من دعواتك

الله يجزاك خير يا ام عبودي والله يرزقك الوظيفة عاجلا غير آجل وخليك متفائله وربك اكرم الاكرمين
انا متخرجه عام 1423يعني من عشر سنوات وتخصصي تاريخ وتقديري ممتاز وتم ترشيحي حسب نقاطي وكانت عالية90
يارب احب ذا الوظيفه للحين نفسيتي تعبانه يمكن لو كنت جالسه على مكتب وسجلات ارحم لكن مراقبة وضغط 7فصول المشكله المديرة حملتني فوق طاقتي كل وقتي ورى الطالبات هذي مهمة معلماتهم
واخيرا الله يرزق جميع الخريجات الغير تر بويات بالوظايف اللي يتمنونها عاجلا غير آجل يارب

أختي الله يوفقك في وظيفتك الجديدة بما أن نفسك تكونين معلمة عادي تقدرين تاخذين دبلوم تربوي أي وقت أعرف معلمات غير تربويات طلبوا تفرغ ودرسوا تربوي لكن ما أدري وشلون تحولين و ظيفتك هذي ماأعرف فيها

لي تعليق أختي على كلامك قلتي طموحي أعلى ترى المعملة و الأدارية الجامعية نفس الشي مافيه أحد أعلى من أحد كلهم جامعيات على نفس المرتبة بس الزيادة اللي تاخذها المعلمة بدلات و ليس لأنها أعلى شهادة أو غيرة بدليل أن فيه تربويات أداريات يعني هم نفسهم لكن الناس ينظرون الى الراتب اذا شافوه أكثر يتوقعون أن الوظيفة أعلى أهم شي الدرجة العلمية لكن الى الآن فيه ناس يشوفون أن الأدارية أقل من المعلمة بغض النظر عن الدرجة العلمية و هذا خطاء يمكن هذا اللي ساعد على أحباطك و عدم تقبلك الوظيفة

عموما الله يوفقك و يكتبلك اللي فيه الخير و أنتي أسألي عن كيفية تفرغك لدراسة الدبلوم ...موفقة