بسم الله الرحمن الرحيم


باختصار


ياكثر ما نقرى عن طرح استفسارات عن مشاريع وافكار تجارية

ولاكن للاسف 90% من هذه المشاريع ما نفذت ولم تطبق


هنا سوف اناقش الاسباب التي حالت دون تنفيذ هذه المشاريع


وسوف اضع بعض المقترحات لبعض المشاريع الناجحة وبعض سبل المساعدة


اول شي الاسباب


1- الخوف من خوض التجربة .
طيب سوال ليش الخوف
الجواب من الخسارة
كل من دخل عالم التجارة خاف من الخسارة ولاكن بالرغم من هذا الخوف الى انه خاض التجربة
يمكن خسر لاكن كسب تجربة وخبرة ومعرفة وهذي داعم له في مشاريع اخرى
ويمكن كسب وحقق النجاح وصارت داعم له للتقدم والتوسع وخوض مغامرات جديدة دون ان يكون للخوف وجود في حياتة

يعني باختصار بتخاف لاتتعب نفسك بالتفكير والسهر طول ليلك وانت تخطط

شل الخوف حياتك غامر وربك الرازق ولا تضيع حياتك باوهام وامال يامال العافية

2- كثرة الاستشارة
خططت لمشروعك وجاهزت الفكرة وكل شي تمام ما باقي الى البداية
بس انك قمت تسال الطالع والنازل من عرفت ومن لم تعرف تسال التاجر والمدرس والعسكري
ويمكن حتى سواقكم سالتة
وكل واحد له راي ووجهة نظر وهذا خلاك في حالة من التشتت الذهني والتردد حتى وصلت لمرحلة
صرت عاجز عندها من القيام باي خطوه وبدل ما تتقدم وتواصل طريقك صرت في عالم من الحيرة
والاصوات الى تحاصرك من كل جانب صوت يقول لاتتهور وصت يقول توكل على الله وصوت يقول والله مدري بس انتبه تضيع فلوسك ووووووو

والغلط منك
لانك ماعرفت تسال من لو سالت واحد او اثنين او ثلاثة لهم دراية ومعرفة وعلم بموضوعك حصلت على الراي السديد والتوجيهات المفيدة لك وكسبت بعض من الخبرات من خلال تجاربهم

خلاصة الموضوع استشير من تضن انه على علم ودراية بمحور الاستشارة

3- الرهبة من المواجهه
تبي تقدم على غرفة تجارية مكتب عمل جوازات وزارة داخلية اي دائرة حكومية
يدخل الواحد على ها الدائرة وكانه داخل عالم من الرعب والاشباح وتلقاه مستحي ولا كانه مضيع شي مرتبك وووو
اخوي انت داخل دائرة خدمية تقدم لك الخدمات اما حسب النظام او بفلوسك ادخل وقلبك قدك خش بعين اي موظف اسئل استفسر قدم معاملاتك وطالب باي حق لك فرضة النظام ولو اي موظف قصر معك على اولك على المدير او قدم شكوى واخذ رقمها وتابع الشكوى اللين تاخذ حقك
اهم شي تكون جسور ومقدام ( بس اهم شي تعرف النظام )
ايضا نفس الكلام في السوق والشركات والمناقصات والمزادات

4- الكسل
هذا عاد انت شف نفسك وشف غيرك وقارن يا تطرد الكسل وتهب يا محلك راوح

5- الصبر
ياحبنا للعجلة
فتحت محل ومن اول يوم ابي الدراهم تنكت علي كت
طيب مر عليك شهر ماكان دخلك ذاك الزود الشهر الثاني تلقى لوحة مغطية الواجهه المحل للتقبيل لعدم التفرغ يومين ثلاثة تلقى المحل ماسكه هندي ولايمنى ومشغلى على ارقى مستوى طيب ليه جايكم بالاجابة

6- عدم القدرة على اكتشاف المشكلات وحلها
وهذا سبب عدم الصبر
فتحت المحل جبت البضاعة بس مافيه اقبال طيب ليه
سالت نفسك ها السوال اكيد نعم طيب بحثت عن المشكلات اكيد لا
شف موقع المحل
شف البضاعة عليها طلب بالسوق ولا لا
شف لك طريقة للاعلان والاشهار
سو عرض بسيط للزبائن كبداية
سوعلاقات مع المجتمع اللي انت فيه
سو شي ملفت للنظر للي يمر حول محلك
حط شي يبعث الغرابة والتعجب والتساؤل عن نشاطك ومحلك
شف اسلوب العمال وتعاملهم مع الزبائن
وفر للزبون جو من الراحة والخصوصية داخل المحل
نوع في الالوان والموديلات والانواع
استقطب الزبائن المروجين لمحلك

اهم شي شف العجز وين وعالجة ولا تنتظر حتى تجيك النهاية المتوقعة وهي الفشل

7- من اهم الاسباب ( السيولة - الفلوس - المادة )
طيب ليش انت تبلش نفسك في اللي اكبر منك
فيه مثل يقول مدرجولك على قد لحافك
واحد راس مالة 15000 يبي يسوي شركة طيب كيف يا الحبيب اذا المبلغ ما يجيب قيمة اجار موقع
ادري انك طموح وانسان ذكي وتفكر بس اخوي خل الطموح والتفكير يعني عقلاني
واي واحد يحط الماده او الفلوس عائق قدامة ما راح يتقدم ولو حصل انه يوم حصل على المبلغ صدقوني ما ارح يسوي المشروع اللي كان يفكر فيه لانه راح يفكر بمشروع اكبر من المبلغ اللي معه
وعلى هذا الحال

بالعربي خطط لمشروع على قد قدرتك المالية ولا تبالغ في طموحك وتفكيرك
ادري الكثير منكم بيعاضني بها الكلام وبيقول لولا الطموح والطموح ووووو بس انا اتكلم بعقلانية
ومنطق وادري انه لولا الامل مات الفقير

واللي يتعذر بالسيولة والمادة ما راح يتقدم ابد الى ان كان السماء تمطر عليه فلوس


وهي بعض المشاريع اللي تثبت كلامي هذا للجنسين الشباب والبنات


* راس مال 1000 ريال وش يسوي

للشباب
بسيارتك الخاصة تصحى الفجر تلحق حراج الخضار بسوق الخضار وتشتري لك بضاعة منوعه من الخضار 1000 ريال تجيب لك على الاقل 70كرتون خضار مشكلة

تروح يم اقرب حي عليه كثافة سكانية كبيرة شف لك محل على شارع رئيسي وقت خروج الناس من الدوامات وسفط وبيع بالكيلو

اذا علمت ان الكرتون فيه 4 كيلو وسعرالكيلو عندك 5 ريال يعني الكرتون يصفي لك من 8 - 10 ريال ربح واخر النهار بعت كامل الكمية او باقي الربع صدقني اقل ربح لك 200 ريال هذا اقل القليل ما بالك ان الربح الحقيقي مو اقل من 500 ريال واللي مو مصدقني يشوف اليمنة اللي منتشرين بشوارع جدة وسط الشموس والقايلة تعال عند اي واحد منهم وقلة انا اعطيك راتب 3000 ريال الشهر وتشتغل عندي شف وش يقول لك


للبنات
1000 ريال تصفي لك من 400 ا لى600 ريال صافي بس مو باليوم على حسب نشاطك

ملا بس اكسسوارات ادوات تجميل شناط ابواك
كلها باسعار رخيصة جدا يمكن اقل من السوق بـ60%
تشترين بالجملة وتسوقين بالتفرقة

وهذي بعض الاسعار انا بنفسي اطلعت عليها والكلام هذا من واقع تجربة
بلايز صوف كم طويل سعر الدرزن 300 ريال يعني سعر القطعة تقريبا 25 ريال وسعرها بالسوق مو اقل من 60 الى 80 ريال
تنانير او تايورات راقية سعر الدرزن 600 ريال يعني سعر القطعة 50 ريال سعرها بالسوق مفرق من 120- 180 ريال
جلابيات سهرات اقل جلابية سهرة بالسوق اليوم سعرها لا يقل عن 400 ريال
سعر الجملة لايزيد عن 200 ريال والوان ومديلات واشكال
نجي للشناط والابواك
البوك سعره بالسوق من 10 - 35 ريال
سعر البوك جملة من 7 الى 12 ريال



طيب راس المال 20.000 ريال

للشباب

محل خضار - محل دواجن مبردة - مخبز - تجارة الغنم
اختر من اللي فوق واقل دخل لاي محل 3000 ريال شهري
الى محل الخضار اذا كان بجانب سوبرماركت ومخبز فدخلة اليومي لايقل عن 800 ريال صافي

البنات
اقرب مركز تسوق نسائي واستاجري فيه محل اوزاوية واشتر ي من الجملة وبيعي مفرق وشوفي الدخل كيف



ايضا عندنا بها المنتدى الكثير من الاعضاء اللي لديهم الخبرة في مجال معين مثلا تسويق تصميم برمج
لو اجتمع عدد من الاعضاء وقامو بتبني فكرة موقع تجاري
وتكاتفت الجهود لاعمل هذا الموقع كلا فيما يخصة
واعتمدنا على باقي الاعضاء في جلب العروض والتسويق لهم انا اعتقد ان نسبة النجاح لا تقل عن 80%
ومثل هذي الخطوة يمكن تكلف على شخص لحالة لاكن اذا مجموعة اعتقد ان المشروع يكون اسهل بكثير

وانا اول المساهمين لو حصل ان هناك اشخاص بيتبنون الفكرة



وكل مازاد راس المال زادت تكلفة المشروع وزاد الدخل


الهدف انك تشوف راس المال وتشوف المشروع اللي يناسب على قد المبلغ اللي تملكة

وتوكل على الله


الخسارة واردة والربح وارد

بس تبي تقلص احتمال الخسارة

ابحث عن المشكلة وحلها بس اهم شي لاااااااااااااااااااااااااااااااا تنسحب


اكثر شي تعتمد عليه في نجاح تجارتك التوفيق من الله وطرق التسويق والعلاقات



ركز و على العلاقات والخطط التسويقية هذي كل التجارة




توكلو على الله


ولا يكون لسان حالنا يقول


راحت حياتي وانا اسوي واباسوي ***** ولا فيه شيَ من اللي قلت سويتى


الموضوع مطروح للنقاش بكل صدر رحب

بدون تحيز او مجاملة

قل كل اللي بخاطرك

مع احتامنا لكل الاراء فكل انسان حر بتفكيرة وطرحة

وياليت كل عضو يورد ردة او مشاركتة يوضح لنا بكلمتين في ايش هو مبدع
وماهي خبراتة وقدراتة



ولكم تحيات اخوكم ( اناالسعودي )

ملم بتجارة الخضار والفواكة وصاحب محل خضار وفواكة ومزرعة

ملم بتجارة الجملة

ومسوق عقاري ومسوق معدات



ودعواتنا للجميع بالتوفيق

سلمت يمينك يااخوي
كلام عين العقل وصحيح واتفق معك
تدري انا الحمدلله من اول متوسط وانا امارس التجاره كهوايه والان الحمدلله اصبحت مهنه لي واعتبرها افضل من انتظار الوظيفه الحكوميه او في القطاع الخاص تدري اكثر شيء مهم في التاجر او التاجره لازم يكون عنده المجازفه وخوض التجربه ولايخاف من الفشل لانه اذا تبي تنجح وتصير غني وعند مال لابد انك تمر بمراحل يأس وفشل وخساره ولكن هذي ماتثنيك عن الاستمرار والصمود
واكبر شاهد تجار اليوم واصحاب الشركات والملايين
بدأو صغار وبأعمال جدا بسيطه ولم تقف حاجز في تحقيق طموحهم وان يصبحوا رجال أعمال

أعرف قريب لي شخصيا وهو الآن من أصحاب المليارات وصاحب شركات عديده ومصانع
يقول لي شخصيا كنت وانا صغير بالابتدائي ابيع مع اخوي في الحاره برشومي وصابون تايد وعصير في اكياس

والان ماشااء الله يشار له بالبنان....

يكفي ياشباب ويابنات انه نجلس ننتظر وظيفه او فلوس من السماء او ربح وانت جالس ماتشتغل
احنا عندنا طاقات وامكانيات وفينا ابداع وقدره ...
كل واحد يجرب ريحاول اكثر من مره ولاييأس واكيد بتنجح ..

عيـن العقل فعلاً كلام ، يثلج الصدر


الله يسعدك ياخوي ،، متابعين لك ،،

الكسل والتردد هما القاتل الحقيقي لطموح الشباب

بغين اجنن اليوم واحد يعملني باجارات الاكشاك في بعض المجمعات التجارية عندنا في الشرقية
هل تصدقون انها تصل الى 300 الف والي ما مستأجيرنها اجانب
الله يرزقهم ما سرقوا بس اقصد ان لو ما كان فيها خير ما استأجرها هذا الاجنبي بهذا السعر

طموحة

مشعل

ابو الافكار


صراحة اعجبني تعقيب الجميع


واتمنى تفاعل اكبر من باقي الاعضاء


لنخرج بنتيجة ان شاء الله

اختي طموحة ياليت لو تسردين لنا تجربتك

وخاصة البداية وكيف استطعتي تجاوز العقبات اللي واجهتك

ولك الشكر ولكل من شارك معنا

كلآم من ذهب ,,,

يعطيك ألف عآفية

فعلاً نقآط مهمة جداً يآليت الجميع ينتبه لهآ

هلابك اخوي
مخاوي


الاجمل مرورك



والله لا يهينك

هلا اخوي متاخر


طرح اكثر من رائع


واختبار صعب بس امتحان للتحمل والصبر


وكلامك عين العقل


ولاكن ربما السبب في عدم مقدرتنا على المشكلات هو الاتكال الذي تعودنا عليه منذ الصغر

يمه ابي ما
الام تصيح باختة او باخوه رح جب لاخوك ماء

خرب عندنا بالبيت شي على اولك جيب الكهرباء السباك

عطل بالسيارة
اقرب ميكانيكي

ولا مرة حاول هذا الشخص الاتكالي ليه وش المشكلة يمكن فيه حل

او حاول يزين شي بيده حتى لوخرب مو مشكلة اهم شي انه جرب او حاول


الف شكر لك اخوي مرورك ولك التحية

ههههه وهذا الي صار معي
انا عاطل حاولت اني اعمل محل بس الحجه ما عندي فلوس بعد فتره جات منحة ارض وبعتها 20 الف وقررت ان افتح محل كمبيوتر وكنت محتار استشرت اهلي وناس الي اعرفهم بس ما فيه الا التحطيم النفسي وراحت الفوس ما بقى منها غير 3 الاف واصرف على نفسي منها والاسباب الي انت ذكرتها والحمدالله

وشكرا علي الموضوع