السلام عليكم ورحمة الله وبركاته
اخواني اخواتي مثل ماهو مكتوب بالعنوان مادري وش سبب تمسك وتعلق الشباب بالوظيفه الحكوميه يعني الواحد تلقى عليه ديون الدنيا وهو متمسك بالوظيفه الحكوميه ومقنع نفسه انه امان ومادري وشو مع اني انا من وجهة نظري الشخصيه اشوف ان الوظيفه الحكوميه مقبره للواحد ودائما تلقى موظفين الحكومه مديونين و حاصرين انفسهم في ذا الوظيفه وحتى لو جته عروض احسن برضو يجلس على ماهو عليه وحتى لو هو مو مرتاح وجاه القولون وانواع الامراض من هذي الوظيفه برضو يجلس فيه عشرين ثلاثين سنه طيب ليه يعني الواحد يشوف له شي غير وظيفة الحكومه يعني ممكن يعمل في القطاع الخاص فتره وهذا القطاع مثل ما انتم خابرين فيه تطوير وفيه رواتب وفيه ميزات والي يقول مافي امان اقوله الا فيه امان يعني اذا اشتغلت في شركة وبعد فتره استغنو عنك بيكون عندك خبره وبتطلبك شركه احسن منه وهكذا كلما استغنت عنك شركة فستطلبك شركه افضل بحكم انك اكتسبت خبره اكثر
والواحد سواء اشتغل في حكومه او قطاع خاص فتكون هذه محطة عبور وبعدها يستقل و يشتغل ويطور نفسه لحسابه يكون افضل برضو يعني لو الواحد يبدا يشتغل في التجاره وهو على راس العمل وبعدها اذا بدء يوقف يستقيل ولا يقول اذا خسرت لانه عادي اذا خسر يرجع يدور وظيفه حكومي لان بعد الاستقاله يكون عليك حظر من الوظائف لمدة ستة اشهر فقط بعدها عادي تقدر تقدم بل بالعكس يكون لك اولويه في الوظائف لان عندك خبرها سابقه*
يعني انا بصراحه اشوف ان الواحد لا يحصر نفسه في وظيفة الحكومه وفي ناس كثيره طلعو من الحكومه واشتغلو لحسابهم الخاص وما شافو الخير الا يوم سوو كذا يعني ناس كان دخلهم في الحكومه على 6000 و 7000 والان يعملون لحسابهم ودخل الواحد يتجاوز 20000 وبرضو الواحد لما يعمل لحسابه يروح الدوام وهو له نفس ويكون مستعد لو يداوم 15 ساعه بس في الحكومه نداوم 7 ساعات ووالله كانه 20 ساعه يعني
الزبده ان الواحد اذا توظف في حكومه او خاص فتكون هذه الوظيفه محطة عبور يامن نفسه اربع خمس سنوات بالكثير وبعدها يطلع واذا طلع وما مشت امورها مثل ما قلت يقدر يرجع بس اهم شيئ الواحد ما يجلس في وظيفه وهو مو مرتاح فيه و الراتب ما يوفيه متطلباته
وترى ياخوان ماهي صعبه والفرص والخير في البلد واااااااااجد
طبعا يا حبايب هذي وجهة نظري الشخصيه ولكم الحق في الاتفاق او الاختلاف بكل صدر رحب

أول شي شعبنآ يحبون الوظيفة الحكومية لأنها "راحة" على حسب قولهم

تلقى الموظف في القطآع الخآص يتعب ويشتغل وهم قآلبينها مقهى جلسات وسوالف

ثآني شي بالنسبة للمتزوج عنده بيت وعيآل مآ يقدر يخآطر ويترك وظيفته عشآن يجرب

لأن أي خطآ رآح يترتب عليه أضرآر كثيرة على عآئلته قبل مآ تكون عليه هو

وأعتقد هذآ الشي اللي خلّى الأجآنب يسيطرون على السوق

المخاطرة صعبة بس الصدق الوظيفة الحكومية خنقة للي يفكر يفتح محل تجاري

اتفق معاك تماما
انا ضيعت قسم كبير من عمري في الوظيفه الحكوميه,,,,, ومتحسف الان قد شعر راسي
كنت على وشك البدء في تجاره قبل الوظيفه وبديت جولاتي وتجميع المعلومات وخلافه, لكن فجأة اتصلو علي قالو تعال خذ وظيفه,,,, ومع الوقت نسيت او تناسيت

انا كلامي هنا ليس للموظف الحالي ( فهذا قراراه بيده وهو يعرف كيف يوازن الامور ويرى الانسب له )
لكن الشباب اللي اشوفهم من مدينه الى مدينه وملفاتهم معاهم يدورون فيها من اداره الى اداره ومن شركه الى شركه................................. ياخي حرااااااااااااااااااااام عليك تضيع وقتك وجهدك,,, وانت تشوف السوق مليان اجانب وشغالين وياكلون الشهد من خيرات بلدك

البلد فيها خير كثييير في مجال التجاره, لكن محتاجين شباب قنوع في البدايات وصبور على التعلم والظغط الذي يصاحب التعلم في أي مهنه,,,,,, وبعدها الامور تصير اسهل والدخل يصير اكبر بأضعاااف اضعاف دخل الوظيفه, سواء وظيفه حكوميه او قطاع خاص

عندي كلام كثير,,, لكن اخوك مصخن
وان شاء الله لي رجعه للموضوع!!

المجتمع اول مسئول


انت اليوم تسولف بالمجلس عن فلان فجاة تلقى سوال مبرش وماشي ميتين هو وين شغال موضف

لو تقول فاتح له محل يترزق الله

يلتفت شايب على يمينك ويخزرك بعينة ويقول الله واكبر يا الراجحي على غفلة


يابوي وش دخلك فيه انت وصاحب السوال الغلبي وش دخل شغلة ووضيفتة


عالم ماله حل


لا والقهر المزيونة

اذا تقدم لها فلان صاحب محل الخضار اللي باخر الحارة

ردت ليه انا ناقصة ولا ناقصة ليه مالي رب مالقيتو الى بياع خضرة

الله واكبر يادكتورة عصرك وزمانك انتي وش فيه بياع الخضرة دخلة اكثر من دخل ابوك ويمكن اخوانك بعد

انتي بتتزوجينة ولا بتتزوجين محلة


عشان كذا مو غريب شبابنا مسكر على عقلة وكاتب متوقف عن العمل الى حين الحصول على الوظيفة

عشان الجماعة والوجاهه اللي ما ادري وش تبي وعشان بنت الحلال تكشخ به


حلووووووووووووه تكشخ به



هذا السبب وبس


موفقين يا موضفين وياعاطلين وياسهرانين

مخآوي الليل وابو الافكار شرفني مروركم واضافاتكم

اتفق معاك
توظفت تقريبا من 20 سنه وكل سنه اقول هذه اخر سنه واستقيل واخاف واقول خلها كمان سنه وكان معي ثلاث زملاء تفس تفكيرى بس الفرق انهم اتخذو قرارهم بشجاعه وبدئو بالتجاره اكيد في البدايه تعبو وواجهو مصاعب كثيره والتقينا بعد فتره طويله في احدى المناسبات واخذنا الحديث وكل واحد منهم ماشاء الله يتحدث عن بداياته والتحديات التى واجهته وكيف تغلب عليها وهم الان ماشاء الله تجار كبار احدهم من كبار مستوردي السياراة الامريكية المستعملة ويعمل اسبوعيا مزاد على المئات من السياراة ولديه معارض سياراة ماشاء الله والاخر لديه مصنع رخام ماشاء الله والثالث من كبار تجار تشليح السياراة ماشاء الله وكلامهم كله بالملايين ماشاء الله .
وانا والحمدلله مازلت في وظيفتى واسكن في منزل والدي ومازلت اقول كل سنه السنه القادمه استقيل ( تسويف في تسويف ) ( خوف تردد ) ضيع فرص كثيره

الحمدلله رب العالمين ولاكن يا اخوان واخوات ثلاث ارباع الرزق في التجارة

اعتذر على الاطاله ولاكن هذا الموضوع مهم جدا ولابد ان تتغير المفاهيم والمعتقدات تجاه الوظيفه الحكومية لانها تقتل الطموح بصراحه

موضوعك رائع جداً ويدور في بال الكثير من الشباب وانا اول واحد

يعني ندرس ابتدائي 6 سنوات ومتوسط 3 وثانوي 3 وجامعة 4 مجموعهم 16 سنه !!!

تخيل 16 سنه راحت من اعمارنا وفي الاخير ما تحصل وظيفه واذا حصلت وظيفه راتبك حده 9000 ريال والله ما تسوي شي يعني ( معاش ) قالوها الاولين يعني اكل وشرب لا تقدر تشتري سياره مثل العالم ولا تقدر تفتح لك بيت ولا ولا .....

طبعاً الحمد لله على النعمه اللي حنا فيها

لكن البلد فيه خير كثير والاجنبي يجي سنتين يروح لبلده ملونير !

يعني تخيل لو ان آبائنا علمونا التجاره منذ الصغر كان ايش صرنا الحين ؟

والله افكر اعلم الولد التجاره منذ صغره ولا يمنع التحاقه بالمدرسه للعلم فقط لا للوظيفه

المشكله اخوي انا اعرف ناس عندها ملايين ومشاريع كثيره وخدمتهم 20 و 30 سنه ووظيفته تافه وراتبه عادي جدا ولا يبي يترك الوظيفه خايف يقول الوظيفه مضمونه لا سمح الله خسرت او شيء رغم الملايين !!

ما يدري لو انه بدل ساعات الدوام في الوظيفه لو اشرف بها على عمله او اشتغل فيها في مشاريع كان دخله اضعاف راتبه ؟

بذكر لكم قصة اصحاب ثلاثة تخروجو من الثانوي سوا , الاول دخل كلية الضباط وين راسه ههه , والثاني صار في ارامكو اوووه هههه , والثالث قال انا ابي اعلق الشهاده في البيت واطقطق في التجاره ,ضحكو عليه اصحابه : مجنون انت , دارت الايام وبعد عشرين سنه تقابلو وسألو بعض عن اوضاعهم قال الاول انا ضابظ راتبي 17 الف ساكن في شقه ومديون والثاني في ارامكو خبركم ارامكو اعطوه بيت وراتبه معيشه على قده , والثالث اصبح رجل اعمال ولديه فيلا تتطارد فيها الخيل والسيارات طب وتخير اصبح مليونير ...

اعذرني ع الاطاله