السلام عليكم

جت في بالي فكرة ، تناسب البنات اللي يبون يبدأون بتجارة ماهي مكلفة .

وهي . متجر نسائي في القصور والافراح .


يعني تروحين لقاعة قريبة من حيك ،

او بعيدة عن الحي اذا كنتِ خجولة

بس تكون فيها الزواجات شبه يومياً ، وراقي شوي والمستاجرين في الغالب سعوديين ، لان الاجانب ما يشترون واجد .

وتتفقين مع صاحب القاعة انك تسوين عنده كشك تبيعين فيه ، طبعاً الكشك ما راح يكون داخل قاعة النساء لكن في المدخل .

الكشك سهل وغير مكلف بس المهم انه يكون قابل للفتح والغلق عشان اذا طلعتي منه تقفلين على بضاعتك .

واهتمي بشكل الكشك هذا شيء ضروري ، يعني خليه جذاب وفيه الوان وحركات .

ويكون قابل لتعليق البضاعة وترتيبها


كيف تتفقين مع صاحب القاعة ؟

افضل طريقة في اعتقادي انك تتفقين معاه على ايام الزواجات بمعنى اذا فيه زواج ، تعطينه مبلغ معيّن مقطوع يعني مثلا مية ريال او اقل او اكثر على حسب شطارتك .

يعني مثلا كان الشهر هذا فيه عشر زواجات واتفقتي معاه بمية ريال يطلع له الف ريال نهاية الشهر.

بس حاولي تتفقي معاه على اقل سعر

وممكن تستفيدي من كوافيرة القاعة عشان تعرفي شلون هي مستاجرة لان عندها خبرة .

وانصحك ترسلين والدك او اخوك عشان يتفق مع صاحب القاعة ، عشان ما يكون له تدخل فيك .

وش ممكن تبيعي؟

لازم يكون عندك ثلاجة عصيرات ، وتحطي فيها عصيرات متنوعة

طبعا العصيرات تنباع بسعر اغلى شوي من برا يعني مثلا البيبسي بريالين وكذا

العاب الاطفال وهذي مهمة واحرصي على الالعاب الغير مؤذية والغير مزعجة

طرح

اكسسوارات

بطايق شحن بيعيها بسعرها العادي مافيها مكسب بس تجذب الزباين

بسكويتات

اكسسوارات

هدايا للي تبي تهدي العروس

تحف

حبوب بنادول عشان اللي تصدع من الطق هههههه

وممكن تبيعي آيسكريم بس هذا خليه بعدين عشان لاترهقي ميزانيتك في البداية لكن اشتريه بعدين اذا نجحتي . لانه يحتاج لآلة ايسكريم وهي بالآلاف .

حطي مثلا سيديهات شيلات وطق

لا تكثري بضاعة في البداية لكن حبة حبة ، واشتري من الاشياء الرخيصة وذات الاشكال الحلوة من ريالين وخمسة وعشرة وكذا ، لان الوحدة تدفعها بدون صراع مع النفس هههههه .


ولازم تعرفي وش ممكن تحتاج الوحدة وهي في القصر عشان تخلينه ضمن بضاعتك

طبعاً مع الايام راح تعرفي البضاعة اللي بتجيبينها ، من طلبات الزباين



وربنا يوفقكن

مشششششاء الله عليك

مخ نظيف

الله يوفقك

حياك الله يا المستكشف

ومرورك لطيف

الله يعطيك الصحه والعافية اخوي ليقاند على الفكرة وعلى انك فكرت وطرحت فكرتك بس لا تزعل علي اخوي انا اشوف ان الفكرة صعبة شوي لانه ما راح تلقى قاعة او صالة افراح تأجر لك كشك داخل القاعة وتخرب عليها زباينها علشان هالكشك ابو الف ريال شهري وارجع واقول الله يعطيك الصحه والعافية على فكرتك

القادم افضل و احسن باذن الله

حياك الله اخوي سعد

وانا فاهم عليك ، بالنسبة للقاعات الفخمة والغالية اللي قد تتجاوز ايجارها فوق الثلاثين والخمسين الف هذول صحيح ما راح يعطونك وجه .

لكن انا اتكلم عن القاعات اللي تكون متوسطة .

ووجود المتجر(الكشك) مو شرط يخرب الزباين بالعكس يقدم لهم معروضاته بكل رقي وانا قلت محل المتجر بالمدخل مو بالقاعة يعني اللي تبي تشتري راح تطلع من القاعة عشان المتجر .

وبالنسبة لألف ريال ، مو شرط يرفضها صاحب القاعة ، لانه اصلا مأجر على العمال المطبخ حق القصر ، ومأجر بعض الغرف على الكوافيرة ، ويأجر حتى الفرش اللي على الطاولات ، يعني سالفة الايجار هذي طبيعية جداً في القاعات .

انا ساكن بعمارة فيها شقق واجد وصاحب العمارة معين خير وعنده عماير غيرها ومستوصف ، ومع ذلك فيه غرفة بأسفل العمارة خاصة بالحارس ، طلع الحارس منها وأجر الغرفة على سواق لموزين اعتقد انه مآخذها بخمسمية ريال .

والموضوع مافيه زعل بالعكس اقتراحات وافكار .

وشاكر كثير لمرورك

وعليكم السسلام والرحممه

وَ الله فككره بسييطه وحلووه
المشكله إذآ صآحب آلقآعه بيوآفق عَ آلتأجير ولآ !
هآلشي صآير في آلمشآغل آلنسآئيه تأجير كشك

الله يوفقكك ويرزقكك ويعطيكك عَ قد نيآتكك ..~