السلام عليكم ورحمه الله وبركاته

ياجماعه الخير ما قدرت أصبر اشوف خلق الله تشتكي من همومها والماديه أكثر شيء

ولا أساعد بشيء وانا بصراحه في بالي كذا فكره لمشروع تكلفته بسيطه بس يحتاج له

مجهود بدني ودخله كبير هذا لـ الشباب ،، وأن شاء الله الرجل الصامل بيدخل مئات الالوف مع الصبر

وانا والله ما كتبت الموضوع هذا الا أنه أبي لكم الخير وأبي دعوة من قلب في علم الغيب



---------------------------------------------------------------------------

" فكرة المشروع الاول تحميل خضروات بالجمله من احد المزارع "

في البدايه يحتاج للواحد الصبر ودراسه الاوضاع بالسوق ميدانيآ ،، يعني مثلآ تروح سوق

الخضار في الصباح بعد الفجر وتشوف الدينات الي تجي وطبعا بكل سوق بيكون فيه

مكان يشتري البضاعه بالجمله شوف هناك وتفرج كيف الوضع وكيف تنباع وعلى حسب

المناطق بعضها يكون على مزادات وبعضها لا ينباع الصندوق مثلا بـ 5 ريال ألخ ،

اذا كان مزاد يحتاج هنا تكون ملسون واذا كان بسعر الصندوق بيكون شيء طيب ،،

نجي للمرحله الثانيه تروح بسيارتك وتفر المزارع الي بنفس منطقتكم بعض المزارع مايكون

عندها دينات وبعضها يكون ملاكها عندهم دينات او سيارات نقل عموما انت دور للمزرعه الي

ماعندهم دينات واتفق معاهم انك راح تحمل من عندهم وعلى كل صندوق يتحمل بتاخذ

ريال واحد بس ( بعضهم ياخذ من ريالين وثلاثه ريال ) بس لا تكون طماع انت ، طبعا العمال

بيكون عليه هو راعي المزرعه ويحملونها لك في الدينه وانت راح تحمل تقريبا 1200 صندوق

يعني لو اخذت ريال الحمله الوحده راح يكون عندك 1200 ريال في جيبك ولو كانت حملتين

من كل مزرعه حمله راح يكون عندك 2400 ريال باليوم الواحد والمزرعه بيكون تنتج اكثر من نوع

يعني لو كانت شغلتنا يوميآ من 1200 وهي اضعف الايمان راح يكون الناتج شهريا

1200 * 30 = 36000 ريال شهريآ ، بالله مو مبلغ طيب أحسن من 100 وظيفه ؟ ولو نحسبها

بالسنه 432000 الف اي تقريبا نص مليون وهذي من حمله وحده باليوم ولو اكثر من حمله

وانت وشطارتك وتنسيقك مع المزارع والي يبيعون بالجمله يشترون راح تكون حملاتك اكبر

وهذي الشغله والله العظيم الاجانب طايحين فيها اكثر من دينه اشوف السواق الي فيها

من جنسيه عربيه وحرام ملااييين تطلع برا السعوديه وأبن البلد اولى فيها

نجي الحين لاخر خطوة موضوع الشاحنه او الدينا بعضهم يقول من وين لي سعر دينه اشتريها

بسيطه الحل عندي وانا ابو هندي

في اماكن تاجر دينات بالشهر على الي حسب قريته من المواقع بالانترنت

واهم شيء تكون من نوع " جامبو " وإيجارها الشهري

يتراوح مابين الفين ريال لـ اربعه الاف ويكون عليها تأمين ومجهزه من كل شيء مو ناقصك

اذا كنت درباوي إلا تاخذ حمضيات جنبك وتشغل اناشيد اسلاميه مسرعه

طبعا هذي يبي لها صبر وتدرس اوضاع السوق صح وتضبط علاقاتك مع الموزعين لسوق الخضار

ومع اصحاب المزارع وانا انصحك بالمزارع الي تكون على اطراف المنطقه وخارجها

هذا أول مشروع للمجتمع الذكوري ،،،


أما المشروع الثاني وايضآ للمجتمع الذكوري

الصحف الورقيه الي تكون صغيره وتتوزع اسبوعيآ بالسوبرماركات والاسواق هذي سلمك الله

تكون محتاج سياره بس وتروح للشركه وتتفق معاهم لو هم محتاجين وتكون موزع

كل يوم جمعه او سبت تاخذ الصحف الورقيه هذي وتروح توزعها بكل مكان وطبعا يعطونك

مابين 300 ريال لـ 500 ريال اسبوعيآ ومايحتاج انك تكون موظف عندهم او عندك سجل تجاري


------------------------------------------------------------------------------------


واهم شيء لا تنسون الصدقه علشان ربي يبارك لكم في مالكم وأمور اخرى

عن أبي هريرة رضي الله عنه أن رسول الله صلى الله عليه وسلم قال: (( ما نقصت صدقة من مال، وما زاد الله عبداً بعفو إلا عزا، وما تواضع أحدٌ لله إلا رفعه الله عز وجل )) رواه مسلم.


وأعتذر للجميع عن الأطاله لو أطلت الموضوع وأتمنى أن تعم الفائده للجميع

وتذكروا أن الرازق هو الله سبحانه تعالى ولبس العبد

لا تنسوني من دعائكم
هذا وصل الله وبارك على نبينا محمد وعلى اله وصحبه اجمعين ...

بالتوفيق الله يعطيك العافية

موفقين

موفق خير اخوي

اسلوب جميل جدا

بالتوفيق الله يعطيك العافية

لي صديق مزارع و عندهم مزرعة
وعندهم مشكلة بالتصريف
فاذا ذهب الى السوق يجد ان السوق مليء بالبضاعة و يريدون الشراء منه بارخص من التكلفة و ارخص من سعر التوصيل
فكيف تكون مربحة مع العلم ان هذا الكلام بالدمام الشرقية

كل التوفيق والتقدير لك اخي على روعة المشروع

الكلام حلو لكن الواقع شي ثاني تماما

جزاك الله الف خير