هذا نص موضوعي الاول قبل تقريبا 8 شهور واكثر النتائج اسفل

اولا / سلام عليكم جميعا
ثانيا / اسال الله ان أكون مفتاح رزق لكم ( ربما تستفيدون من هذه النيه ) فحب لأخيك المسلم ما تحبه الى نفسك

انا يأخوان بأعطيكم نية مشروع قادم في بالي اسال الله ان احققه ويرزقني منه الرزق الحلال بأقول لكم القصه ,
انا ناوي على شراء دينا حوض نوع ايسوزو اربع طن شاص طويل سألت يمين يسار كل شخص ايدني عليها .
حتى رحت يوم الجمعه الماضي صليت لي في مسجد وقابلت واحد سوداني يبدو عليه الطيبه والتسامح بعد الصلاه معه دينا سلمت عليه , وقلت ياخي انا بأستشيرك وانا في ذمتك وترى مربحي وخسارتي في ذمتك ايضا في هذا النشاط قلت باشتري دينا واجيب لي فيها سواق واعطيه كافة الصلاحيات فالسفر فيها كم تتوقع دخلي الشهر منها قال والله اذا هو سائق امين وسيارتك نظيفه وما تعكس فالمشاوير انا اقولك من فوق 6000 الاف مربح شهري يزود لك وفالمواسم يزوود اكثر خاصة في الاضحى يمكن تدبل .
المهم يأخوان رحت لواحد سوداني متعامل معه في حراج الغنم وعلمته في نيتي شراء سياره وابغاه يشوف لي واحد من جماعته امين ويكون نشيط قال لي مالك هم . اذا تأجرها له ويكون موديل حديث يكون ايجارها من 2500 حتى 3500 قلت يصير خير عندي طريقه افضل مية مره من الايجار اللي تقوله وبعدها في يومين اتصل علي وقال اجريت اتصالات فالسودان ولقيت لك ولد شباب عمره 28 سنه سواق ديانات في السودان وولد امين وصادق المهم قلت له خلاص اعطني رقم جواله واعطاني اياه وكلمته واليكم مكالمتنا ::
سلمت عليه وعافيت له ويبدو عليه انسان يحب الشغل ولا هو كسول علمته في نشاط التجاره من والى وقلت له بالعربي الفسيح :
ــ الصدق اولا والامانه . الدعوى ربح وخسارة وهذي مبالغ انت شخصيا تستحصلها من الزبائن والسيارة انت تشتغل عليها ان اكلت منها شيء حرام ولو ريالا واحدا دون علمي فلن اسامحك قال والله ياعمي مابغى اطلع من السودان واروح واتغرب والى اخره واوكل عيالى حرام قلت له انا اكون معك واضح وقال السيارة باحافظ عليها امانه في رقبتي قلت طيب اتفقنا باقي شروط الشغل والماده
ـــ انت سائق تشتغل براتب قدره 1000 ريال تصرف لك من جيبي الخاص
ــ المبلغ اللي تستحصله مثلا عند نهاية الشهر جمعت مبلغ 6000 الاف ريال يخصم منها مبلغ 2000 ريال ايجار للدينا وهذا ثابت كل شهر والمبلغ المتبقي 4000 لك منه 20 % اي مايعادل 800 ريال ولو زاولو دخلت مبلغ 8000 الاف ريال يخصم ايجار الدينا 2000 ريال ويتبقى 6000 الاف ريال لك منها 20% اي 1200 ريال طبعا زايد راتبك الثابت وهو 1000 يعني صار راتبك مع عمولتك 2200 وعمولتك تعتمد على شغلك كل ماجبت دخل اكثر صار لك دخل اكثر واتفقنا اتفاق واضح قلت قبل اجيبك وتخسرني واخسرك هذا الشغل اللي عندي قال ياعم اتفقنا على بركة الله طبعا ياخوان التأشيرة له في طريقها .

انا توقعي والله اعلم في اقل تقدير من 4000 حتى 6000 الاف ريال وهو متوسط الربح وربما يزيد في المواسم الاخرى يعني هالسيارة انا راصد لها مبلغ 100000 الف ريال شراء وتكلفه يعني راس مالها راح ترده من 18 شهر حتى 24 شهر يعني هالدينا لو شريته جديده بـ 100000 ريال وموديل حديث 2011 راح ابيعه فالميت بـ 80000 الف ريال خسارة عشرين الف ريال مقابل مربح قدره 100000 الف ريال خلال سنتين ( يعني بالعربي هالشغله مربحه سنويا من 40% حتى 60% والله اعلم وللأخوة ذوي الخبرات راي في ذلك
وانا والله العظيم بأجربه كالاتي
راح سلمه سيارة ايسوزو 4 طن شاص طويل من موديل 2009 فما فوق ان لم تكن جديده على الزيرو
ـ الشهر الاول ما ودي اخذ منه ريال واحد كل الشغل اللي يدخل بها الشهر حلال عليه جاي متغرب وتعرفوا تكلفة السفر عليه
ان شفته رجل صادق يمكن افكر ارفع النسبه له الى 30 % وله مميزات اخرى
وأوضحت له اني را ح اتابعه واتابع العداد وجميع استهلاكات السيارة يكون معي صادق يبشر فاللي يبي



انا هنا ياخوان ودي ارائكم عن موضوعي وكيف هل الاتفاق جيد او فيه نقاط ترغبون اضيفها او طريقة شغل افضل من هذي تدر دخل اكثر . علما اني افكر في بعض المواسم يعني بعيد الاضحى نشتغل انا وياه فالغنم يعني نروح الشمال نجيب نعيم وما شابه وحائل والقصيم ونبيع فالمناطق الاكثر سعرا
ثانيا وودي منكم توضحون لي كم اسعار الايسوزو 4 طن جديده واي نوع هو افضل واي حجم يعني اللي تمشي بالسوق .



النتيجــــــــــــــــــه اليوم 11/1/1434



والله ياخوان كتبت هالموضوع لكل اخواني وان شاء الله اكون وفقت في انارة الطريق لمن لم يبصربه

طبعا استقدمت سائق سوداني من حسن الحظ طلع انسان كويس وامين وفي رمضان الماضي شريت له دينا شبه جديده كلفتني في حدود 90000 الف ريال

ومن ثم اتفقنا انا والسواق بعد جدال على ايجار شهري قدره 3500 ريال صافي في جيبي ولست مسؤل عن مصاريف وخلافه ومحروقات ........الخ وطبعا بشروط يتحمل كل شيء من الاف اى الياء حتى السياره لو صار لها شيء في ذمته
الشرط بيني وبينه تظل السياره معه لمدة خمس سنوات بعد 5 سنوات اغيرها له بجديد ونفس شروطنا
وما أشتغل رسمي الا بداية شهر 12 عام 1433هـ وبصراحه عينا خير هو موسم حج تقريبا وصلنا في حدود 4000 وتزيد
وفي شهر واحد السواق عطاني 3000 الاف ريال سامحته ب 500 اول شهر كونه مبتدي وشهر عيد ورحمه
طبعا انا سويت لها دعايات رهيبه على النت نقل عفش واغنام وعند بعض الاخوان ............. الخ

انطبـــــــــــــــــاعي عنها
مربحه جدا لوكان السواق سعودي
تحتاج الى سائق لبق يكون علاقات بسرعه
تحتاج الى علاقات واسعه
تحتاج الى متابعه مستمره
ارى ان مردودها الفعلي بعد 6 شهور عمل حتى السائق يعرف المناطق والمواقع ويكون علاقات

اشوف ان مبلغ 3000 ريال مرضي لطرفين
اشوف ان السائق المصري ربما امهر من السوداني ويرضى بالقليل والسوداني عنده نوع من التغلي

طبعا الشغله ماشي معنا وانا راضي عنها والسواق راضي عنها وعاشقها هو حييييل

الان ادور لي على وايت ايسوزو والسائق بالطريق باتفاق شهري قدره 3000 ريال لكن مازالت ابحث عن دينا او وايت ايسوزو واللي يعرف يدز رقمه لي ان كان متوفر عنده دينا ايسوزو اوا وايت من موديل 96 حتى 2002

وراح انشاء الله اوعدكم بكتابة تقرير شامل عن مواضيعي بعد كم شهر ونجاح المشروع او فشله وايجابياته وسلبياته

والسلام عليكم ـــــــــــــــــ لاتنسوني من دعاءكم وادعول لامي بالشفاء العاجل وطولة العمر

اولا الله يشفي والدتك ويلبسها ثوب الصحة والعافية ..ويطول بعمرها على طاعة الله

بصرااحة موضوع شيق ومفيد خاصة عندما ذكرت التفاصيل من البداية و نتائج المشروع بعد التفيذ

وفيه طريقة جدا ممتازة في طريقة مراقبة الدينا وهو وضع جهاز للتعقب سري لا يعرف مكانة السائق وهو جدا نافع


بالتوفيق

ارجوا الدعء لي بالتوفيق في مشروعي

الله يوفقك ويرزق والدتك الشفاء العاجل ويطول في عمرها

ما شاء الله
الله يرزقك من خيره ويفتح عليك

وصيتي لك التوسع والحرص على الدعاية والاعلان بشكل مستمر ولا تقول كافي الزباين اللي عندي


وإلى الأمام

الله يرزقك من حيث لا تحتسب

كل الشكر لكم
والله انها مجرد فائده لكم ودرس وعبره واقدام وتحدي
اسال الله ان يرزقنا واياكم من حيث لا نحتسب
لكم اجمل التحيه وفقكم الله
محبكم شفاوي
واي استفسار من الجميع
انا حاضر
ابن لكبيركم
واخ لصغيركم

وفقكم الله

مجرد نصيحه
العزم والتحدي بنظره ثابقه تسهل لكم الصعاب
لكم مودتي ومحبتي

مشكور بداية على حرصك لإفادة اخوانك بالمنتدى ,وأسأل الله الشفاء لوالدتك ولجميع مرضى المسلمين , وأسأل الله لك التوفيق وأن يعينك , بالنسبة للمشروع أتصور إن عائده جيد لكن المشكلة بالسائق الثقة , والعائد المتوقع بحدود 28% عائد ممتاز وربي يوفقك ... بس عندي سؤال هل هناك تأمين ومن يدفعه انت ام السائق ؟ وبصراحة سمعت قصص عن تهريب المعدات وسيارات النقل وهذا اللي خلاني مافكر بمثل هالمشروع

الله يوفقك ويرزقك الله على قد نيتك والي الامام

الله يوفقك ويوسع رزقك

طيب يالغالي ايش افضل انواع الدينا ومتوسط سعرها النظيف لأن ماشاءالله المشروع دخل في راسي ومادري يمكن تفتح لنا رزق على يدك وانا اخووك ياليت تفيدنا والله لايهينك ويرزقك من واسع فظله