بنات خذو في بالكم كل شئ في البدايه صعب الدراسه صعبه والزواج صعب والتعين في البدايه صعب بعدين تتعودوا وتكون ذكريات حلوة ...اهم شئ الله يكتب لنا الخير وين ماكان ويبعد عنا كل شر

السلام عليكم

بناااااات انا متخرجه من كلية التربيه علم حيوان

شوفو وش جايني عند الدرجه العلمية

مركز تحميل الصور

تقدمي صح ولا اعدل

بنات بعد ما كتبت اللي صار لزوجة أخوي في طريقها لمدرستها مدري ايش صار وانحذف على العموم خيرة يمكن وحدة كانت حتخاف وتمسح الليث بسببي وتروح عليها الفرصة علشان كذا بطلت وعلى العموم انا حاطة الليث أول رغبة وأتمنى أتعين فيها بالرغم من كل عيوبها لكن اللي قاهرني زوجة أخوي دايم تدعي لي أتعين في مدرستها الله يصلحها شايفة خطورة الطريق وتبغاني أجي عندها بس إن شاء الله يكون التعيين مكتوب لي في أحسن مكان وإياكم يا رب. على العموم حسب ما قالت لي إنوا الليث بشكل عام حلوة لما تتعين المعلمة يكون فيه 5 قطاعات ترتبها وهي الليث الليث , الليث أضم , الليث سوق أو ربوع العين , الليث بني يزيد , الليث حقال . أخطر مكانين في الليث من حيث الوعورة الدثن عقبات وطلعة جبل بعدين ينزلون الجبل يعني المدرسة ورى الجبل والطريق مو مسفلت وهذه المدرسة في سوق العين و مدرسة الفحو في حقال كمان عقبات ومو مسفلتة , قطاع بني يزيد فيه أماكن خطرة بس مو لدرجة الفحو والدثن طبعا باقي مدارس سوق العين ما يبغالها طلعات أو نزلات بس شوي بعيدة عن سوق العين نفسها . أما حقال معظم مدارسها وعرة وأخطرها الفحو غير كذا المدارس اللي فيها سيئة , بالنسبة لأضم مركز القطاع حلو ومتوفر فيه كل الخدمات ومعظم اللي بيدرسوا في سوق العين ساكنين في أضم لأن أضم قريبة من سوق العين ولأن سوق العين ما فيها خدمات حتى مدارس أضم خطورتها تهون كثير قدام الفحو والدثن بس إنوا بعض قراها بعيدة عن المركز . قطاع الليث الليث هذا الأحسن والأفضل والأقرب من حيث المدارس والأمان أبعد مكان في هذا القطاع حفار قريب من القنفذة مرة بالتالي حفار بعيدة مرة عن جدة وقريبة لبنات القنفذة بس ترى أعرف وحدة بتداوم يوميا من جدة لحفار معظم وقتها طريق مرة كذا مو حلو , وأقرب مكان لجدة يلملم وهو تابع لقطاع الليث وفيه كمان طفيل والسعدية ومجيرمة والغالة ويا هنيالها اللي تطلع في الليث الليث وفي وحدة من الأقرب لجدة تكون مرتاحة وحتى لو طول عليها النقل عادي لأن يلملم اللي هو الميقات تقريبا يا 100 كيلو أو حتى أقل . على العموم قالت لي نقطة مهمة بس ما أدري عن صحتها إنوا كل ماكانت نقاطك في المفاضلة عالية تتعيني في أحسن مكان والأقل الله يعينها يحطوها في الأماكن الصعبة . والله يوفقكم ويوفقني آمين يارب .

نوم العوافي وأحلام سعيدة يا حلوات . توقعاتي لأحلامكم , وحدة خايفة من عدم التعيين , وحدة تعينت خلاص وجالسة تكمل الاجراءات , واللي وصلت مرحلة تأجير الشقة والتأثيث , واللي تلف في الأسواق وجالسة تعبي أكياس من تنانير وبلايز وشنط وجزم وفي طريقها للمكتبة أقلام سبورة ومساحة و ملفات وغيرها ولاب توب وطابعة وايش كمان ايوه اللي تحلم إنها في أول يوم دوام واللي استلمت الراتب ومسوية حفلة واللي خلصت السنة خلاص وجات الإجازة وبتفلها بعد التعب . واللي قامت تلتفت يمين يسار على بالها السواق عند الباب وتلتفت عليها أختها تقولها بكل برود اهجدي ترى التقديم ما انتهى وتعود لتخلد إلى النوم لتبدأ في حلم جديد بس الظاهر ذحين حلمها تغير وصار ايش حيصير لما تجيني الرسالة . أما أنا يا عيني علي ما في نوم وجالسة أفكر ايش أسوي فطوري يالله إنك تعين .

وبدأ العد التنازلي لانتهاء التقديم اليوم الاثنين 13 رمضان , يبقى 4 أيام فقط اللي لسى ما حدثت تحدث قبل فوات الآوان وقبل يوم الخميس والله يوفق الجميع .

لا تنسون الدعاء بإلحاح والاستغفار في هذه الأيام الفضيلة والله يوفقنا يارب .

احياائية
يعني لو وحدة تبغى تسكن في الليث قصدك أفضل قطاع متواجدة فيه خدمات و ينفع للسكن مافي اﻻ أضم و الليث بس

انا حطيت الليث من ضمن الرغبات و عموما انا من لما حدتث ثاني رمضان و تأكدت من بياناتي ما عاد دخلت جدارة
خﻻص استخرت قبل ما اختار و ما أفكر ادخل أعدل
و الله يرزقنا أجمعين و يطمن بالنا
و أهم شيء يا بنات كرروا دايما و قولوا اللهم إني استغفرك و أتوب إليك من كل ذنب يحول بيني و بين رزقي