السلام عليكم ,

يا اخوان الموضوع واضح لكن سؤالي ؟
هل فيها مكاسب وارباح علشان الواحد يتحمس ويدخل فيها ولا ما فيها ؟؟؟؟؟
ارجوا الافادة تكفووووووووون

لازم تعرف وتاخذ بالك من البياعين في الامارات بعضهم غشاش. والشي الاخر سمعت ان السيارات المستعمله ممنوع استيرادها. وايضا لا تنسى الجمارك ياخذون فرق سعر.

احذر المصدوم حيث تكثر السيارات المستورده من امريكا سواء غرقان او مصدوم

بسبب النظام في الامارات يتيح استيراد مثل هذي السيارات ويقومون بتصليحها ودفها

على السعودين

انا اشوف انك تجيب من امريكا مباشره افضل لك والله يوفقك

والله ونا أخوك أشتريت من الشارقه وبالتحديد منطقة ذي شغار هوندا أكورد 2009 أخذتها 51 ماشاء الله الموتر نظيف وكان معاي واحد من الشباب فاهم في السيارات شغال في التشاليح وشحنتها على جده كلفني الشحن تقريباً 3500
وصلت هنا وكان غرضي الأستخدام فقط وبعد فتره أتصل علي واحد يقول فيه واحد يبي يشتري موترك ب 65 الف
قاعد أشاور نفسي لكن فيها شغل الموتر النظيف الكل يبيه في ظل أرتفاع السعر والاستخدام السئ الموجود هنا

قبل شهرين تقريبا ، كنت ناوي اشتري كراون فكتوريا ، من الفين وتسعة وطالع ،،،

قالوا لي رح الشارقة تلقى فرق سعر فوق عشر الاف ريال بالسيارة

المهم يا الغالي ، ما صدقت خبر ،،

حجز وسفر للشارقة

وصلت اول شي دبي بالليل ، وسكنت في فندق بخمس مية ريال

المهم اليوم الثاني طلعت الشارقة...

واقعد الف على المعارض ، من خمس مية معرض أو اكثر ما لقيت غير اربع او خمس سيارات كراون فكتوريا...

لقيت وحدة 2011 وسالتهم بكم ؟ قال بستين الف ...قلت خلااااااااااااااص لقيت


السيارة

وفرق اكثر من عشرين الف ريال عن السعودية...

المهم اخذت السيارة اول فحص ، قال السيارة شبه جديدة وما تحتاج غير تغيير زيت...

ومعي المصري مدير المعرض،، المهم قلت بافحصها ثانية ليطمئن قلبي..قام المصري يلف ويدور..

ومالوش داعي، وخلاص يا عمي فحصنا ، ومن كلامه اللي ما يخلص

قلت لازم نفصحها ثانية..

اخذتها للفحص عند سوريين ، فحصوها ثلاث شباب سوريين بميتين درهم..

قالوا لي لا تشتري ؟ قلت ليش ؟ قالوا السيارة ملعوووب فيها ومصدومة

والاير باق طالع ، ومن تحت مرشوشة بقار ( زفت ) خفيف حتى تغطي على عيوبها..ومرشوش بغش بطريقة احترافية صعب جدا احد يكتشفها...

المهم ، كثيرين يتوهقون ويشترون ، يوصلون عند الجمارك ، يوصل عند الجمارك ، ارجع بالسيارة

للي باعك ليش يا ناس وعيونك كذا ، ابد السيارة الاير باق طالع ومرجع ، او الشاص منعوج..

او غيرها من البلاوي اللي فيها غش وتمنعها الجمارك...

يعني يا حبيبي،، شغلة صداعها طويل ، لازم تكون خبير سيارات وميكانيكي وخبير اسعار السيارات هنا..لاني شفت سيارات كثيرة اسعارها مقاربة للاسعار في السعودية، وغير مسموح دخول موديل اقل من خمس سنوات ماضية...

فيه ناس تروح تشوف سيارات مصدومة صدمات خفيفة من التشاليح في الشارقة ، وعندهم تسع
صناعيات ، كلها تشاليح ، وكل صناعية خمسة كيلو بخمسة كيلو اقل شي...
وحتى لو تلقى سيارة مصدومة صدمة خفيفة وش يضمن لك أن السيارة ما هي junk يعني زبالة، او salvage يعني تالفة، وهذا يكون تصنيفها اساسا من امريكا، وتكون مدخلة بالجهاز، والجمارك تشيك برقم الشاصية ، لو صارت جنك او سالفج مستحيل تدخلها للسعودية وارجع للامارات وجاول تبيعها وتدخل في موضوع طويل...

يعني يا حبيبي لازم تكون:
1 - خبير اسعار سيارات بالسعودية
2- ميكانيكي وتفهم بميكانيكا السيارات
3- تقدر تشيك برقم الشاصية في مواقع امريكية باللغة الانجليزية، لانه احتمال تكون السيارة مستوردة مصدومة من امريكا، وتعرف وش تصنيف السيارة في امريكا.
4- صبووووووووووووووور وطويل نفس للبحث في تسع صناعيات، او بحث في المعارض واللي اشوف ان كثير منها اسعارة مقاربة للاسعار في السعودية...

الله يوفقك ، ما ابغى احطمك ، لكن شرحت لك الواقع بشكل مختصر عن شراء سيارات من الامارات...

اظن انها مرة واحدة مسموح له باستيراد سيارة استخدام شخصي

والله اعلم

فيه شخص في معارض الدمام
عنده معرض كبير كل سيارته من الامارات وعادي تقدر تستيرد من هناك
ولكن يبي لك شخص هنا ينقي لك وتضمنة او روح انت بنفسك
اذا تفهم بالمشروع هذا 100 % بتعين خير
ولازم تعرف المصدوم والمرشوش وتحسب حسابك من هناك وما تدخل الا المضمون
واستخدم واجلد فيها طبالين لين تعرف قوة السيارة والقير والمكينه وكل شي
ودخل هنا وصدقني اقل مكسبت بيكون 3000 الاف وانت طالع وبعضها تجي لك 10 الاف مكسب
شوف كتابات الشباب فوق وضحوا لك التفاصيل

اتمنى لك الخير وان شاء الله يرزقك الله من عندة
لك دعوة في ظهر الغيب

الاستيراد الشخصي ، اول مرة بدون رسوم غير الجمارك..ثاني مرة الفين ريال على السيارة ، ثالث مرة اربع الاف على السيارة ، رابع مرة ست الاف على السيارة ، وهكذاااا، كل مرة تزيد الفين..او تدخل السيارات باسم معرض تعرفه...

الله يوفقك

الحارث بن همام
نشيط بروحي
سعد بن فايز
هسهسه
شمعة&فكرة
عطرجي
رونالدينو


الف الف شكر على ردودكم وتوضيحكم الله لايحرمنا منكم
تحياتي