السلام عليكم
كنت حابة ابدأ مشروع له نفس افكار هالموضوع بعد تشجيع من الاهل والاصدقاء بتحويل هوايتي الى شغل
فشفت موضوعكم وحبيت التفاعل وانه للحين فيه ناس تحب لغيرها اللي تحبه لنفسها
ما اقول قريت كل الصفحات .. بس قريت اكثر من 140!
فيه معلومات كنت اعرفها ومعلومات جديدة عليي فشكرا لكل من شارك بالموضوع
وبالحقيقة .. ماعندي اي سؤال حاليا .. ولكن ما قدرت اقاوم ومااسجل بالمنتدى
وحابه افيدكم مثل ما فدتوني
ومثل ماتشوفون المعرف مالي .. كاميو♡
اعشق هالالة وهيه اللي فتحت ليي هذا الباب
اشتريتها حبا فيها
فشفت انه ناس منكم مايعرفون عنها عدل
فحبيت اعرفكم عليها .. من تجربتي فيها
يمكن افيد الناس اللي تفكر تشتري الة قص او تمتلكها حاليا سواء كاميو او بورتريت النسخة الاصغر
فبقول ليكم مميزاتها و عيوبها ان وجدت
1. تقدرون تستخدمون اي خط عدكم بالجهاز
2. تقدرون تستخدمون اي شكل او صورة عندكم
3. مو لازم تكونون تعرفون بالتصميم .. مجرد معرفة بسيطة بالكمبيوتر .. ولكن كل ما زادت مهاراتكم كل ما استفدتون منها اكثر
4. ما بتحتاجون فوتوشوب حق تصممون عليها .. السوفتوير حده كافي .. ولكن مايمنع انكم تستغلون مهاراتكم في الفوتوشوب والاليستريتر وغيرهم
5. تقص واجد انواع من الماتيريال ورق وستيكر وفينيل وقماش .. ولكن عند ثكنس معين مايحضرني حاليا والقماش لازم يكون مكوي بورق تثبيت نفس اللاوراق اللي يستخدمونها بالتطريز
6. فيه شكل مجاني كل اسبوع .. وتصفيه .. وعدهم عروض تخفيض في المواسم .. و تقدرون تنزلون اي ملف قص مجاني او مشترينه من النت بس تكتبون بقوقل free svg والاشكال في متجرهم كثيرة .. لانه متعاونين ويا مصممين واجد .. واذا سويتون عدهم اشتراك يقل قيمة الشكل
عادتا الشكل ب 0.99 دولار .. يعني 4 ريال تقريبا .. واذا اشتركتون ب 15 دولار بالشهر بتقدرون تنزلون ب 50 دولار! هذا الديلوكس وعدهم اقل وعدهم اكثر
7. عدهم ميزة اطبع وقص print & cut
يعني تسوي التصميم وتطبعه من خلال السوفتوير .. لازم تحدد الرجستريشن مارك .. وبعدين تتعرف عليه من خلالهم وتقصه ع الحد بشكل مضبوط .. وساعات تجنني في الموضوع .. واحيان ماتقص ليي عدل .. بس دائما كنت بالنهاية اتغلب على المشكلة ..
8. توهم منزلين mat " الشي اللي يثبتون عليه الورق عشان تقصه" اسمها pixscan بس عليكم تصورون اللشي اللي بتقصونه سواء من مجلة او ورقة مطبوعه مافيها رجستريشن مارك او مثلا ضايع الملف مال القص تبعها وهيه بتقصه ليكم .. للامانة للحين ما جربتها بس قريب بطلبها وبجرب الحركة
9. عدهم سكتج بن .. لطيف للي يبون يرسمون .. واجد حبيتهم
10. فيه واجد فيديوات تعليمية في اليوتيوب ليها وواجد مواقع ومنتديات اجنبية يتكلمون عنها .. فاي مشكلة عندكم .. اذا كنتون تعرفون انجليزي بتلاقون ليها حل
11. فريق المساعدة جدا محترم مالهم وسريعين بالرد على الاستفسارات .. ويهتمون براي المستخدم
12. مشكلتها ماتدعم عربي بشكل مباشر .. ولكن فيه عدة طرق لاستخدام اللغة .. الاولى انكم تسوون الكلام صورة سواء بالبينت او برنت سكرين من الوورد او فوتوشوب وعقب تسوون لبها تريس بالسوفتوير
او طريقة اسهل بواااجد توني متعلمتنها من اكاونت وحده بالانستا
تدش على هالموقع
http://www.arabic-keyboard.org/photoshop-arabic/
وتكتب الكلام اللي تبيه .. وبيعكسونه بحيث لما تسويه كوبي وبيست بالسوفتوير يصير عدل وتقدر ساعتها تتعامل وياه كخط حاله حال الانجليزي
13. عدهم اشياء مخصصة للكرستالات .. تقدرون تنزلون التصاميم من المتجر او اذا كنتون تستخدمون نسخة المصمم تقدرون تسوون التصميم اللي تبونه
تقريبا هذا كل شي يحضرني بخصوص الكاميو بشكل عام
وتابعو هاشتاق #كاميو_بالعربي
بتشوفون اكاونتات لناس تمتلك الجهاز وبعضهم يحطون دروس
نتخصص الحين بموضوع التيشرتات
استخدمت الفينيل او الستيكر مثل ماتحبون تسمونه هنيه واستخدمت الكرستالات و الطباعة
وكل النتايج كانت ابداع مع انه ما تعبت روحي بتصميم
وشريت الايرون اون ماركة ايفري اللي هوه الورق اللي يطبعون عليه ويكوونه على التي شيرت
ما واجهتني مشكلة القص
بس ماعجبتني النتيجة واجد
اولا اذا كلام مو عملية تقصينه حرف حرف فالخلفية بتبين حدودها
وثانيا وهو الاهم انه يتغير الالوان بعد الطباعه .. يصوفرون :/
فشكلي ببحث عن نوعيه احسن منها
فيه اختراع يسمونه printable cotton canvas
هذا تقدرون تطبعون عليه بالانك جت
وبعد فيه printable heat material
نوع للفواتح ونوع للغوامق
وللامانه ما جربتهم للحين
ناوية اطلبهم واجرب
واخيرا
تاريخ 28/ 11 عندهم بامريكا البلاك فرايداي .. فيسوون عروض لطيفه وتخفيضات
فيمكن ينفعكم العروض مالهم
في امازون والسيلويت ستور
وشكرا .. وعذرا للاطالة
26-11-2014, 05:00 AM
العرض العادي
