المشاركة الأصلية كتبت بواسطة راعِ العَليا

السلام عليكم

بحط تجربتي علشان تستفيدون منها و للاسف انا ما كان لي نصيب فيها ، المهم المقابلة كانت من 4 سنوات و كنا 8 اشخاص و كنت مقدم على سكرتير ثاني ،،،، و بحكم تجربتي معهم اقدر اقول وش ممكن يصير معكم..... فا توقعوا اسئلة حقة الاحداث المتعلقة بالوطن العربي و المتعلقة بالمملكة بشكل خاص لانهم يبغون انطباعك و ردة فعلك و وقتها اذكر كانت سواقة الحريم في الاعلام و اليوتيوب و هذا كان اكثر شي ركزوا عليه - فا اتصور انهم يهتمون بالاحداث الي موجودة في الاعلام زي الحين قرارات الملك بالاسكان او احداث سوريا و موقف المملكة او الربيع العربي بشكل عام .

بالمقابلة كانت في غرفة اجتماعات يعني طاولة كبيرة و رحت و انا مو متوقع من الي بيقابلون توقعت اشخاص عاديين و انصدمت من الي جالسيين كانوا : الامير تركي بن محمد ، الامير خالد بن سعود ، و سلطان السلطان رئيس شؤون الموظفين في هذاك الوقت ، 5 سفراء مخضرميين - و للاسف كنت اول من دخلوا .

المهم هم بطرف من الطاولة على شكل قنطرة و انا جلسوني في الطرف المقابل وكانت عند كل واحد سي في لي و الي بدأ بالأسئلة كان الامير تركي و قالي عرف عن نفسك ، بعدين وقفني واحد و انا اتكلم و قالي ممكن تعيد اي جامعة و كانت بالانكليزي فالظاهر وقفني علشان طريقة النطق و بعد ما قلتها قال ممتاز ممتاز - المهم يخلونك تتكلم حتى توقف

بعدين بدا الامير خالد - سألني ايش رأيك بسواقة الحريم و بعد ما قلت رأيي و جبت مثال انه في حريم في البادية يسوقوون فدخل واحد من السفراء وكان حجازي قالي انت شفتهم بعينك قلت اي نعم و اي واحد يقدر يشوفهم بالثمامة فقالي لا انا ما قصدت البنات الي في الثمامة و يركبون السيارة علشان يستانسوا انا اقصد الحريم الي متواجدين مع الجمال مثلاً و لحالها و بسيارة بيك اب مثلاً يعني سواقتها مو عبثية قلتله بصراحة لا ما شفت قال اهاااا هذا الي اقصده يا ولدي

بعدين جاء الامير تركي وقال انت تشوف انها شي أتي لا محالة صح - جاوبت ايه نعم بس تحتاج وقت قال اوكيه بس هنا السؤال انت تشوف سواقتهم بتشكل خطر عليهم في البداية ام انه شيء روتيني باصدار قانون و يسووقون عادي - قلتله لا اكيد بتكون غريبة في البداية و بتصير مشاكل بس ما اظن انه الدولة بتسمح بالسواقة الا عن طريق خطة تصاعدية حتى انه يصير امر عادي ،،،، فقاطعني و قالي كيف خطة تصاعدية - جاوبت عن طريق السماح للحرمة باستخراج رخصة وفق شروط :

1ـ سن معين مثلا من 30 الى الى 50 .
2ـ بحاجة انها تسوق لانها موظفة.
3ـ ان تكون ساعات السواقة في ساعات الدوام فقط و على الاغلب بالنهار.
4ـ ان يكون محرم لها بجانبها.

و بعدين التصاعدي اقصد فيه على حسب ردة الفعل من المجتمع و الحوادث و بعدين يطورون القوانين الى قوانين اعتيادية و السماح لجميع الحريم بالسواقة بس طبعاً وفق الضوابط الشرعية بالعباية و اللباس الشرعي.

دخل الامير و قال طيب اذا انت تمثل المملكة في مؤتمر و سألوك عن نفس الموضوع و حاولوا يحرجونك المشاركين بترد بنفس الاسلوب و تشرح الخطة التصاعدية ؟؟ قلت لا هنا يختلف و احاول انه يكون جوابي مختصر و يوصل للهدف - قالي كيف - قلتله بانقل ما قاله الملك الله يحفظه عن هالموضوع بقوله انه ليس هناك ما يجرم السواقة كقانون في بلدنا و هي مسألة إجتماعية بحت و عادات و تقاليد و قرار للشعب بقبولها او رفضها .

بعدين سأل الامير تركي السفراء "يا اخوان الي ما سألتوا تحبون تسألون" فسألني واحد و قالي انت تخصصك قانون دولي و ماجستير يعني المفروض يكون عندك دراية كافية بالي رح اساله ؛ قالي في مؤتمر في مدريد صار " وقال السنة بس ما اذكر " و قالي المملكة كانت مشاركة و انسحبت - تقدر تقولي سبب الانسحاب ؟؟ انا هنا دخلت بجدار و لا عندي اي فكرة عن الموضوع فسكت و الظاهر انه وضح الارتباك علي لانه لما تكلمت صرت اقول ااااه و صوت يرجف و واضح ما عندي سالفة فجاوبت انه ما اذكر ليه الانسحاب و قلت بس هذي طال عمرك ما لها دخل بتخصصي - قال وشلون قال في قانون بتخصصك يسمح للمملكة بالانسحاب و بعدين هذي ثقافة عامة و لازم تكون متطلع و ملم !!! هنا دخل الامير خالد و قال اسمحلي هذا سؤال اذا سألته لموظفينا ما رح يقدر يجاوبك عليه و هنا انا تحمست و قلت لا شهادة البكالوريوس و لا الماجستير كانت في المملكة علشان كذا ماني ملم بالمشاركات السعودية او عندي فكرة عنها - فقال السفير على العموم الجواب لوجود الوفد الاسرائيلي في المؤتمر .

و بعدين خرجت و انا اصب عرق و ادور الهجة و اتوقع انه ما كلموني لانه قلت مو ملم و هذا ايش علاقته بتخصصي .... المهم تجربة حبيت احطها قدامكم للافادة

و بالتوفيق لكم جميع