بسم الله الرحمن الرحيم


باختصار اي شركة او مؤسسة او شخص يقولك عطني مبلغ ؟؟؟؟؟؟ واعطيك ارباح شهرية بنسبة ؟؟؟% وبعد ؟؟ سنة تسترجع كامل المبلغ اللي دفعته

اعرف ان الموضوع فيه نصب واحتيال

هذا الموضوع عرفت عنه بالصدفة عن طريق شخص اتصل بي اخذ رقمي من النت واستشارني بالموضوع وهو ان هناك شركة مقاولات كبيرة بالرياض فتحت باب للمساهمة وطلبت منه مليون ريال ويعطونة عقد مبايعة على ارض قيمتها 2 مليون كضمان له ويعطونة كل شهر قصد شهري قدرة 60 الف ريال ولمدة سنتين وبعد سنتين يرجعون له المبلغ اللي دفعة وهو مليون ريال وينتهي تعاملهم معه وتصير فائدتة الاقصاد الشهرية اللي اكتسبها طوال فترة العقد

ارسل لي صورة من العقد
وبعد دراستة لقيت ان الشركة حطت بندين مبهمة باخر العقد وهي

ان العقد عقد شراكة بين المستثمر والشركة وان المستثمر يقع عليه ما يقع على الشركة من ربح وخسارة

يعني لو خسرة الشركة واعلنت افلاسها ما يحق لك تطالب الشركة باي شي بحكم انك شريك بالربح والخسارة

البند الثاني ان عقد مبايعة الارض المتفق عليها الاصلي يبقى عند الشركة بملف العميل وياخذ العميل صورة منها ولا يعمل بها الى بعد سنتين من تاريخ نوقيع المبايعة او العقد

يعني بعد ما تجمع الدراهم وتهج


ولما سالتة هل فيه احد مساهم مع الشركة قال فية ناس واجد و الرجال اللي دلني على الشركة له شهرين وهو يستلم الاقصاد ووصلة الى الان 100 الف ريال
وضمن حقة بورقة مبايعة على ارض بضعف قيمة حصة المساهمة بنفس الطريقة اللي شرحتها له الشركة

ساعتها عرفت المطلوب

باختصار الية النصبة

انت تجي الشركة بـ مليون ريال وتعطيك خمسين الف شهري فوائد لمدة سنتين وبعد سنتين ترجع لك المبلغ
وتضمن حقك بورقة مبايعة لا تسمن ولا تغني من جوع لا نها لاهي مسجلة بمحكمة ولا هي رسمية ولا ادري عن ها الارض هل تملكها الشركة او شخص اخر ولو كانت تملكها الشركة وش يدريني ان الشركة ما سوت 100 ورقة مبايعة على نفس الارض


طيب الشركة تدفع اقصاد للي ساهمو معها ؟يعني فيه مصداقية ؟
صحيح ياحبيبي واكيد بتدفع لك كم قصد مو لاجل عيونك السود لا لاجل انك تنشر الخبر وتكون انت سفير الشركة للنوايا الحسنة لجذب اكبر عدد من المستثمرين وصحاب الاموال
وانت اذا ساهمت بمليون اباعطيك من نفس دراهمك قصد قصدين ثلاثة عشرة وبعدين اشيل عفشي واهاجر

ولو بحسبة بسيطة حسبناها

وقلنا ان اللي ساهمو 40 شخص ومبالغ المساهمة وصلت 20 مليون ريال
والتزمت الشركة بدفع اقصاد 5 اشهر لجميع المستثمرين 50 الف لكل مستثمر
يسير الناتج
40*50*5= 10.000000
10مليون ريال

الصافي للشركة 10 مليون

وانتم يا المستثمرين دورو فلوسكم

جيتو عند الارض الى والله الارض تسوى 2 مليون وانتم يا الاربيعن كلكم اخشراء فيها وكل واحد عنده مبايعة مع الشركة عليها ووووو

وصدقوني ما تشوفون ريال من عقب تقفل الشركة ابوابها


او يمكن ان الشركة تعلن افلاسها وبما انك شريك في الربح والخسارة فالنظام يقول ان مالك حق تطالب الشركة بمبالغ الاستثمار لانك شريك


حبيت انزل الموضوع هنا لعل احد فيكم سمع عن الموضوع او درى عنه

ولعل يكون فيه فائدة وتنبيه لكل ذو عقل لبيب


وارجو من الجميع نشرة باي منتدى وبجميع الوسائل وخاصة بالرياض

والله يكفينا شرور عيال الحرام


ويغنينا بفضله وبالحلال عن الحرام

ودمتم في احسن حال

آلله يجزآك خير وينفعَ فيك مآقصرت يغآلي وبيض الله وجهك ..

آحب آرفق فديو لمدآهمة وتوثيق المداهمة بقناة الاخبارية السعودية على شركة مقآولات تساهم بمبآلغ الناس وتنصب عليهم ،