السلام عليكم ورحمة الله وبركاته

اخواني انا موظف حكومي ولله الحمد لي سنتين تقريبا متوظف على المرتبة السادسه

الحمد لله على كل حال الاوضاع مستقرة ولكني عندي طموووح قبل ان اتوظف ان اكون بالقطاع الخاص حيث تكون الجهة تقدر العمل الذي تقوم به وتقدم الحوافز والبدلات ومكافأة نهاية الخدمة

وش رايكم هل تشجعون على الأنتقال من الحكومي للخاص

ايضا ماهي الشركات القويه التي تنصحوني اقدم عليها

خلك حكومي عزيز ومرفوع راس وابتعد عن الخاص الله لايحد مسلم عليه وعلى مذلته بس

اول شي مبين انك انسان عندك طموح وهذا الشي مبين من كلامك لان فعلا لو انت بس تفكر في الراتب كان أبدا مافكرت في القطاع الخاص ولكنك انسان طموحك عالي وانا معاك الحكومي روتين قاتل للتفكير ومافي اي شي يحمس لكن في الخاص علي قد ما تعطي علي قد ما تأخذ انت ومجهودك اخوي انا قريبي اشتغل في الحكومي ٣ سنوات والله علي المرتبة السابعة الرجال جاله عرض عن طريق شركه مشغله في نفس القطاع الحكومي اللي يشتغل فيه وعطوه دبل راتبه يستلم حاليا قرابه ١٤ الف وشوي والرجال مبسوط يقول الخاص دلع وتقدير وعلاج ورواتب إضافيه بس انت ومجهودك انا ما قول غير الله يوفقك وقبل ما تتخذ قرار لازم انك تدرس الموضوع تمام واستخير واذا الخاص افضل والشركة قويه واسمها معروف وانا أخوك لا تتردد وتوكل علي الله

المفروض العكس لو انك تبتدي بقطاع خاص وتكون نفسك ثم تحول حكومي لكي تستقر وترتاح

لان القطاع الخاص وان زاد وتحسن الدخل الا انه مرهق في العمل لانك موظف لتنجز اعمال متزايدة ويكفيك فقط ان تتخيل نفسك تداوم الساعة 8 توقع الحضور وماتوقع الانصراف الا 4 ونص او 5 وفيه شركات 5 ونص ياساتر


اضف الي ذلك مشوار الدوام ومشوار العودة


لا اريد تثبيط عزيمتك ولو اني اشوف فيك طموح تقهر جميع الصعوبات اللي بالقطاع الخاص

والله يوفقك وين ماكنت

اذا كان مؤهلك جامعي وما فوق وعندك امكانيات شخصية جيدة فتوجه الى القطاع الخاص
ولكن اختار القطاع الذي تتوجه اليه لأن بعض القطاعات الرواتب فيها متدنية .

يعني مثلا المدرس في القطاع الخاص مستحيل يعطيه التاجر مثل ما يعطونه الحكومه على ان التاجر يربح ارباح هائله في السنه فلو توجه شخص طموح فلن يجد الحوافز والرواتب

لكن القطاع المصرفي البنوك تعطي رواتب جيدة على حسب انتاجيتك ولكن يأخذون طاقتك كاملة في فترة الدوام

امور يجب ان تأخذها في الحسبان /
1/ انك تستطيع الانتقال بكل سهوله من الوظيفة الحكوميه للقطاع الخاص اما العكس فهو صعب جدا جدا فماذا لو تركت وظيفتك واردت الرجوع لها بعد خمس سنوات قد يكون اشبه بالمستحيل .
2/ العلاوة السنوية غير ثابته في القطاع الخاص وقد لا تأخذ علاوة لبعض السنوات .
3/ الاجازات لك 21 يوم الى شهر في نظام العمل والعمال بالاضافة الى يوم الخميس دوام .
4/ ساعات العمل تفرق كثييير بين الوظيفة الحكوميه والقطاع الخاص

وبالاخير اركد ولا ترفس النعمه

^
اخوي بعض الامور التي ذكرتها لم تحدد اياً منها للخاص وايها للعام

اتمنى التوضيح جزاك الله خير

اركد
قال خاص قال
غير ارمكو وسابك لاتروح مكان في الخاص

على حسب تخصصك

لكن اذا تبي تتحمل التعب والمشقة اعمل في البنك وعلى قد ما تسوق و تبيع للبنك البنك راح يعطيك عمولات فوق راتبك ... او اعمل في مجال المبيعات والتسويق في اي شركة وهذي هي اللي دايما تكون رواتبها عاليها لانها مربوظة بعملك واجتهادك والحوافز والعمولات اللي تاخذها ...

اغلب من يعمل في القطاع الخاص يرغب في وظيفة حكومية حتى لو براتب اقل ..

الله يعطيكم العافية بصراحه غيرت رأيي الكل يقولي انت مجنون خلك محلك

هههههههه صراحه ضحكتني
لا والبعض يسلك لك قال خاص قال ..
ياحبيبي خلك حكومي افضلك ..
اذا عندك طموح افرغ شحناتك في اكمال الدراسه
لو تبدا مرحله دراسيه جديده عادي ..

اما الخاص مثل ماقال الاخ غير سابك وارامكو لاتدوور ..