ملف علاّقي …رتّب .. لا .. بعثر أوراقه : خالد قمّاش
إنها همهمات شاب انتعل المستحيل بحثا عن وظيفة أو رغيفه ،شاب اكتملت أوراقه آلامه ولم تكتمل آماله وأحلامه !

اتفقّد أوراقي .. شهادة أخلاقي ..
ختم وصور .. وكلام
فرح وأمل .. وأحلام
يامسهّل .. يامسهّل
هذي صوره من جروحي ..
وهذي صوره م المؤهل ..
مرمطه فـ كل الدواير ..
مشوره والحزن فاير ..
وقفتي خلف المكاتب ..
والشعارات الأنيقه ..
كانت الوقفه مريره ..
وآنا بآمد بملفي ..
يدي أقصر من طموحي ..
حزني أكبر من جروحي ..
كانت النظره كسيره ..
وعيني بدمعي أسيره ..
يرمى في وجهي ملفي !
ياخساره ..
مالقيت اللي على كيفي ..وشفي !
وغصني أخضر ..ويحترق عمري ..
مثل اتفه سيجاره !
وآنا ابوس الكف ..
ـ تكفى ..
ـ ياطويل العمر تكفى !
كانت اللهجه عنيفه ..أو مخيفه !
والوطن ملفى .. ومنفى !
**************************
ألملم أوراقي .. شهادة أخلاقي ..
يامسهّل .. يامسهّل
تعبت أعصابي .. واحساسي ترهّل
وابقى اتشرد لوحدي ..
انبش أحزان الشوارع ..
أهذي بـ اشعاري وأغنـّي ..
مـ الطفش ..مـ الهم ..
من قهري بـ اغنـّي !
أرمي بالغتره .. وأرفـّع فـ المسجل !
وعود (أبو ساره ) يدندن ..
يغزل أوجاعي على أوتار صوته ..
كان يعزف ..كان ينـزف :.
((يامراكب من سهر .. يا مجاديف القدر ..
يا بحر موجه عبوس .. فيك ..اتعبني السفر
وما على الدنيا عتب .. كل مافيها أماني !))
وآنا أفرفر فـ الشوارع ..
ألبس الغتره .. وأكشخ ..
وفـ الاشاره .. جنبي واحد
شكله بطران ومطخطخ !
كان (أبو نوره ) يغني ..
عن هموم تشجّرت ..
من عشب دمي ..
-الله ماأنظف هدومك ..
والله ماأسخف همومك !
كلها .. ما تجي قطرة ألم ..
في بحر هـمّي !
وآنا ألفلف ..كنت الفْ .. لفْ !
وتين أشجار التساؤل ..
راويٍ من دمع عيـنـي :-
- من يكمّل نص ديـنـي ؟!
- من يسدد بعض ديــنـي ؟!
- من يعيد النبض في قلبي المهشّم ؟!
- من يسمعني رنين (الموتورلا)؟!
- من يساعدني بأقساط (الكورلا)؟!
وآنا اتـمتم :-

دنيا اسخف من سخيفه !
وآنا وظّفت المساكين الغلابه ..فـ القصائد !
ولا أبطال الروايات العظيمه ..
وما أحصّل أي وظيفه؟!
*********************
أجـمّع أحلامي ..أوزّع أرقـامي..
أشقـّق أوراقي .. وشهادة أخلاقي ..
ختم وصور .. وكلام
كذب ودجل .. وأوهام !
واخرج من الدنيا..
بالحزن فـ اعماقي ..
وملف علاقي !!
******************** انتهت القصيدة ولم تنته الأحلام!
هامش : - (*) مقطع من أغنيه للفنان عبادي الجوهر .
- (أبو سارة) :الفنان عبادي الجوهر .
-(أبونورة) :الفنان محمد عبده.