السلام عليكم ورحمة الله وبركاته
عندي مبلغ أربعين ألف
ماني عارفه وش أسوي فيها أحيان أقول أفتح محل أبو ريالين وأحيان أقول أفتح مكتبه وأخاف بكذا الحالات مايمشي المحل وأخسسسسر
سمعت إن الذهب رخيص فكرت أروح أشتري فيها ذهب وأرفعه بالدولاب وإذا إرتفع سعر الذهب أبيعه
وش رايكم ساعدوني الله يجزاكم جنات الفردوس

طيب اخوي عندي لك مجموعة افكار والله يكتب لك الي فيه الخير
الاول انك تفتح مكتب سداد بمكان يتواجد فيه عمال كثير
سداد فواتير كهرباء وقسايم وتحديث حافز وغيره
والثانيه انك تتاجر بالتمور
من بعد صلاة الفجر تتجه الى الحلقة وتشوف الدينات الجايه بالتمور وتزايد عليها واذا شريت تنزل الكراتين وانت واقف يجيك تاجر او شخص عادي متأخر عن الحراج ويشتري منك
والثالثه انك تشتري تكسي وتشتغل على نفسك
والرابعه انك تشتغل بالسيارات
والله يوفقك

المعذره اختي ماركزت انك بنت
ماهي مشكلة برضه فيه مشاريع نسائيه تقدرين تتاجرين بالعطورات ومستحضرات التجميل بين صديقاتك والشغل ماهو عيب بإذن الله فترة كذا ويكون لك محلك الخاص

السلام عليكم
بسدح لك مشروع بحدود فلوسك وفيه ذهب
تفتحين مركز خدمات طالب جنب كلية بنات او
مجمع تعليمي اول شي مايكلف
والمساحه مو مهمه
وفيه ذهب مشاء الله
بس يبيلك عامل ذكي وينفع فيه مصري بصي حضرتك
اول شي عربي مايتعبك في الغه ثاني شي راح يفهم الفكره
من ملخصات ومحضرات وكذا

__________________
"لله دُر أمي إذا ابتسمت
تهادت جروح قلبي والتئمت"

السلام عليكم

اختي نصيحة لك مادام عندك هذا المبلغ لاتحاول تسوين شي موجود بكثرة ونسبة الخسارة فيه عالية وأنا لاحظت كثير من الناس اذا توفر عندة مبلغ راح يفكر في بقالة أو مكتبة ووو .. على العموم ممكن تنجح هالافكار بس بامكانك تبتكرين أو تدخيل مجال سوق تقل فيه المنافسة وفيه طلب عالي وخطورة أقل

لذلك مادام عندك هالمبلغ لاتفتحين فيه محل أو تفكرين بمشاريع دخل دائم خلي لعبتك على الصفقات يعني تشترين منتج معين جملة ويكون عليه طلب كبير وتبيعينة سواء جملة أو مفرق عن طريق الانترنت

وأنا عندي لك عدة أفكار ومنتجات تتاجرين فيها وارباحها عاليه جدا جدا اذا وفقك الله ثم احسنتي تسويقها وتصريفها
وبما انك بنت ركزي على المجال النسائي فهو من افضل الأسواق نشاطا والحريم اذا شافو شي مميز وجميل بيشترون وبيدفعون

على العموم أنا راح ارسلك عدة منتحات تقدرين تتاجرين فيها على الخاص وربي يوفقك ان شاء الله

في أمان الله

ادرسي منطقتك وشوفي وش تحتاج المنطقه وشوفي ميولك واتمنى لك التوفيق والله يرزقك

وعليكم السلام ورحمة الله وبركاته

الله يوفقك اختي ويرزقك الخيرة في أمرك ويباركلك بعافيتك ومالك

الموضوع يحتاج نعرف مهاراتك قدرتك على الخروج ، وقتك ، خبراتك ... الخ

لأن مو كل مشروع ممكن كل شخص ينجح فيه