السلام عليكم

انا بقدم على ريادة واخذ تمويل منهم وزي منتم عارفين كحد اقصى 300 ألف
المهم لقيت موقع حلو وابغى رايكم فيه ومشورتكم لعل هناك اشياء ما انتبهت لها او لعل هناك افكار احلى من افكاري لقلة خبرتي في التجارة

الموقع هو بالكورنيش .. فيه فندق كبير مشهور وعليه نزلاء ماشاء الله كثير عند البحر
وجنب الفندق فيه بقالة ومطعم بروست ومحل كافيه يبيع مشروبات ساخنة
بس المحل مافيه جلسات لا داخلية ولا خارجية يعني الي بيطلب يطلب طلبات سفري
والمحل صغير

بنفس الوقت بنفس المبنى الي فيه البقالة والمطعم والكافيه فيه محل فاضي
وهو المحل الأكبر مقارنة بالمطعم والبقالة يعني كبرهم مرتين يعني كانهم محلين ملتصقين فبعض
فكرت افتحلي محل كوفي شوب هنا وجلسات داخلية وخارجية والقسم الثاني من المحل
صالة ترفيه صغيرة بلياردو هوكي فرفيرة بلاي ستيشن شاشة كبيرة لمتابعة المباريات

ايش رايكم بالفكرة والمشروع والموقع ؟ للعلم ان ايجار المحل 50 ألف سنوياً ؟ أحسو غالي
وبنفس الوقت جنبي يكون محل الكافيه الصغير هذا هل راح يشكل منافسة لي ؟ مع انو زي ماقلت لكم محل صغير ومافيه جلسات لا داخلية ولا خارجية ؟

وكم تتوقعون الدخل الشهري من فكرة مشروعي بهذا الموقع ؟ بشكل تقريبا واقل الايمان ؟

هل فيه مشروع او فكرة اخرى بالموقع هذا غير الكوفي شوب وتكون افضل من الكوفي بمية مرة ؟ مع اني فكرت كثير وما اعتقد فيه ؟

حاجة اخيرة كوني بنت انا خايفة من تلاعب الدخل الي يجي للمحل واخاف اخسر .. وماعندي احد يروح يسوي جرد للمحل بشكل يومي او اسبوعي مدري اذا عندكم افكار للجرد وهل ينفع الجرد الالكتروني بكوفي شوب ؟ افكر احط بزاوية المحل كاميرا مراقبة واراقبها فبيتي ايش رايكم ؟

فصفصو معايا الموضوع حتى ينجح ان شاء الله

ماشاءالله تبارك الله توكلي على الله اختي

الله يوفقك الموقع ممتاز و الفكرة متكامله ماشاء الله

اتصلت بصاحب العمارة وسالتو عن المحلين المتصلين فبعض كم اجارها
قال واحد محجوز وخلاص وراح نفصل المحلين
ياخسارة يعني المساحة تقلصت وصارت صغيرة
وقلي الاجار 40 الف سنوياً
فكرة الصالة الترفيهية داخل الكوفي شوب راحت

هل هي عمارة أم فندق

فكري فيما يحتاجه نزلاء الفندق أو العمارة وستحصلين على أفكار ممتازة

لو تخلينه محل إكسسوارات وبكل وربطات يعني شغلات نسائيه
روحي بالجمله وخذي
أشوفني يوم أسافر أحتاس مع بناتي وتلاقيني أدور محلات زي كذا

محل اكسسوارات بالموقع هذا مرة مو حلو

مغسلة ملابس ... أكثر شي يحتاجه النزلاء

وبرضه محل تحف وهدايا ...

اهنيك على اجتهادك بالتفكير بس فكري اكثر من جميع الزوايا

السلام عليكم

فكرتك للكوفي شوب مع صاله ترفيه للشباب جدا ممتازة خاصة انك قلتي انه امام الكورنيش لكن أي كورنيش بالضبط؟ جدة ولا الدمام ولا أي مدينة؟ لانك ذكرتيني ان المحل فتحتين وايجارة 50 ألف وعلى الكورنيش وأنا اشوف انه جدا رخيص على المواصفات الي قلتيها

وبالنسبة للفكرة جدا ممتازة اذا كان بنفس الموقع الي تقولين ونفس المواصفات لكن مادام المحل أصبح فتحة واحدة أعتقد يصعب وضع صاله ترفيه وراح تقتصرين على قهوة فقط والأمر مازال جيد لكن بوجود صاله ترفية بيكون افضل والمهم هو الدراسة الشاملة ووضع خطة كاملة لاتجاهات المشروع ووضع خطة لادراة الخطر اذا لاسمح الله ما مشى المشروع كيف تنقذينة وتحيينة مرة أخرى لأنه بطبيعة الحال اغلب المشاريع تقل ارباحها ومبيعاتها وعملها في السنة الاولى لذلك لازم يكون عندك خطة تدعم المشروع بالأضافة الى راس مال لادارة الخطر لحد مايوقف المشروع على رجلية ويستقر

وبالنسبة لاقتراح الاخوان في محل اكسسوارات نسائية بعد ممتاز والبضاعة اطلبيها من الصين وان شاء الله اقدر اساعدك في ذلك بعد ماتستخيرين وتتوكلين على الله

وبالنسبة لمراقبة ومتابعة المحل هو الأفضل انك تزورين المحل بشكل يومي أو اسبوعي على الأقل لكن بما انك ماتقدرين بامكانك وضع كمرات مراقبة متصلة بالانترنت وتتابعينه في بيتك وحطي لافتة كبيرة فيها رقمك لأي شكوى عشان تكونين على دراية بكل شي يحصل للعميل وخلي طباعة الفواتير اجباري من العامل ويعطيها العميل بعد الدفع عشان يكون عندك نسخة ومايقدر يسرقك وضعي لافتة موجهة للعميل ومكتوب عليها اذا لم تحصل على الفاتورة سيكون حسابك مجانا عشان اذا ماطبع العامل الفاتورة مايقدر يسرقك لأن العميل ماراح يدفع..

اتمنى أكون افدتك وبالتوفيق