السلام عليكم ورحمة الله وبركاته

حبايبي يشهد علي الله اني احبكم كلكم في الله ومراح اكتب هالموضوع الى من الهموم الي فيني انا واخواني واخواتي وماعندي بعد الله الا انتم ماعرف استشير من ابي نصيحتكم لي تكفوووون والله اني في حاله مايعلم بها الا الله سبحانه

بصراحه مشاكلنا كل ابوها مع ابوي مدري وش اقول ادعي عليه يموت ويرحنى منه ومن شره ولا وش اسوي بالضبط
ابوي تعبنى في حياتنا كثير وبالذات هالايام يمكن لاني جالسه بالبيت وماقدرت اكمل جامعه طبعا ابوي الله منعم عليه لكن بخيل معنا مره وغير كذا شغال اهانات في امي لانها اجنبيه ومالها ضهر وسند ولا ماكان يعاملها بها الطريقه وغيرها مايصرف علينا ومو راضي يزوجني كل ماجاني واحد اهانه هو وابوه ااااه يابوي الله يسامحك بس تخيلوا قبل اسبوعين تقدم لي واحد مب قاصره شي واهانه واهان ابوه يوم جو يخطبوني وغير كذا يوم زعلت ناداني وقال انتي تعرفين الرجال وتكلمينه وش اسوي فيه
قلت له ليش يايبه تسوي فيني كذا لادراسه ولا عيشه مثل الناس ولا طلعات محرومه من كل شي وش تبي فيني مخليني عندك يقول انا ابي مصلحتك والله لو اقولكم ان الحمدلله الي تقدموا لي كثير وكلهم مافيهم شي ورجال والنعم فيهم ومن غير لايسال عنهم يرفضهم ليت المشكله هني وبس المشكله انه زمان كان يتحرش فيني وفي اختي الله حسيبه والان كاننا عايشين في مقبره مانطلع من البيت الا بالخش يقول وش تبغون تطلعون وانا تعبان وحارمنا من كل شي اوقات اتمنى لو ان ماعندي اب يهين امي يقول هي منتظرتني اموت عشان تاخذ ورثي مع انه متزوج ثنتين غيرها وزوجته الصغيرة جايب لها شغاله ويدور راحتها وانا واخواتي دايم يشك فينا محنا بنات منعني من دراستي مايبي يصرف علي واحد من اخواني مسجون الان وحكموا عليه 8سنوات والسبه اهماله واخوي الثاني جالس بالبيت ماكمل دراسته بقيله سنه ويخلص الثانويه والسبه انه كان يطلب سياره منه عطاه يوم واخذها منه راح عنده يبكي يقول يبه تكفى ابي السيارة اقل شي اروح للمدرسه واجي قاله انت منت برجال ماتستاهل الحين اتفقنا انا واخواني واخواتي نطلع من البيت ونرفع عليه قضيه اثبات نسب لان امي بعد ما اضافها في كرت العائله يعني قانونيا هي مب امي في اي وقت يقدر يسفرها وثاني شي بنرفع قضيه ولايه نبي ولايتنا على اخوي الكبير
لاني حاسه ان وضعنا عقب كذا راح يتغير كثير وش رياكم انتم وعلى فكره هذا بالمختصر عن ابوي لان في امور واجد ماقلتها وصعبه اني اقولها
انا مابي الا نصيحتكم ولا بنتحر وذنبي ع رقبتكم >>تمزح

ع فكره ابوي عمره 82 تدرون من زود مانكرره مسوين قروب انا واخواني الكبار مسمين القروب عيال معمر القذافي ولا الصحه النفسيه صرنا انا واخواتي نفسيه من قعدتنا في البيت

انتظر نصائحكم

السلام عليكم..

اسعد الله صباحك بالخير

مهمها تكلمنا واشتكينا وحكينا بيظل ابوك بالنهاية

لكن هذا مايعطيه حق انه يعاملكم بهالطريقة

لي تجربة بمثل وضعكم وعدت ولله الحمد
لازم بحكم عشرتكم معاه تكوني عارفه وش يرضيه ووش مايرضيه

يعني تبين منه شي تجيه من طريق الامور اللي ترضيه تحسسيه انه مالك غنى عنه انت وخواتك

معليش فيها تعب وصبر وتحمل لكن الطريق اللي يوديك للجنة وفيه شوك بتمشين عليه وتتحملين دامك عارفه نتيجيته الراحة والاستقرار

حاولي بكل الطرق فيما يرضي الله..ادعي بصلاتك وخاصه صلاة الفجر وقيام الليل..

صدقيني شيء مجرب ولله الحمد وواقع وصار

ربي يسعدك

اخوك احمد

ليه ترفعوا قضية عليه مهما كان ابوكم مشاكلكم لاطلعت برا ماراح احد يحترمكم الاابوك اصبروا عليه هذا شايب لاتهيننوه وبعدين بقولك شي الطلعه برا والروحه والجيه موكل شي ومملكتنا ترى مافيها اماكن غيرياشوارع ياسوق يامطعم اوبحر فليش تتعبوا انفسكم بوسوا راسه الامايلييين وترى سوالف ابوكم دليل على انه خرف فلاتلومونه كبيرسن وكثير اسر ضحايا المشاكل بسبب عدم الفهم لبعضهم بقولك كان فيه شايب كبروخرف وصارعنده حتى زهايمر وعياله مالاحظوا هالشي صاروا يتضايقون منه ولايقربون منه كنت اروح له يقولي شوفي عيالي وبناتي مايجلسون معي انا ابوهم وشوي يرجع ويخرف مات ذا الشايب الله يرحمه وامنيته عياله وبناته يجتمعون حواليه ماالقي لاتفهم ولاشي فاابوكم لاتضيعونه ولااشتكيتوه بتاكدوا ظنونه وبتخسروا بره ومادام قالك عارف مصلحتك بالزواج فلاتستعجلي اكيد له نظرته بالخطاب اللي يجوونه ابوك ثم ابوك وعليك بالصلاة اخرالليل والجئي لله سبحانه لاالمحاكم ولاالفضايح بتخليك تعيشي مرفوعة الراس فكري زين وانا اختك

قبل كل شيء هذا أبوكم وتاج رأسكم وعلى رأسكم ولكم في إسماعيل عليه السلام أسوة حسنة

ومايمنع إن الأب يغلط ولكن يجب عليكم تشغيل سورة البقرة والأفضل قراءتها يوميا وبصوت مسموع في البيت ثم الدخول والخروج من البيت بالأذكار الواردة ومسح أرضيات المنزل بماء وملح والصدقة اليومية الصباحية بمبلغ ثابت ثم الدعاء له في ظهر الغيب بإلحاح .

وصراحة تشغيل سورة البقرة يوميا وقراءتها أفضل ينتج عن ذلك نتائج مبهرة ورائعة في تغيير السلوك ومجرى الحياة . وبالتوفيق

الله يعينك يارب

بس انتبهي على سالفه التحرش حاولى ما تقعدون معه لحالك انتي واختك

في بالي سؤال للاباء الي يتحرشون في بناتهم وودي اعرف جوابة ..

هل الاب الي يتحرش في بنتة يكون محرم لها . ولا تتعامل معه معاملة الغريب . ؟؟

انتبهي من نقظة التحرش والله يحفظك ياارب : )

الله يفرج همك

هدي حالك اختي الغاليه
كلنا عندنا هموم ومشاكل

انا عندي حل واحد مع كل همومي واحزاني ..
وبعطيك الوصفه


اخر الليل + سجاده +انكسار ودموع بين يدي ربنا جل جلاله

وصدقيني لو اجتمعت الامه على ان تضرك بشي لم يكتبه لك الله لن يضروك ولن ينفعوك الا بشي كتبه الله
ادعي لوالدك بالهدايه ( فكم محروم تمنى لو ان احد والديه على قيد الحياه
وما تحتاجينه من ( دراسه او زواج هي شهوات دنيا والدنيا دار رحيل ولن يستقر بها احد

انا ما اقول تخلي عن حقك لا ( حاولي تكلمين ابوك او تدخلين طرف ثالث بينكم مثل شيخ المسجد او اي رجل كبير بسن
اخاف اذا رفعتوا عليه قضيه ابوك يهجركم او يدعي عليكم ... تصرون عاقين بوالدكم

اقول حسبي الله ونعم الوكيل على كل اب مايحترم عائلته و ابنائه ويهملهم بدون سبب

مافهمتوني محد منكم فهمني ياناس اقولكم يتحرش فينا انا واختي ومستخسر علي رجال يخطبني مايبي يزوجني الي تقولي صلي وادعي الله واصبري والله اني اصلح كل هالامور لكن الواحد لازم ياخذ بالاسباب لازم الواحد يسعى لو بجلس كذا مراح اتزوج ولاراح اكمل دراستي وامي ماستفادة شي هو مايصرف علينا والله انه يكسر خاطري اوقات بس هو مع احترامي له ما اعزنا ولا اعز امي لاعطاها جنسيه ولا بنا لها شي حتى ما اضافها في كرت العائله لازم نرفع القضيه ناخذ حق امي بكره لامات بعد عمرن طويل اي واحد يبي يضرنا يسفر امي لان قانونيا ماعندها عيال وابوي بعد هاجرها له سنه مايجيها ولا يعطينا مصروفن زين يقول كل وحده تشتغل ولو نشتغل انا واخواتي يقول انتم منتم زينات لاهو الي راضي يسترنا ولا هو الي راضي يساعدنا في دراستنا وش نسوي عجزت معه يانا في امورن كثير انتم ماتدرون عنها وصعب اني اقول كل شي ابوي تزوج ليما شبع وسفريات وفلوس والان لانه كبر وصار عاجز حارمنى نحن من كل شي حتر اعمامي يحتقرونا عشان امي اجنبيه وش نسوي والله عجزت يانااااااس اقل شي لاطلعنا نقدر عندنا وظائفنا نقعد بالشقه نعز امي ونعز نفوسنا اقسم بالله كاني قاعده بغابه مانيب وسط اهلي اذا ابوي يطالع في لحمي وش خلى للغريب
والي تقول ابوي خرف لا الي يخرف يبين عليه ابوي هذي سوالفه من زمان بس انا خايفه من شين واحد هل اذا رفعت عليه قضيه اثبات نسب وولايه اعتبر عااقه؟؟
هذا الي ابي اعرفه اليوم قلت لامي اني طرحت مشكلتنا بها المنتدى تدرون وش قالت
قالت هم معاشوا معنا ولا ذاقوا الي نحن ذقناه عشان كذا يقولون لك اصبري الاب وش واجبه مب يربي ويصرف ويستر بناته انا ماشفت شي من كل هالامور ماشفت شين واحد
لاتزعلون علي بس والله اني متضايقه جد وع فكره اذا نحن طلعنا من البيت دخلنا الشهري لايقل عن 9 الاف ويوصل 15 بس
ادري اني كثرت عليكم بس سامحوني مالي حد استشيره غيركم ابي ارتاااح
وربي يسعد كل الي رد علي