السلام عليكم ورحمة الله وبركاته ،،

أنا طالب في ثالث ثانوي ومحتار وين أروح بعد ما أتخرج وجاي استشيركم
التقديمات مابقى عليها الا القليل ولسا انا ماحددت وجهتي ولازم احددها من الحين
عشان استعد .

قدراتي ماخذ 78 والمدرسة نسبتي 96% والتحصيلي لسى ما اختبرته نختبره نهاية الترم
بس انا اتوقع درجتي فيه لو فشلت وماذاكرت زين اقل شي ماراح ينزل عن 74 .

متحير أروح كلية الضباط بعد الثانوي ( ياكلية الحرس يا الكلية الحربية ) .
ومتحير يا أروح الجامعة وأدخل تخصص هندسة حاسب أو أي تخصص غيره
وأصير مهندس أو اشتغل أي وظيفة ثانية مرموقة في أي قطاع غير العسكرية ،
أو أقدم على الكلية الامنية بعد الجامعة واصير ضابط في الامن

أنتم وش رايكم لو كنتوا مكاني وين بتروحون ووش بتختارون ؟

انا صراحة طموحي ودي أصير ضابط بس فيه ناس قالوا لي يحبسونك ثلاث سنين
وكأنك في سجن ويروح شبابك والدعوة مو سهلة ترى ، ولو رحت الحربية تعيينك
بيكون في منطقة غير منطقتك يعني مناطق مثل تبوك وخميس مشيط وغيرها
وينقلونك كل فترة ورواتبهم ضعيفة فالجيش وماتستقر وتقدر تشتري بيت ومن هالكلام .

انا فكرت بهالكلام وتقدرون تقولون بديت اقتنع

لكن بديت اقرا بالنت عن افضل الوظائف والتخصصات مثل المهندس والدكتور
لقيت ان الراتب المهندس الاساسي اول مايتوظف يا 9000 او يا 8000
والدكتور بعد راتبه الاساسي اول مايتوظف 9200

ياساتر مناهج صعبة وبالانجليزي ومواد علمية صعبة مرة ودراسة سنين بالجامعة ودكتور ومهندس وآخرتها الراتب الاساسي 8000 او 9000 ، كنت احسبه كاقل تقدير اول مايتوظف الاساسي 20000

صدمني هذا الشي وخلاني اشغل مخي وافكر اصير ضابط
لأن الضابط 3 سنين تدريبات ودراسة وبعدها اول ماتتوظف يكون راتبك الاساسي 8000
وبرتبة ملازم وعمري 22 سنة ، اما المهندس صح نفس راتبي تقريبًا لكنه يخلص دراسه
وعمره 25 والدكتور يخلص وعمره 27 اتوقع ، يعني انا ذاك الوقت لو تخرج المهندس او الدكتور
اكون قد ترقيت وقد زاد راتبي وأعتبر افضل منهم بالراتب لاني ترقيت ولي فترة متوظف
اما هم لا توهم توظفوا

صح ولا انا فاهم الطبخة غلط

انتظر ردكم وياليت تنصحوني وتوضحون لي بالفعل
وكل الي بيرد علي بدعي له والله يوفقنا كلنا بالي نتمناه

والله شف انت اختار الي يمليه عليك عقلك ماعليك من كلام الناس شف انت الشيء الي تبيه وترتاح له سوه اسحب على كلام الناس صحيح خذ رايهم بس في الاول والاخير شف الي يمليه عليك عقلك
وبيني وبينك كلية الحرس الي هي كلية الملك خالد معروفه من افضل الكليات والدراسة فيها جميله جدا لكن يبي لك واسطه عشان تدخلها ويمكن تتوفق وتخشها بدون واسطة بنسبتك وصدقني خذها مني سو الي تشوف انك تبيه ماعليك من كلام الناس والله يوفقك يارب

الله يوفقك اخوي ويكتب لك الخير حيثما كآن

انا اقولك اختار اللي تتمناها وتحس انك بترتاح فيهآ ...

صراحة ماعرف عن هالامور اللي تكلمت عنها لكـن اغلب الوظايف اللي اعرفها راتبها مايتعدا 8000 كبداية توظيف

اذا نفسك تصيرر ضابط حقق هدفك ولو واجهتك بعض الصعوبات في البداية .. المهم النهاية بتكون مرتاح وسعيد باللي انجزتـة .. خلك من اللي يقول حبس ومدري ايش .. السنوات تركض ركض ماهي زي الاول

3 س بتروح بغمضة عين ..واول مرة اعرف انه حبس 3 س اعرف كانهااا 45 يوم تكون تدريبات مكثفة وقلق بس بتنقضي بلمح البصر >>> يمكن معلوماتي قدددديمة ومغبرة




استخير وربي بيوفقك بإذن الله ..

والله نصيحه لاتحسب الموضوع بهالطريقه ..

الرواتب لا تغريك ..

أهم شي الراحه ..

لأني استغرب انك مطلع التدريس من الحسبه كلها ..

رغم انه راتب حلو و زياده ألف كل سنتين ..

ومدني واجازات دلع وتسافر على كيفكك ..

على العموم ..

استخير .. وخلك طالب عالم ..

خش الجامعه اطلق تخصص تهواهـ ..

ومستقبل التخصصات عند الله ..


ووووووووموفق

جزاكم الله خير ،،
و انتظر المزيد من الآراء والمشورة من الأعضاء الآخرين أيضًا

بالتوفيق

والله وانا أخوك اللي يرتاح له قلبك .. أستخير وتوكل على الله ، وفعلا الان تعيين المدرسين صاير ياخذ مده أطول
مما نتوقع ، او اذا ماكان مطول يطشونك أخر الدنيا .. مانقول غير الحمدالله على كل حال