خايف اروح اختبر واغطس واموت

السلام عليكم
ما أخفي عليكم سعدت بخبر التسجيل في الدفاع المدني .
وجاك يا مهنا ما تمنى
أنا في الحقيقة صاحب فزعات وأخاطر بنفسي (طبعاً بمعرفة ودراية) في السيول والبيار وعندي خبرة في ذلك لكوني مزارعجي وحريص على توفر الماء بالمزرعة سواء بحفر البيار وتشغيل المواطير ومشاكلها أو إذا سال الوادي تشوفني أناقز من عقم إلى جرف فرحان بالسيل . ولي خبره في قطع الوادي أثناء السيل طبعاً سباحة وكذلك عندي خبرة في نزول البيار والغطس لقاع البير علشان أصلح الغطاس .
يعني بالمختصر هذه طبيعة مشاكلنا وحوادثنا . يا تكون في بير أو سيل بوادي أو غدير . وكل هذي خذ مني ولد يعجبك . أما شغلت مسبح ما مسبح ما نعرفها ولا عندنا مسابح قريب مثل اللي نسمع عنها .

وأهم شغله في النزول للبيار والوديان هي القلب الصامل . وأنا أراهن اللي بيتقدمون على الدفاع المدني ومعهم شهادات لو تنزله في سيل أو بير بيقولك ( مفشلنك مفشلنك ) أنا شهادتي من مسبح والوظيفة ضمناها ؟؟

أشيروا علي ؟؟؟؟ إذا الدعوى على الاختبار أنا مستعد وأتحدى أن أشيل شخص وأقف به في وسط الماء .
وإلا الدعوى ورقة شهادة .. الله لا يعودها .

هو أنت الحوت اللي يقولون ؟
والله ما أفكك تكفى لا تنساني ... بتواصل معك عسى تتوسط لي عند الدفاع المدني
والله ثم والله لأبيض وجهك .. وأبشر بعزك
تراني في حاجة الوظيفة. أقل ما فيها أوفي حق شيباني علي
وعلى كل حال مشكور بذكرك الطيب