يا جماعة

نمسك المشكلة جزء جزء

وبطرح عليكم وجهة نظري ...

أساس المشكلة في التعليم في هذا البلد ... ليه ما يكون فيه تعليم قاسي جدا في البدايه مثل الدول العربية الثانية عشان الشباب يطلعون محترمين شيء اسمه تعبت وانا صغير في الدراسه واستفدت كثير .. حتى الجامعات السعودية قمة في الفشل واثبتت الاحصاءات هذا الكلام ... والله ان السعودي يتخرج من الجامعه وثلاث ارباع التخصص لا يفقه فيه شيء ...

الحين في المدارس والله اعرف شباب لهم اخوان صغار ما يدرسون وياخذون فوق 90% .. على أي أساس ؟؟؟؟ في خلل في التعليم عندنا وهذا أثر بشكل كبير على عزيمة الشباب على الكفاح

ثاني شيء في وجهة نظري القطاع الحكومي له دور كبير في مسألة البطالة الحين الولد يطلع على الدنيا يشوف ابوه يرجع الساعه 2 الظهر ويكبسها نومه للمغرب وكل وظيفته جالس على المكتب وقهوة وتمر وسواليف مع زملاءه ورواتبه مرتفعه جدا ... هذا موضوع كبير وتناقشت فيه مع احد الموظفين الحكوميين وهو الي اقنعني بهذا الكلام ... حتى لو الولد جا لأبوه وقاله لقيت وظيفه يسأله كم الراتب وكيف طبيعة الدوام .. ولا حتى جا على باله يسأل هو في مجال تخصصك ولا لا ...

مشكلة الاتكالية في مجتمعنا تعودنا عليها ... اعرف كثييييير شباب لو اكشفلك ورقي ما خلصنا من الكلام ... دايم جالس في المكتب ويرمي الشغل على الاجنبي يخلصه وهو ماغير يطلع قبل لا ينتهي الدوام ودوران وهجوله في الشوارع ويا زملاءه (السعوديين) والله لو اقولك انهم مهندسين يمكن ما تصدق ..

كان لي صديق (فلسطيني) كان شغال في ارامكو السعوديه في القسم الاعلامي وكل السعوديين الي معاه كانو يرمو عليه الشغل ويشتغل مثل الـ (...) ويوم جات السعودة طلعوه والله قدامي يتصلو عليه زملاءه (السعوديين) يقولوله والله يابو فلان سببت لنا مشكله يوم طلعت من وين نجيب واحد يشتغل 5% بس من الي كنت تشتغله ..

وياكثر القصص الي تخليك تحس ان السعوديه لو طلعت الاجانب بتخرب خراب اليم

مشكله كبيره الي هي تطبيق نظام السعوده في المملكة ... وقالوها كثير من طحاطيح البلد ... المملكة ليس دولة مؤسسات وشركات ... المملكة دولة افراد للأسف واتمنى انك تفهم وش اقصد بهالكلمه

ليه ما يتم تنظيف عقول الشباب وإعادة برمجتها من اول وجديد وتهيأتها للعمل بالقطاع الخاص تهيئة تربوية قبل لا تكون تهيئة تعليمية ؟؟؟

مشكلة العادات والتقاليد الي مادري من وين ورثناها مع ان اجدادنا ما كانو كذا ابدا في الماضي ... زمان على كلام جدي الله يرحمه كانو يشتغلون عمال في الدول الثانيه وعلى سبيل المثال (فلسطين) الي هي مادري ليه ما تعجب الكثيرين .. وكانو يحرثون الأرض عشان لقمة العيش ... لكن في جيلنا وجيل اباءنا صار عكس الكلام مادري هل السبب اننا اعتمدنا على ثروة النفط مثلا وضمنا ان نوافير النفط تدوم لنا لآخر يوم في الدنيا .. تعال بسألك يا مواطن .. هل تقبل تزوج بنتك او اختك (لمواطن) يشتغل عامل او يشتغل نجار او حداد او في تنظيف الحمامات الي تقول عليها ؟ لا تكذب على نفسك ماراح توافق وخذها مني ... ولا انت رح تقبل على نفسك تشتغل في هذي الوظايف لانك طلعت على الدنيا ومن صغرك ماشفت مواطن مثلك يشتغلها ابد ... اخوي فاقد الشيء لا يعطيه

اذكر على سبيل المثال كنت اشتغل في احدى الشركات شغل بارت تايم في تصميم موقع وجا واحد شباب يبي يتوظف سائق ... بعد ما طلع من المقابله جاني اخصائي التوظيف يقولي بالله وش فيه هذا المريض ؟ قلت خير ؟ قالي الحين هذا جاي واول ما دخل علي قالي تكفى ابي وظيفه عندكم لاني ابو عيال وابي اتوظف بأي طريقه وانا معاي رخصه عمومي .. قاله اخصائي التوظيف خلاص ابشر يابو العيال بس ثواني ودق على مدير المبيعات وسأله في وظيفه سائق شاغره عندك قاله ايه في حي النسيم عندنا نقص بالموزعين ... (حي النسيم بالرياض) قاله اخصائي التوظيف خلاص برسلك واحد وظفه وتوصى فيه .. قاله شف لقيت لك وظيفه وراتبها 3000 ريال غير العموله على التوزيع ومعاك واحد (هندي) وظيفته ينزل البضاعه على المحلات وانت بس سائق مالك دخل يعني مرتاح .. قاله حلو انا مستعد من اليوم .. قاله الاخصائي بتستلم حي النسيم وتعال من بكره .. ابو العيال ما عجبه الكلام قاله غيرلي المنطقه .. سأله ليه ... قاله ياخي انا ساكن في النسيم ومابي احد يشوفني من جيراني اشتغل سواق شفلي اي مكان ثاني .. الاخصائي وي ويخمعه بالدباسه .. يعني يابو العيال انت محتاج الوظيفه وانعرضت عليك براتب خيالي وما عجبك عشان ما يتكلمون عليك عيال حارتك ؟

وكثير مشاكل لو نجلس ونناقشها رح نتوصل لحلول جذريه تفيدك وتفيدني وتفيد الدولة ...


تحياتي

احييك عاطل رسمي على ردك والله لما اشوف انو احد بتكلم بمنطق العقل افرح

تحياتي للكل

يرجال الحمدلله ع كل حال بس انا قاهريني البجلاديشية ودك من يردهم لديارهم وصخين ونذليين ..

..

بصراحه في اراء تدل على نضج تفكير اصحابها و على عقليتهم الراجحه

مثل الاخ / سعودي و افتخر , / ماجستير و عاطل و/ شاعر بلا مشاعر

اما و جهت نظري

فاقول ... شوفو اول شي للعيوب الي فينا

تعليم زفت / خبره زفت / شهاده زفت الخ

شي طبيعي ان الشخص صاحب الخبره و الشهاده و التعليم ياخذ و ظيفه احسن من غيره

و حتى لو لم يكون سعودي

لانه هوه فرض نفسه بتعليمه و حتى اخلاقك ( و الانسان هوه الي يختار مكانه )

بعدين ايش النظره هذي ... نظره حاقده و حسوده للغير

متى بنتطور ونفهم ... ان تنوع الجنسيات في اي بلد كان

هوة دليل و اضح على ازدهراها و رقيها الاقتصادي و العمراني

العالم الان اصبح قريه صغيره ... فشي طبيعي تجد التنوع

و الله قال ( و جعلناكم شعوباً و قبائل لتعارفو ان اكرمكم عند الله اتقاكم )

( و امشو في مناكبها و كلو من رزقه و اليه النشور )

يا ناس هذي ارزاق الله كاتبها

نعم و الف نعم احنا بحاجه للمقيمين الي طورو البلد و بنوها و عمروها

احنا بحاجه للمقيم ابتداء من العامل البسيط الى الموظف المرموق

لانه و بكل صراحه ما عندنا كفائة الأجنبي ... صحيح في شباب سعودي عنده كفائه

بس هذول عددهم قليل و يمكن معدودين بالاصابع

و خلو عنكم الحقد و الحسد و العنصريه الي بدمرنا