شباب بنات كيف حالكم ان شاء الله طيبين <<

أنا جتني رسالة من شركة سمارت لنك وقالوا لي عندك مقابلة لوظيفة خدمة عملاء تبع ماكدونالدز في مقر شركة سمارت لنك اللي في المروج عند أسواق الشمال.. طبعا الرسالة جتني يوم الأحد بالليل والمقابلة يوم الاثنين الظهر .. يعني مرررررة مافي وقت حتى أنك تستعد ,, المهم قلت مالي إلا أتوكل على الله وأروح لهم خصوصا أن شهادتي ثانوية يعني مو دايما بتجيني مثل هالفرصة .. وبما أني من سكان الخرج حركت بدري من الساعة 11 ..



لما وصلت سألتهم وين أروح قالوا مكتب التوظيف رحت مكتب التوظيف دقيت الباب وقلت لهم أنا عندي مقابلة اليوم قالوا وش اسمك وعطيتهم اسمي وقالوا انتظر الين يجي دورك ,, انتظرت حوالي ربع ساعة كذه وبعدين دخلت للمقابلة .. طبعا اللي سوالي المقابلة شخص سوري أو أردني بس الشهادة لله أنه شخص خلوق و قمة في الاحترام ,, بعد مارحب فيني وكذه سألني وين اشتغلت قبل كذه وجاوبته بأريحية وهو كان ياخذ ويعطي معي وحسيت أنه مرتاح و بعدين قال لي كلمني عن نفسك بالانجليزي .. طبعا أنا انجليزيتي ماعليها بس من يوم قلت اسمي بالانجليزي وتاريخ ولادتي ومكانها وشهادتي بعد كذا انربط لساني ماعرفت وش أقول ,, المهم هو يوم شافني سكت قال لي خلاص يعطيك العافية قلت له ترى انجليزيتي كويسة بس يمكن عشان مو مجهز شي أقوله وقلت له أن لغتي راح تتطور مع الوقت إذا اشتغلت ... قال لي أكيد أكيد وأصلا أنا مابي ناس مستواهم بروفشنال في الانجلش أبي ناس مستواهم عادي .. المهم في الأخير قال لي احنا خلال أسبوع بنسوي عدة مقابلات مع مرشحين وبعدها بيبين كل شي وقال لي خل السي في تبعك عندنا .. وشكرته وطلعت ..


المشكلة أني ماقدرت أعرف من وجهه أو من كلامه إذا هم قبلوني ولا لأ .. وخايف أنهم مايقبلوني لأن النفسية وقتها بتكون في الحضيض ,, ودي أني جلست زي ما أنا عاطل بدون أمل ولا أنه يجيني بصيص أمل بعدين يتحول إلى سراب .. لدرجة أني ماعلمت أحد أني رحت اساساً إلا أمي وأبوي بس لأني خايف ما أنقبل ويصير شكلي مو حلو ..

اللي أبيه منكم إذا في أحد سبق أنه مر بهالتجربة مع سمارت لنك تحديدا أنه يقول لي خلال كم ممكن يردون عليك وكم المدة اللي إذا مرت أقطع الأمل تماما لأني بصراحة مابي أعلق نفسي بشي ماراح يجي أصلا ..

وأطلب من كل من يمر على الموضوع يرد لو بكلمة أو دعوة ..


أسأل الله العظيم رب العرش العظيم أن يرزقني وإياكم من حيث لا نحتسب وأن يجعل لي ولكم من كل هم فرجاً ومن كل ضيق مخرجاً .. وآسف أني طولت

والله الرزق علي الله اذا الله كاتبها لك تبي تجيك
اسال الله ان الله يرزقك ماتتمنى
موفق

لا هنت ياخوي وأشكرك على المرور والرد ,, وفعلا الشي اللي كاتبه الله أنه من نصيبك بتاخذه , والله يوفقك لكل خير ويرزقك ماتتمنى يارب ..

ربي يوفقك ويسهل امرك

الله يرزقك ويوفقك

بالتوفيق

[align=center]
عادي واذا لاسمح الله ماجتك الوظيفه فكر انو خيرة ومو من نصيبك

بالعكس الشخص يسوي مقابلااات كثيررر ويتعلم منها ويتنبه ع اشياء يمكن ماكان منتبه لها

بالتووفيق والله يكتبلك آللي تتمنى آن شاءلله
[/align]

الله يرزقك بما تتمنى