السلام عليكم ورحمة الله وبركاتة



فيه حكمه من رجل كبير السن قالها لي فيما معناها ( ستعيشين شبابك كلّه في السهر والصخب والطيش والحب والكره وأجمل اللحظات .. لكنك ستدُركين تلاشيء ذلك حينما يكون عمرك في الستين سنه..في السبعين سنه..او حتى في الأربعين سنه .. وأنتي لم تدخرّي من نشاطك الشبابيّ لهذا العمر حينما تكونين أضعف )

قعدت أتسائل في نفسي صحيح فعلاً أحنا نمارس حياتنا كما لو أنها الحياة الي لازم نمُارسها ..
وضعك صعب .. مالقيتي وظيفه ..انطردتي من الشغل ..فشلتي في مشروعك ..ماأنخطبتي ..والديك متطلقين.. مانقصتي للوزن المثالي ..ظروفك الماديّه صعبه او او... الخ )
هذا كله وضع إجتماعي صوّر لك أن هذه هي الحياة كلها .. أنتي أخترتي الرضا التام عن الصوره هذي وأتخذتيها صوره لحياتك بالشكل الكامل !
طيب جربي تغيرين عدسه نظرتك للحياة !! أو جربي أنك تصورين منظر جميل أجمل من الي صورتيه لنفسك ..
تقولين لا مااقدر مستحيل تتغير الظروف ..انتي بعد مستحيل تغيرين ظروفك وصرتي أضعف منها بكثيير

...
أنا بهذا الموضوع البسيط راح أكتب أسباب مهمه تغيرلك حياتك وأفكارك .. وهذه الأسباب أستنتجتها من بعض المحاضرات الي سمعتها عن التنميه الذاتيه *

.
.
.

*الثقه بالله والتوكل على الله



أحنا نؤمن بالطاعات السلوكيّه لله تعالى ونادراً مانؤمن بداخلنا .. يعني بمعنى آخر أستغرب كثير من الي تصلي وتصوم وتقرا قرآن وبنفس الوقت لما يدق جوالها بالليل تقول يووه اكيد حادث.. لما تقدم اوراقها لشخص وشافت انه تأخر عليها بالرد قالت اكيد ماراح اتوظف .. يوووه انا مالي حظ .. انا مستحيل انجح .. انا مستحيل اسوي كذا الخ ..
طيب أيمانك وين راح ! وليش الكم الهائل من التشائم بنفسك ! ويمكن مايصير شي من الي تقولينه غير انك تقتلين نفسك بأفكارك السوداء
وعلى فكره دائماً الأفكار السلبيه تجيب كل شي سلبي .. يعني فكري انك بعد اسبوعين يمكن تسمنين بتلقين نفسك تدريجياً بنيتي هالصوره بداخل عقلك وبالتالي محفزاتك صارت ضعيفه وطاقتك صارت اضعف ..وسمنتي كم كيلو

تعالي أقولك ايش قال حبيبنا محمد صلى الله عليه وسلم
" لو أنكم توكلتم على الله حق توكله.. لرزقكم كما يرزق الطير.. تغدو خماصا وتروح بطانا "
ليش الرسول ذكر الطير عن باقي الحيوانات !
لأن الطير يطير من عشه لمسافات طوييله جداً مئات الكيلومترات ومع ذلك ماسفّط جناحه وقال لاا مانيب طاير ماراح القى اكل وراح اموت من الجوع .. بالعكس طار وهو متوكل على الله انه بيلاقي رزقه حتى لو انه قطع مسافات طويله

أحنا مانقطع مسافات طويله بس قاعدين وفالحين بالتشاؤم

قال صلى الله عليه وسلم ( لا عدوى ولا طيرة، ويعجبني الفأل الصالح: الكلمة الحسنة )

أسهل طريقه لأبعاد الأفكار المتشائمه :
1-مداومه الأستغفار يومياً بنيه التفاؤل
2-اذا فكرتي تفكير تشاؤمي تصدقي بمبلغ بسييط لو ريال لشخص أسوأ منك بظروفه
3-قراءه كتب النجاح او الأستماع لبعض قصص النجاح

.
.



* النيّه الصــافيّه

لو أنتي تعرفين وحده شكلياً فقط وجيت وقلت لك ترى هذي البنت خبيثه وفيها وفيها وفيها ..وانتي ماتعرفين البنت ابد بس خلاص رسمتي نيه داخلك تجاه البنت بأنها سيئه ولما يصير موقف لك مع البنت على طول راح تسيئين ظنك فيها لأنك رسمتي نيه سيئه
أحنا البشر كذا في تعاملنا مع الكائنات الكونيّه في هذا الكون .. في المشاكل في العلاقات العامه مع البشر في الظروف دائما نيتنا سيئه جداً ..ومستحيل نفكر بحسن ظن أن هذي مرحله بسيطه وتعدي ويجي الأفضل منها ..

أنتي اليوم بالليل مانويتي بداخلك أن بكرا راح يكون يومك مثل ماتبين ..فـ راح يكون يومك عكس ماتبين
أنتي بداخلك مانويتي تجاه شخص محدد نيه حسنه .. فأنتي تبنين بداخلك طاقه كامله سلبيه وبالتالي تجذبين كل نيه متوقعه سلبيه ..

النيّه مرتبطه بالتوكل على الله .وكلاهمُا مكملان لبعضهما ..
اذا قدرتي تسوين كونترول على تشائمك فتلقائياً نيتك بتتغير على كل الاشياء حولك ..

.
.
.

* اكتشاف الذات

توضيح مبسط دقائق لمعنى أكتشاف الذات ( هنا )

أكتشاف الذات هو عباره عن فائده وجودك..فائده وقتك ..فائده عمرك ..فائده حياتك ..فائده عطائك ..حتى فائده دراستك وعملك ودوامك ..
لو تتسائلين بداخلك عنك ..مين أنتي بالضبط ! ولو تلقين نظره على عمرك الي راح ايش الانجازات الي سويتيها !
هل أنتي تبين حياتك مثل ماتبين ..او تبين حياتك مثل ماتبي الحياه منك .. فيه فرق بين الشخص الي يعيش وقته وعمره على انه روتيني لازم يسوي كذا ..وفيه فرق بين الشخص الي يعيش عمره على تمعّن وترتيب خطواته للمستقبل

انا مااقصد تكونين مرتبه بكل شي ..وغرفتك مرتبه بعد ..ههههه لا أقصد عادي خلي غرفتك حوسه بس داخليّاً خليك مرتبه

أبسط طريقه لأكتشاف الذات :
1-تكتبين نقاط قوتك تكمن في ايش ..وتعملين على أبرازها بالشكل القوي
2-تفهمين ايش هي نقاط ضعفك وتؤمنين بداخلك أن تركيزك على الضعف بيخليك شخض ضعيف كثيراً
3-تفهمين سبب وجودك بالحياة ! هل هو فقط لتأديه دور العيش او الأستشعار بقيمه العيش
4-ايش الناقص فيك ! الي مايخليك تعيشين حياتك مثل ماتبين !
..
الجميع يعمل ليعيش بالحياة .. ما من أحد يتعلم كيف يحيا !





" لاتعيشين السنه هذي مثل السنه الي راحت - أنتي هنا تكررين نفسك مره وحده لكل يوم "


.
.
.

بالنهايه أتمنى أننا فعلاً نستشعر بقيمه الوجود وقيمه الأيمان والتوكل على الله اولاً ثم الايمان على داخلنا ثانياً ..
يعني حرام أحنا كمسلمين يصير داخلنا أحباط وتشاؤم وماعندنا محفزات وكل كلامنا سلبي وتحطيم .. والكفار احسن مننا

من لم ينوي الغنى ....سمح لنفسه بالفقر
من لم ينوي النجاح ...سمح لنفسه بالفشل


(إن يعلم الله في قلوبكم خيرا يؤتكم خيرا) سوره الأنفال



اعجبتني ونقلتها لكم من اجل التغيير

كلام .. مقنع جدا .. يعطيك العافيه ..|

https://www.btalah.com/t503652.html