" ثـووبـي كـفـن "

مارتن المطيري · #1 (**permalink**) 19-04-2013, 03:23 PM

ثوبي كفـن و ( ظلـم الأيـام ) تابـوت
دنياي سوّت بي كذا .. ليه مـدري !؟

كم لي وأنا مسافر على رحلة الموت
تعبت أدوّر ويـن .. محفـور قبـري

كل وجه أشوفه يبتسم وجه حانوت
وكل | المدامع | ما بكت غيـر عمـري !

كذب السنابل تسمعه شجرة التـوت
والحيّ عيا ما سمع ِ~ ويـش عـذري ؟

أنا الضياع اللي سكن جلد هلفـوت
وأنا الوحيد . . . اللـي ملاييـن كثـري

كنت الصغير اللي بنا برجه الحـوت
والحوت مات وبرجه ما ، عاد كبـري

أعوام / أشيل أبداخلي جمر مكتـوت
مليت أشيله داخل ( ضلـوع صـدري )

كل يوم أقول | الهم | لحظات ويفـوت !
واللي يفوت اليوم ولا فاد صبـري

تطري عليّ أشياء كثيره .. بلا صـوت
ودّم الغريب اللي إندفن معه سـري

منظر عذاب بـ / لوحة العين منحـوت
واللي يبرّوز لوحة ، الحـزن فكـري !

صرت أحسد المجنون وأقول مبخوت
عذره معه . . لو قـال قالـوا يهـذري

تعبت وحيلي أنهد والغصن محتوت
سنين وحملي يشتعل فوق ظهـري

يسقط من أيدين المسا أنسان مفتوت
وألمّلمّه وأنسى بعض منه وأسـري

أجزاء مني واضحه وجزء مبهـوت
يلقاني اللي يدرس بيـوت شعـري

ياموت تكفى أشتقتلك حيل يامـوت
ودي أضمك وأحضنك وسط قبـري