السلام عليكم ورحمه الله وبركاته الموضوع واضح من العنوان

بدخل بالموضوع ع طول ,

أنا ياخوان انظلمت بالدنيا كثير لاكن مثل اللي صار لي مع أبوي ما اتوقع انه قد صار مع احد

طبعاً الوالد رجل مقتدر ماديا وراتبه فوق 20 الف ريال شهرياً غير الاراضي اللي يمتلكها وتسوى الملاين
ابوي زوج 2 من اخواني اللي اكبر مني وانا الثالث وفوق الزواج بنى لكل واحد شقه يفصلها على كيفه
علما بأن اخواني موظفين وراتبهم ممتازه

قصتي ياخوان بداءت مع ابوي كان كل فتره يجيني ويعرض علي فكره الزواج وانا وقتها مراهق
وتفكيري على قد عقلي وكنت ارفض بجحه اني باقي صغير على مسؤليه الزواج والحياه الزوجيه

بعد ماتجاوزت 23 طلبت ابوي يزوجني لاسباب كثثيره من ضمنها ان كل اخوياي غزلنجيه وانا ماكان لي
بالطريق اللي هم ماشين عليه لاني اخاف الله سبحانه

انا وسيم ولله الحمد واكثر من مره اتعرض لمواقف محرجه مع بنات واتجنبهم اخوياي كانو يحسبوني خجول وقلبي ضعيف ما اقدر اغازل وكذا
لاكن انا عندي جراءه مايملكها احد فيهم وتبين بمجالس الرجال مو بالاسواق

طبعاً انا صبرت ما فيه الكفايه وخصوصا ها الايام صارو بنات ها اليومين الله يهديهم فتنه حتى للمطوع

رحت للوالد الله يطول بعمره وطلبته انه يزوجني ووافق وقالي ابشر باحسن زواج وانا من زود الفرحه
صرت خادم عن الوالد اي شي يحتاجه ما اقصر معه

طبعا أنا سيده على طول عند الوالده ابيها تشوف لي بنت الحلال ولله الحمد حصلت الوالده واحده
فيها كل اللي أبيه

واروح للوالد واقله مشينا نخطب ولا ردني قال مشينا يوم وصلنا وقلطنا الرجال وبعد القهوه والشاهي دخل ابوي بالموضوع بدون نفس لدرجه اننا ماجلسنا عندهم اكثر من 10 دقائق حتى ابتسامه ما ابتسم
بعد ماطلعنا انا مصدوم ولا قلت شي قلت يمكن السكر مرتفع عنده
بعدها بيومين اتفاجا بالرفض وانا لله الحمد صلواتي بالمسجد
ولا اطلع كثير المهم بعدها با اسبوع قابلت واحد يعرف اللي خطبنا من عنده قالي اياها بكل صراحه وبوسط وجههي بعد ما نشبت له قال ابوك يبي يسكتك ماخذني عند الرجال وداخل ضيف ببيته
بنيه الخطبه واخراتها يبي يسكتني شكيت بكلام الرجال

كلمت الوالد انا قالي كذاب ماعليك انا اجيب لك اللي احسن منهم قلت انشالله انها خيره
والخطبه يبي لها طوله بال هذا زواج ماهو لعبه

بعدها الوالده شاورت بواحده ثانيه وقلت توكلو على الله ونفس الموال يصير

المره الثالثه رحت للوالد وقلت صارحني وانا راضي بشورك قالي انا شايل هم السكن وين تسكن
قلت هي مجرد خطبه والله يفرجها انشالله رد علي وقال رد ماتوقعته منه
قال انا بطلع امك بالملحق واسكنك محلها الملحق غرفتين فقط رفضت انا ها الشي وقلت انا انشالله لاتخرجت بتوظف واستاجر اهم ماعلي راحه ابوي ماعندي مشكله باللي يقوله
رد علي مافي زواج انا بصراحه ماحب اكثر مع ابوي عنده سكر ولا ابيه يرتفع بسببي
طلعت وقت ماسمعو اخواني بالخبر كلمو الوالد واللي عنده اخوان اكبر منه يعرف ان كلمتهم اقوى من كلمته واقنعوه ووافق بشرط ان واحد من اخواني يطلع
من البيت واسكن بداله انا رفضت لاكن اخوي اجبرني وقال انا موظف واقدر امشي اموري
واتفاجا مره ثانيه نخطب ويشرهني عند الناس ونطلع بدون وجه مافي احد يعرفني الا ودرى بكل شي
بحثت بالموضوع اللين طلع شيب بوجهي وراسي من كثر التفكير وزني وقتها كان 70
من كثر التفكير والهم اللي جاني نزل وزني باسبوعين ل 50 كيلو كل من شافني قال انت هموم الدنيا كلها تجمعت عليك النوم ماكنت اقدر انام لدرجه وصلت فيني اطقها 4 حبات بندول نايت
ولافي امل اخمد الف فكره تجي براسي تصادم افكار كنت ابي اعرف وش السبب لدرجه اني وسوست قمت اشك بنفسي اني قصرت بحق ابوي بيوم وماخذ بخاطره لحد اليوم بس ماحصلت ولاسبب يمنع ابوي من انه يزوجني قلت يمكن انا فيني عيب او فيني نقص وابوي مايبيني اعرف
ماني مصدق تعامل ابوي فجاءه معي كذا رحت المستشفى فحوصات من الراس للرجل اقل للدكتور
فيني شي يقول حصان مافيك الا العافيه انا رياضي حق كوره درجه اولى والفحوصات طلعت اني سليم وجسنيا وبدنيا وعقلياً وكل شي شككني بنفسي الوالد الله يهديه
ياخوان تخيلو عيال عمي وعيال خالي واخوياي بالجامعه مافيهم احد عزوبي بعضهم حق بنات
وبعضهم خاطب وبعضهم متزوج وبعضهم اصغر مني وحالتهم الماديه تمشي الحال
فرق بيننا وبينهم واحصل كل واحد ابوه فازع معه وابوه بنفسه يدور سلف اخر الشهر
الا انا ابوي محجر ورافض ها الشي

ماخليت احد الا ودخلته عند الوالد عشان يقنعه يزوجني عمي اخو ابوي كلمه ووافق
اي واحد يروح يكلمه يوافق اليوم الثاني رايه يتغير

واللي يقهرني الوالد زوج 3 من خواتي كل واحده متزوجه واحد ماعنده وظيفه ودخله الشهري محدود وكل واحد فيهم مديون


االوالد عنده خير ونعمه يقدر يزوجني ويزوج
عيالي وعيال عيالي وانا كنت ابي اخطب فقط ابيه بس يبيض وجهي لاجيت اخطب
جلسنا على ها الموال فتره شهر تقريباً عرفت الوالد مايبي يزوجني بسبب البخل والله اعلم
انا رجل والرجل مايعيبه شي دام نيه الزواج موجوده الله بيسرها عندي خذيت سياره اقساط
وببيعها كاش المقصد انها تكون مهر والزواج قرض الزواج يكفي
والنيه اخطب بدون الوالد اتفاجاً بأبوي يقولي هات المبلغ
اللي معك وانا بخليك معي شريك بارض واسهم وكذا , وانا اساعدك بالزواج ووعدني وكلامه كلام واحد جاد وقت ما استلم المبلغ بعدها باسبوع طلبته يخاويني نخطب رفض وبكل برود قالي
اعتمد على نفسك انا صحيح اني بار بابوي بس بعد ها الكلمه رفع ضغطي وطلعت اللي بقلبي
قلت له انت بخيل لدرجه انك حتى فلوس عيالك قمت تاخذها منهم زعل وطردني وانا حط فيني
مصايب الدنيا كلها ولا قلت له ولا شي ومجرد زله بسيطه طردني

طلعت من البيت وعرفت ان مالي غير الله سبحانه على بيت الله بمكه ولا املك ولا ريال
من سياره لسياره لحد ماوصلت صليت ركعتين ودعيت من قلبي جلست بمكه مايقارب 6 ساعات
لا اكل ولا شي بعد ماخصلت حسيت براحه وهمومي كانها خفت وبديت افكر بشي اكله وانا طفران
قلت مالي الا ابيع جوالي اللين تتيسر رحت ببيع الجوال واتفقت مع البايع على السعر والجوال وقتها كان 24 ساعه اتصال من الوالده قبل لا اقفل جاتني رساله وجاني فضول اشوف قريتها وكان موجود فيها بالحرف ابوك منوم بالمستشفى جاته جلطه انا انصدمت ولا جا ببالي انه من دعائي
بطلت ابيع الجوال ورجعت ع نفس الروحه من سياره لسياره بعد ما سوى الوالد العمليه وقام بالسلامه ماكمل اسبوع الا وهو راجع كل اسبوع يرجع المستشفى بسبب الام بالقلب
انا نسيت الزواج ونسيت كل شي بالي كله مع ابوي بعدها بفتره خف الوالد ورجع ع البيت

وبعد فتره سوى حادث بسياره توه مشتريها ماكملت اسبوع والسياره راحت تشليح بمبلغ تافه
ولا جاه ولا شي واقسم باللله العظيم ياخوان اللي ايمانه بالله ضعيف بيقول مستحيل هذا كان داخل السياره بعدها بفتره خسر بالاسهم مبلغ جامد

مرت الايام وسبحان اللي خلاني انسى اني دعيت عليه وجلست اسولف مع اخوي
وذكرني باللي صار مع ابوي من مزح ومن باب نصيحه انه يبيني اعتمد ع نفسي وكذا تعرفون ترقيع الاخو الكبير انا تذكرت اني دعيت عليه لاكن والله ماتوقعت ان اللي صار من دعائي وقت ماقلت لاخوي قال كلمه بسيطه الله يستجيب دعوه المظلوم حتى لو كان ايمانه ضعيف
من بعدها انا على استغفرت ودعيت الله يسامحني ومن بعد الاستغفار لحد اليوم والوالد كل يوم عن يوم اموره تتحسن والان ولله الحمد رجع ابوي اللي اعرفه قبل سالفه الزواج
طبعا انا وقت مادعيت ماكنت اعرف ان الدعاء على الاب حرام ولو ادري مابسطى ادعي على اللي
رباني مهما سوى يظل ابوي

الان مرت سنتين وانا مازلت عزوبي ومازلت متاثر باالموقف وشايل بقلبي لحد الان وكل فتره
يجي ببالي وهذي اول مره اقوله لعلى وعسى احصل حل او نصيحه منكم تفيدني وتساعدني
انا تخرجت من الجامعه ولله الحمد با امتياز وكانت مشاكلي سبب تفوقي
وانتظرت وظائف ولاجا شي وتوظفت بالقطاع الخاص براتب جيد نسبيا
ومازالات فكره الزاوج لحد الان ببالي اخاف اكلم الوالد بالموضوع يرجع يسوي فيني نفس قبل وخصوصا الان الوالد عنده سكر وقلب يعني اي شي ولا شي لاسمح الله مابي اكون سبب فيه
وبالنسبه لي اللي انا فيه الان افضل من المشاكل اللي كنت فيها قبل
فما ادري وش اسوي فكرت اروح اخطب لحالي بس صعبه وبنفس الوقت من وين مهر وكيف اتزوج
وفين اسكن فكرت اصبر اللين اتوظف بس اخواني يجيون ببالي وش معنى هم وانا لا اخواني زوجهم من اعمار 18 ع ايام الطيبين وانا قاعد بها دائم الاوسط بالعائله ماكلها خابور

اتمنى منكم الجديه بالرد والنصيحه ان وجدت
والمعذره على الموضوع الطويل بس حبيت اذكر التفاصيل للايضاح

شف يالغالي انت اعقد نية الزواج وصدقنى واقسم بالله انها راح تتيسر امورك وربي ربي ما يخلى احد والله يوفقك يارب ويررزقك من حيث لا تحتسب
طاعه الوالدين يا غالى من لنا غيرهم

يمكن ظروف ابوك اول غير ظروفها المادية الحين
فانت ادعي ربك بانه ييسر لك امورك وربي بيسهلها لك

,,

لا اله الا الله

بداية أسأل الله أن يرزقك
بنت الحلال اللي تسترك و تسر خاطرك
و صدقني أن ربي بيرزقك بنيتك الصادقة
بالستر و العفاف ,,
و أن يرزقك بر والديك من غير مشقة و لا تعب

والله قليل مثلك في الزمن هذا يفكر بالحلال و الحرام
الله المستعااان

صدقني يا أخوي أن نصف حل المشكلة الاعتراف بالمشكلة
و ما أظن أحد بشجاعتك راح يعترف بغلطته

أولا و أخيرا رزقك للحين ما حان موعده
لكن بنصحك أنك تخليك على نيتك الصالحة
و لا تيأس من رحمة الله
و أسأل الله أن يغنيك بحلاله عن حرامه
و يكفيك بفضله عمن سوااه

ممكن أن هذا الزواج شر لك في هذا الوقت
و ربي أخره لحكمة لا يعلمها الا هو سبحاانه

ما فيه أحن من الأب على أبنائه
و لا تحاول تدخل احد بينك و بين الوالد
انت كلمه و تودد له و حن عليه و اصبر

بإذن الله يا أخي الكريم بتنفرج عليك من حيث لا تحتسب

" من يحمل قلب و نية صافية مثلك ... هو بخير "


الله يبشرك باللي يسرك قريبا عاجلا
و عليك بالاستغفاار والله ترى العجب


بالتوفيق ,,

وعليكم السلام ورحمة الله وبركاته ..

أكثر من الدعاء والاستغفار ,وأدعية الأنبياء ..

قل : (ربي إني لما أنزلت إلي من خير فقير )
(ربنا هب لنا من أزواجنا وذرياتنا قرة أعين واجعلنا للمتقين إماما )
(لا إله إلا أنت سبحانك إني كنت من الظالمين )

كثير أدعية ,واستغفر ..
((فقلت اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا))

ألح بالدعاء وتحرا أوقات الإجابة ..

كرر حسبي الله لا إله إلا هو عليه توكلت وهو رب العرش العظيم ..كررها 7 مرات تكفيك ماأهمك _بإذن الله _ ..

خليك واثق بالله ..توكل على الله ثم خذ بالأسباب ..

الله إذا أحب عبدا ابتلاه ,والله يجعلنا من أحبابه ..شرف عظيم لنا لما يحبنا الله ..

وسع صدرك هذي دنيا بنفارقه ,وثق تماما رزقك إذا هو مكتوب لك بتآخذه بتآخذه _بإذن الله _ حتى لو اجتمعوا الناس عليك ..

تحرا أوقات الإجابة احمد الله ثم صلي على النبي وقل كل اللي بخاطرك ,وترا سهام الليل لاتخطي يعني ادع بالثلث الأخير من الليل ؛لأن الله _جلّ في علاه_ ينزل للسماء الدنيا ويقول _تبارك وتعالى _: هل من داع فاستجيب له ..

شف أحد من اللي يحبهم أبوك خالك ,عمك أي أحد لو إمام المسجد يتوسط لك عند أبوك ,وأنت حب راسه وققل له يبه أبي أعف نفسي عن الحرام ساعدني الله يسترك بالدنيا والآخرة..أنا ولدك وأنت أبوك الله لايخلينا من بعض ..شف وش الشيء اللي يحبه أبوك لو هدية بسيطة قبل تدخل عليه وقل له ,واسأل الله أن يلين قلبه ..

قل لأحد من اخوانك يكلمه لوحده وأنت مو معه ,وإذا مانفع لا تيأس قل لاخوانك يساعدونك بزواج ولا أي أحد ,ولا الجمعية الخيرية تبع تزويج الشباب مثل : مشروع بن باز ,أو خلي أحد من اخوانك وأعمامك يفزع لك يخطب معك ,وإذا سألوا وين أبوك ؟ قل تعبان .. >> اسأل الله أن الأمور ماتوصل للحد هذا ..

يارب يتيسر أمرك ,وينفرج كربك ,وتجي تبشرنا بزواجك ..

ثق تماما : ( ومن يتق الله يجعل له مخرجا , ويرزقه من حيث لايحتسب ) .



_ مما أعجبني :

يحسبوني خجول وقلبي ضعيف ما اقدر اغازل وكذا
لاكن انا عندي جراءه مايملكها احد فيهم وتبين بمجالس الرجال مو بالاسواق

>> كفو أشهد أنك رجال .. المراجل مو بالمغازل بل بصد نفسك عن الحرام مع قدرتك عليه ..

كفووو والله يا أخوي ..

اسأل الله أن يوفقك ,ويلين قلب أبوك ,ويبارك لك ..

لا تيأس لا تيأس ..

بشرنا وش يصير معك ..

ينقل للواحه