السلام عليكم الف مبروك للمقبولين بالأمن العام عندي نصايح مهمه وفي أشياء لازم تعرفها قبل ماتخش الدوره وتكون الأمور أمامك واضحة عشان ماتتفاجأ بعدين وتنصدم وتفكر الأمور بسيطه اهم النقاط الي لازم تعرفها :

_ لا تصدق الي يجيك ويقول بزوط انا بزوطت وانا سويت وانا مدري وشهو تراه مهايطي كذاب ولو يجيه مدرب يقول خلك ثابت لاتتحرك جلس يبكي وقال لاارغب هذا الي يجيك يهايط ويقول بزوط تلاقيه كان زي الدجاجة ماله صوت ولا حركة بس انه تخرج وطلع له ريش وصار يهايط ويقول شوفوني انا رجال .

_ في 45 راح تنكرف وراح تتعب وراح تحرق جلدك الشمس ولا راح يكون في وقت للراحه الى قليل يعني يمكن اخوك لو معك في الدوره يمكن اول اسبوع ماراح تشوفه راح يكون الليل اقصر من النهار لان الدوره في فصل الصيف وراح تصحى قبل الصلاه بساعه ونص على الاقل وتروح على المسجد تتجهز لاداء الفريضة الي ماراح يصحى بدري او يتأخر راح ينزل من سريره زحف طول السيب او يتروش بمويه بارده او راح يتسجل اسمه ويتصلب بعد الغداء في شمس القايلة ويمكن يتصلب في الليل قبل النوم يصير اسمه منزل طوابير اضافية .

_ بعد صلاة الفجر حصة الى الساعة 8 بعدها تروح الميز هروله تفطر 30 دقيقه وترجع من الميز على الميدان هروله وراح تبدأ الحصة الثانية الى الساعه تقريبا 10:30 بعدها تروح السكن تفتيش اداري ممنوع النوم راح يعقب المدرب وقايد السريه على شد السرير وراح تكون ثابت عند سريرك وراح يعقب حتى قايد المدينة على السكن يعني خلك ثابت لااحد يشوفك تتحرك او سريرك مو مرتب .

_ بعدها تنزل الميدان تكميل تاخذ لك ساعه في الشمس قبل الضهر وتروح تصلي بعد الصلاه تهرول على الميدان تكميل قبل الغدا ممكن تاخذ لك ساعه قبل الغدا في الشمس وتروح هروله على الميز بشكل منتظم خلك ثابت على الكرسي بدون صوت عشان تتغدا وتريح منت ناقص تنزل الميدان بعد الغدا وتصليبه الى العصر .

_ الصوت في الميز جريمه اذا في صوت اعرف ان الي في الميز راح يتصلبون بعد الغدا .

_ قبل صلاة العصر بساعه راح تروح تصلي العصر بعد العصر هروله على ا لميدان حصة المساء الى قبل المغرب بساعه .

_ بعد كذا تروح البوفيه تاخذ لك مويه عصير بسكوت قبل المغرب ب 30 دقيقه تكون في المسجد تصلي وتطلع على الميدان تشكل قبل العشا .

_ تتعشى قبل العشاء وتنصرف من الميز على صلاة العشاء تصلي العشاء وترجع تكميل حوالي ساعتين او اكثر وكذلك ممكن تسليم امانات الي اخوه يجيب له فلوس او ملابس او اي شيء بس انتبهو راح يتفتش كل شيء قبل مايوصلك يعني انتبه للاشياء الممنوعه.

_ الي عنده ملاحظه سوا كانت حركة في الثبوت او كلام في الميز او صحيان متأخر او عدم شد سرير او سجل اسمه مدرب على اي ملاحظه ماراح ينام بدري راح يتصلب على الاقل 45 بعد انصراف عموم الطلبة .

_ في شيء لازم تفهمه وانت في الدورة الهروله لازم تهرول في كل مكان حتى وانت طالع من دورة المياه على المسجد وكذلك الثبوت لازم تتعود عليه . حاول لاتنقطع عن الهروله حصة الصباح لانهم راح يبهذلونك لو انقطعت جزوات وتصليبه يعني راح تتعب .

_ الشمس لازم تصبر عليها وتتحمل وحاول تجيب لك ملابس داخليه كثيره اقل شيء 15 بدله داخليه و15 سروال داخلي و15 شراب ابيض و5 اسود على الاقل لان الملابس ماراح تتغسل راح ترميها على طول يعني بالكثير الملابس الداخليه يومين وترمي تطلع ريحتها من العرق .

_ الريحه الكريهه لازم تتعود عليها لان راح تطلع ريحتك وريحة اخوياك من العرق والشمس .

_ في اشاعات في الدوره عن نهاية 45 لازم تعرف انت وياه اك اقل شيء من 45 راح تأخذ منها 40 يوم على الأقل يعني اي واحد يقول سمعة من فلان وخالي عميد وجدي عقيد تراه كذاب 40 يوم على الأقل راح تأخذها وأنت تضحك .

_ الإشاعات اثناء الدوره كثيره جدا لاتسمع لها ولا تلقي لها بال لانك راح تتعب نفسيا .
لازم الأمور تكون قدامك واضحة ولاتفكر الدوره شيء سهل قبل ماتخش اعرف انك راح تنقطع عن الناس وراح تحس انك في غربه عن العالم وانك في سجن اصبر وادع ربك واختم القران اثناء الدوره وعرف ان من كان مع الله كان الله معه كن قريب من ربك وادع ربك في السجود وادع الله يسرها وتمر على خير .

الله يوفقكم جميع واحنا مرينا بااشياء اصعب مما تتخيلون انا مااحاول ان احطمكم او اخوفكم بس لازم قبل ماتخش تكون عارف وتكون الامور قدامك واضحه .