السلام عليكم
...........
بدون مقدمات ووجع راس .يشباب انا شاب عمري 26 سنة مليت من البطالة وحاب ابدا بمشروع يتوافق مع مهنتي المحببه .انا واعوذ بالله من كلمة انا اجد نفسي دائما في المطبخ حيث اتقن عمل انوع عديدة من الاصناف الشهية مما اصبح لدي شهرة كبيرة لدى الاقارب والجيران بطبخي وخاصة عمل الكبسات التى لاتاتي عزيمة لدينا او اقاربنا الا طلبوا ان اعمله لهم وهذا كله بفضل من الله .
واليوم بعد كل هذا الفراغ الذي اصابنا جاتنا فكرة عمل مشروع واعتقد ان جيد بل ممتاز جدااااا.

الفكرة :عمل محل متخصص في وجبات المكرونه والاسباغتي حيث بمكاني عمل اكثر من 10 اصناف للمكرونه والاسباغتي منها (مكرونه باللحم .مكرونه بالدجاج .باللحم المفروم .بالجبن .بالبيض.بالتونه.بالخضار .بالبشمل .مكرونه مشكل .اسباغتي ساده )وانا في طور تجربة المزيد من النكهات والتى اعمله فالبيت وهي وجبتي المفضلة .

لكن للاسف لايتوفر اي دعم مادي ابدا به تجارتي وتجربتي .وفوق ذالك مازلت متخوف من ردة الفعل .
#فالنهاية اتمنى دعمكم المعنوى وتشجيعكم لي حتى يزداد الطموح لدي وان شاء الله افتح حلمي بالقريب العاجل جدااا .

أسأل الله لك التوفيق
ابدا حتى لو تبدا بشيء بسيط مع الايام تكبر شوي شوي

عادي جداً أبدأ من مطبخ بيتكم

ولو يكون عندك سواق يوصل بعد كان أفضل و أتوقع بتشتهر بسرعةة

وبما أنك ممتازة في الكبسة على كلامك ليةة ما تسوي حق عزايم لأن الربح فيها كبير

وأهم شيء صور أكلك تصوير أحترافي و حطةة في لأعلانات و سعرها


ومشروووعك يأذن الله ناجح بما أنك بتبدأ من الصفر



(الله يوفقك و أن شاء يوم أطلب منك XD)

وانا اوافق اخوي شعارنا لاخلاق

ابدا من البيت الين يتوسع شغلك ويتوفر عندك راس مالي عشان تفتح محل

والله يوفقك يارب

خلك من ردة الفعل اذا كنت تقصد الاقارب ...

انا اشتغلت معلم شاورما بمطعمي وبخلطه رهيبه جدا .. الزباين كانوا ياتون لسببين .. المذاق الراااااااااائع .. وسعودي شغال معلم شاورما .. لدرجه ان بعض الزباين كانوا يضنون باني مجرد عامل بالمحل وعرضوا علي ان يفتحوا مطعم واشتغل فيه والنص بالنص

.. يعني اذا ما عندك راس مال لا تقول بتسلف .. شوف اي مطعم واطلب تشتغل عنده في صاج امام الجمهور ..
او استأجر زاويه بمطعم والمسأله كلها صاج ودولاب قزاز لعرض المكونات اللتي يريدها الزبون يعني كلها على بعضها خمسه الى عشرة الاف
واشتغل صح واكسب تجربه .. وشووووف ياحبيبي العروض اللي بتجيك

على فكره
اذا كنت من الدمام مستعد اوقف معك في البدايه .. لان مقابلة الجمهور صعبه ويكون فيها احراج في الاول .. لذلك مستعد اوقف معك .. واي شاب عنده نفس الطموحات مستعد اوقف معاه ...

ولا عزاااااااااااااء للنائمين

شوف لك مطعم من اصحاب المطاعم إلي متنوعه وكلمه ومتأكد راح يقبل فيك وبراتب عالي خصوصا إذا كنت مميز لعدة اسباب اولها كثير من المطاعم ينقصها الشيف المميز الثاني انك راح تكون سعودي بين اجانب فراح تخلي لك هيبه فالعماله راح تحس انه مراقبه فما راح تاخذ راحتها بالسرقه الشي الثالث والأهم ان أغلب المطاعم متورطه بالسعوده فراح يقبلوا فيك بسرعه وانصحك ما تتشرط بالبدايه وإذا شفت شغلك ماشي ابدأ بطرح شروطك بشكل مقبول فوائد الشغل بالمطعم بالنسبه لك كثير اولها تستفيد من خبرات الطباخين إلي حولك الثاني تعرف ايش الأشياء إلي تحبها الناس الثالث تعرف طريقة سير عمل المطاعم

ممكن اخي saadgu تراسلتي على الايميل وان شاء الله بتلقى الدعم لمشروعك
مخالف