السلام عليكم ورحمة الله وبركاته

يا شباب كنت بالشركه مرتاح راتبي صافي 3030 بعد خصم التامينات مدعوم بالموارد الدعم الثاني والاخير
غداي وفطوري جاهز كل يوم من الشركه ودوام واحد من 6 الى 3
وبالحسا عند اهلي بس عيبه المشوار 20 كيلو على طريق الرياض وانا تخصصي دبلوم محاسبه وهم مسجليني اداري بالثانويه العامه


قدر الله وبحثت عن الافضل والاقرب ودلني احد اقاربي على مؤسسه تبي معقب

وقريبه من بيتنا .. رحت قالي صاحب المؤسسه احنا ماراح نكون افضل من شركتك
وفي معقبين لفروع ثانيه اعطيهم 1500 و 2000 واهم قداما جدا

قلت خير ان شاء الله حصر خير

الا يتصل فيني ولده قالي عندك مقابله ثانيه

رحت قالي نبي سكرتير وبنفس الوقت نبيك تساعدنا بالتعقيب قلت لا مشكله ممكن مره بالشهر وراتبك صافي 3500 وبنسجلك بتخصصك (محاسب) وبنعطيك دورة انجلش وبعد سنه نوديك ماليزيا تاخذ دورة انجلش اقوى ولو اشتغلت شغل اكثر بتكون لك زيادات بالراتب ولو تعمقت وخذت شغله ثانيه (المحاسبه بيكون لك اضافي على راتبك مباشره وثابت) وممكن نعطيك سياره قريب عشان احتياجط لها بتخليص شغلنا
يعني حط لي الشمس بيد والقمر بيد

مدير شؤوون الموضفين بشركتي ماطل استقالتي اسبوع ورفضها وسوا اشياء كثيره ويقولي
(0مجنون تترك شركه تروح مؤسسه ..مؤسسه عاد احد يروح مؤسسه)
احنا مب محتاجين موظفين بس والله مب مطاوعني قلبي اوقع استقالتك كيف تترك شركه تروح مؤسسه

وضل ولد راعي المؤسسه يحن فوق راسي عشان استقيل من شركتي ويتواصل معاي دووم ويشوف وش صار وحط لي كنوز الدنيا كلها فدام عيني .. انا تخوفت منه قلت باخذ اسبوع تجربه اجربكم وتجربوني واخذتت اجازه تسبوع من شركتي وباشرت معاهم

تخوفي كان بمحله (الولد سبيكه) بس ما في خوف منه شغال ومكافح ودارس كثير وتفلسفه واجد وبمحله

توكلت على الله وقدمت استقالتي وبيضها معاي واعدني بدفع الشرط الجزائي عني لشركتي السابقه


جا اللحين وقت توقيع العقد معاهم من بعد عيد الاضحى الى 10 ايام تقريبا كل يوم يواعدوني على بكرا ولجا بكره سيفووووووون وانا على اعصابي

لين قابلت اخوه لقيته ولد اصغر مني وسواسي شكاك حد مايجي ومتوحش من كثر الوحده ويخز بلحاله وانا اقول ان شاء الله سهالات كل شي ينحل ويتسهل

الولد ممصخها .. يمه ورقه مثلا يناديني جيبها لي
انا والله ثم والله ثم والله لولا ضروف اسرتي وضروفي كان صفعته باقرب طفايه ومشيت منهم
انذل واقول بقلبي يالله صبرك وهذا قدري انت الرزاق

تصبرت وحاولت اتحمل سباكتهم شغلهم كله خرابيط وتخبط ولا يفهمون شي بالعمل وقدام عيني يضيعون فلوس تصل الى 500 الف وممكن اكثر ويطلبوني اشياء تضحك لكني اسويها لا يطردوني مثل ما طردوا الي قبلي في اسبوع

صرت اداوم الدوامين وفوقهم بين الدوامين وبعد الدوام الثاني واشتغلت 15 شغله منها التحصيل والتعقيب والسكرتاريه والمشتريات والتخليص والتوظيف وكل يوم والثاني اروح الدمام ....... الخ وكل الي اشتغلته خرابيط وحيره


مالقيت الا الاذيه من اخوه الصغير واسلوبه المشعر بالمذله وتوتره المستمر وارتباكه وتعاليه وان راتبك هذا واجد عليك وانت سكرتير يعني خادم .. وسباكه من الكبير وخيال واحلام وخرابيط وكذب وكل واحد منهم يبي يحس انه مدير وذكي وناجح وانه افضل من اخوه


الصدمه انهم 3 شهور ماسجلوني بالتأمينات
وبعد ما طلعوا روحي وذلوني ذلللل قالوا ما نقدر نسجلك محاسب بنسجلك استقبال

وانا اصلا ما طلعت من شكرتي الا عشان التخصص (محااااسب )
وش اسوي انا بال500 الي زادوني اياها عن شكرتي السابقه
مقابل دوامين .. هذي ال500 ماتجي قيمة الفطور والغدا الي كانت تقدمه الشركه السابقه


طيب انا انتهى مخي من كثر ما اتخبط بتخبطهم حتى اني ضيعت دروبي واضيع راتبي وخربت حياتي وعلاقاتي واسلوبي ووزني وشكلي وكل شي
اطلب 10 الاف سلفه ما يعطوني وقدام عيني انا اةودع لهم فلوس بال50000 عشان يضيعونها بتخبط

طيب يا شباب واعدتوني بدورة انجلش
قالوا كمل 6 شهور
كملت 6 شهور قالوا اصبر بعد ماننقل المبنى الجديد بعد سنه ونجيب سكرتيره
عشان تغطي مكانك وقت دورتك ووقت الي تطلع اجازه

طيب وش وضع السفره الي قلتو لي لماليزيا
قالوا الاجازه السنويه ال 21 يوم تروح ماليزيا على حسابك وعليك السكن والاكل وكل شي
واحنا ندفع عنك مصاريف الدراسه بس

هذا غير سالفة المحاسب والشغل الثاني وزيادة الراتب طلعت خرطي لان اخوه اصلا دارس دبلوم محاسبه زيي
واللحين بيثبت بنفسه بمؤسسة ابوه

وغير قصة لشتغلت شغل اكثر نعطيك اكثر
اروح الدمام واكرف كرف الحمير اكرمكم الله ما يعطوني حتى اجازه اليوم الي بعده ولا حتى زياده ريال (مصاريف الطلعه بس بانزين ووجبه)



اللحين وين القى شركه بالحسا
ومافي اي شركه حتى بالدمام او بالرياض ترضى توظفني بدون دعم الموارد البشريه
ودعمي ضيعوه علي لان النظام مايدعم اكثر من مرتين حتى لو ما كان مجموع الدعم سنه


شوروا علي الله يجزاكم خير

والله بجن لا شركات تبيني اللحين .. ماستفدت اي خبره .. رك اسلوبي مافي دعم موارد خلاص
كل الوعود الي واعدوني كذب وكل تعاملهم كذب وتصرفاتهم متخبطه وتخبطك وتعامل بازدراء

وانا علي ديون كل مالها تزداد ووضع اسرتي معفوس بالمشاكل ولا عندي سياره زي الاوادم وعمري 27 للحين ما تزوجت واعاني من امراض مزمنه مخليتني انهد قبل عمري (خافيه عن العيان)



تتوقعون لو اشكي عند ابوهم بستفيد ولا بيحقدون العيال بس؟
وهل بيقتنع الابو خصوصا انه مدللهم ع الاخر ؟

ولو اشكي بمكتب العمل او الموارد تتوقعون يرضون يعطوني دعم مره ثالثه عشان اقدم فيه بالشركات الثانيه ؟


مو مشكله لو ما فدتوني ع الاقل فضفضت

وانصح الكل ان لا يصدق اي وعود الا اذا كانت مسجله بالعقد

احب اضيف ولا انكر

ولا انسى موقف مدير شؤوون الموظفين بالشركه السابقه حيث رفض استقالتي وماطلني اسبوع كامل
مع العلم ان شركتهم عليها اقبال وسيفيات بعدد هائل
الا انه بعد ماتعب مني قالي بصراحه انا الي مماطل موضوع استقالتك وموصي الموضفين ما يسوون لك شيء وقل بالحرف الواحد مو مطاوعني قلبي اوقع استقالتك عشان تروح مؤسسه
كيف تترك شركه تروح مؤسسه .. احد يترك شركه يروح مؤسسه !!

الا اني مصرر علىالاستقاله بسبب اصرار ولد صاحب المؤسسه ومتابعته لي ووعوده الا منتهيه


...

اضيف للوعود الي واعدني فيها الولد بالمؤسسه
راح نعطيك سياره بالمستقبل بما انك راح تطلع مشاوير لبرا

واللحين لي 7 شهور اطلع المشاوير على سيارتي والبنازين والمكالمات علي واصلا الولد حتى سياره ماعنده طلع متقاطط مع اخوه بسياره وحده !!

ربي يكون بعونك ,,

محزن ,, جــدآآ ,,

حصلت لي قصة بمثل قصتك ,, لكن تفاديت الامر بكل جدية ,,

والله بيرزقك خيرآ منها ,,

أبحث عن الافضل وتلاقي بأذن الله ,,

دعواتي لك بالتوفيق ..

توكل على الله في كل شي ولا تيأس ,, إن الله خير الرازقين ,,

حسبنا الله ونعم الوكيل ,,

تقبل مروري ,,

مرآقب |~

الله يجزاك خير يا مراقب معماري

لكن كيف التعامل بجديه ؟

نورني لعلي استفيد من تجربتك

الله يعينك ياشيخ
فعلاً قصتك تضيق الصدر وتغبن وواضح انك رجل عملي ومجتهد والدليل تمسك مدير شؤون الموظفين السابق فيك
وطلب صاحب الشركه ورغبته في انك تعمل معهم

صدق ان الراحه النفسيه بالعمل افضل من الراتب والدليل اللي صار معك
لكن اذا تبي رأيي
قابل صاحب الشركه وتكلم معه عن الوعود وجيبه باسلوب حلو ولا تستحي بشي خلك صريح معه

ولاتتشكى من عياله لان مثل ماقلت سبايك ولايبون يطلعون قدام ابوهم انهم سيئين بالعكس امدحهم عنده خله يوصلهم الكلام هذا يمكن تتغير معاملتهم معك وان شاء الله صاحب الشركه يحسن امورك
ولاتنسى اكثر من الاستغفار
موفق ان شاء الله

كـان حسبتها بالعقل كيف تكـون مساد معقب
ويرسلونك تكمل دراستك على حسابهم ويعطونك دوره تدريبة انجليزي على حسابهم
شي ما يدخل الراس كـان حسيت بكذبته وتجاهلت
او انك تطالب بعقد وظيفي ومكتوبه فيه جميع اللي ذكـره ومختوم وموقع بتوقيعه
قبل ما تفصل من شركتكـ الاولى
حتى لو كلمت ابـوهم مــا اظن بيوقف معك ويخلي ولده
الله يعوضك خير

الف شكر لك يالشعلان

هم قالوا لي سكرتير تنفيذي لكن تساعدنا بالتعقيب لو انشغل معقبنا وبنسجلك بالتامينات محاسب وممكن نعطيك سياره وممكن تمسك شغل محاسبي ونزيدك

كل هالامور ما تحقق منها شي ولا يمكن ان يخقق اصلا

اخوي انت تعرف انجليزي

اذا ماتعرف مصيبه واذا تعرف تمام

بعدين بالدمام فيه شركات بالصناعيه الثانيه قويه جدا وتعطي رواتب 6 الاف ريال
واكثر

الان الشركات تبي كثير لرفع نسبه السعوده

انت لم يقولون بنشغل مثلا استقبال وبنسجلك محاسب وش تستفيد من المسمي

اهم شي كم تاخذ والمحاسبين كثار لم تجد محاسب بسعر 5 الاف ريال وتحصل شئون موظفين ب 7 الاف ريال تبي تشتغل محاسب

بعدين من وين نطالع بالتامينات مسميات الوظائف اللي انا وغيري عليها

مسجلين

انا اتمني تشوف شركات كثيره والدمام والخبر فيهم خير كثير ان شاء الله ولا يضيق صدرك

وكل هذا بقدر الله يجري

هذا الله مقدره كما قدر الله ان اكتب رد هنا مع العالم اني ادخل قسم وضائف المنطقه الشرقيه القطاع الخاص فقط ولا مره دخلت هنا

لكن كل ما يحصل في الشركات بسبب مكتب العمل وانظمتهم مافي حمايه للمواطن من المقيم اللي هم مداراء عليهم ولا في حمايه للمقيم من المواطن اللي هم مدارء ببعض الشركات

المشكله انظمه لا تطبق وكل واحد نائم كل يوم مكتب العمل له تصريح وقرار ولا شفنا شي على ارض الوقع

الان في ناس تداوم من الساعه 8 صباحا الى 6 ليلا واكثر بدون اوفر تايم واليوم كله ضايع على الموظف هل في احد وقف معه وعدل الدوام الى الساعه 4 او 5 مساءا هذا يرفع اقتصاد البلد واصلا المصانع تعمل 24 ساعه لكن هنا انظمه لاستعباد البشر بطريقه اخرى

لم الانسان يضيع وقته بالعمل ويفصل بعد كم سنه وش يصير الملف الشخصي والسيره الذاتيه فقط خبره موظف بدون دوارات وشهادات وغيرها لان ضيعوا الوقت عليه كل يومه بالعمل واذا فصل كيف سدد روسوم دراسته ودوارته لو بيطور نفسه وين الزام الشركات بالتدريب والدورات والرواتب ووقت العمل كله حبر على ورق ولا شي في ارض الواقع واذا جاء تفتيش الجوازات او العمل اعطوهم فلوس او هدايا وغيرها وقالك سلام عليكم يا مكتب العمل لازم انظمه معينه مربوطه الكترونيه لكي لا يكون تلاعب هل تعلم ان انا وظيفتي دكتور بمكتب العمل مسجل وانا شغلي وطبيعتي بعيد عن المستشفيات بس سجل وبس بدون معرفه الدورات والشهارات

مفروض مكتب العمل يسوي نظام رفع الشهادات ومسمي الوظيفه وتوقيع العمل توقيع مطابق لتوقيع البنك لكي تاكد صحه التوقيع على ذلك اذا كان رجل مسجلينه حارس امن وشهاداته عاليه من دورات كمبيوتر وشهاده جامعيه في مجال معين كيف تسجله حارس امن اذا انت تبي ترفع نسبه السعوده بدون توظيف سعودين في مراكز قويه هذا مفروض يجي اشعار من مكتب العمل الكتروني على الشركه افاده بهذا الموظف

لازم يصير في تنظيف لا نكون دوله بدون نظام ونحن نملك ثاني احتياطي نفط بالعالم

الاجانب يضحكون علينا يقولون انتم ثاني اكبر احتياطي نفط بالعالم مو قادرين تحلون اموركم وفي مكتب العمل

الكلام كثير ومستعد اسوي لكم مجلدات بالمخالفات

الان على مخالفه تشغيل وافد مخالف قالوا 100 الف ريال غرامه على الشركه على كل وافد اوكيه لم ابلغ انا وش استفيد بنطرد فقط والفلوس للدوله
لو تقول الدول هذا 90 الف لي و 10 الاف ريال لكل من يبلغ كل الموظفين ببلغون لانهم يعرفون المخالفات ومين المخالف


وشكرا
وشكرا

دائما الواحد يبعد عن الموسسات وربنا يعوضك

ربي يعوضك بـالافضل ان شاء الله ...... مشكلة المؤسسات والمقاولات انها تسحب على الموظف يعني زي ماذكرت مايسجلون الموظف بالنظام التامينات مباشرة لازم يجلس فتره والرواتب تتاخر خلها على ربك بس