السلام عليكم ورحمة الله وبركاته



من زمان نفسي افضفض واسئلكم







انا متخرجة من سنة قسم لغة عربية وعلوم اجتماعية تخصص لغة عربية معدلي جيد جدا
وانا محتاجه للوظيفة
وابويه رافض فكرة التقديم لغير مدينتي رفض نهائي ومدينتي هي ينبع واحتياجها وحده فقط ونقاط اخر مرشحه 87 يعني مستحيل اتعين قبل 10 سنوات وخاصة انو كثير يختارونها من ضمن رغباتهم خاصة اهل جدة والمدينة ومعاهم حق لانها الاقرب لهم تقريبا
فنقاطها دائما تكون مرتفعة
المهم فكرت انو ادرس ماجستير دراسات ادبية ادب وبلاغة ونقد في المدينة او جدة لانو ما عندنا في ينبع ماجستير ابدا ولا قسم من الاقسام
وابويه ايضا رفض اني اسافر لا سكن ولادوام ولا عند الاقارب على فكره عندي اقارب كثير في المدينة وجدة كل خالاتي في المدينة وعماني وعماتي بجدة
وخلاص قال لي لا صعبة وسكت واتقهرت طبعا بقلبي
وبعدين لقيت بشروط التقديم لقسم اللغة العربية بموقع طيبة كاتبين يشترط ان لايكون من خريجي كلية المعلمين وانا من كلية اعداد المعلمات فارتحت شوي قولت حتى لو وافق ابويه ما راح يقبلوني ووكلت امري الى الله
لكن تفاجئت بقبول اثنين من صحباتي وهما مثلي اعداد معلمات لكن علوم اجتماعية وحده منهم مقدمة جغرافيا والثانية تاريخ لكن قبول مبدئي باقي الاختبار التحريري الله يوفقهم
فرجعت مره ثانيه افكر في الماجستير
حابة اسئلكم الله يوفقكم
هل يتم قبولي وانا خريجة كلية اعداد معلمات بعد ما انضمت لجامعة طيبة
هل اذا وافق ودرست واتخرجت مضمونة الوظيفة يعني هل في احد درس ما جستير وما اشتغل عادي مو على طول ممكن سنة سنتين بس اشتغلت في الاخر ولا استريح وما اتعب نفسي من البداية
ممكن تساعدوني يا نساء ويا شباب كيف اقنع ابويه بالماجستير او التقديم بجدارة على جميع المناطق محتاجتكم
على فكرة امي ما عندها مانع على الماجستير وخاصة انو يقولون الدوام 4 ايام في الشهر بس جدارة تقول اذا ابوكي راح معاكي عادي
اما ابويه اكيد يبغاني اتثقف واشتغل بس شايفها صعبة ومو مقتنع وخاصة انو ولا وحده من اقاربي لا اهل امي ولا اهل ابوي مقدم على غير منطقتو يعني محد سواها بكون شاذة بعايلتنا ما عدا وحده تقربلي من بعيد اقول شوفها عادي كل الناس كذا يقولي لانها متزوجة عادي
ويقول ما ابغى اترك عملي و اروح معاكي يقول لما اتقاعد قدمي على جدارة واروح معاكي بس هو لسه مطول على التقاعد يبغالو يمكن 8 او 9 سنوات
انا ما قصرت قولت له اقدم ولو جاء خذ اجازة من العمل حتى لو بدون راتب لمده سنه وتعال معايا
وراتبي كلو لك نعيش منو ويعيش امي اخواتي ما ابغى غير قيمة التحضير والاقلام قال عادي سنه تعدي بس ايش يضمنك انهم ينقولونك بعد سنه يمكن تطولين عاد هنا انا سكت
احتاج مشورتكم الله يسعدكم اي احد دخل الموضوع يقول لي وجهة نظرو وبكل صراحة راح اتقبل اي شي انا عارفة اني ضعيفة وما عندي كلمة ولا راي لكن واجب علي وغصب عني اسمع كلامه واطيعه

يطلب تفرغ من العمل لين يجيك النقل

على فكره في ناس كثير معهم ماجستير وعاطلين ...
وانا اقترح عليكي تسمعي كلام بابا لانه لو قدمتي على منطقه نائيه يمكن ماينقلونك الا بعد عشر سنوات وانا اعرف معلمات توظفو بمناطق بعيده وماقدرو ينقلون لمنطقتهم ...... ويمكن يوظفونك بمنطقه مشاكل اهلها كثير جرايمهم اكثر ومابسمي لك مناطق . . واذا قدمتي على منطقه تقبلك ماراح يقبلونك الا بقريه تابعه والقرى احس انها اسرار مجهوله اعرف وحده تعينت بقريه واهل القريه صارو يضايقوها ويبون يطفشونها لانهم يشوفون بناتهم اولى منك بالوظيفه ....والوظيفه لاغلب البنات مو شيء ضروري بل من الكماليات يعني ماتستحق اهاجر من منطقتي علشانها وابقى متغربه عن اهل سبع او عشر سنوات ...

[align=center]لالالا لاتتحطمين ولا شي انتي ادرسي ماستر بالعكس تنفعك كثير في وقت لاسمح الله ماصار لك نصيب بالتعليم انا اشوف انك تحاولين اكثر من مره وتعالي لابوك باسلوب حلو وحاولي تدفين عليه امك قبل التقديم شوفي فرع ينبع ممكن له تقديم المهم لاتروح عليك فرصة التقديم انا عارف وفاهم انه عيب ومايصير ومن هالكلام بس الناس لازم تتطور وتتعلم مدام انك بنت رجال مافي اي خوف عليك وعليك بالدعاء في جوووف الليل وكمان اذا عندك اخوان حاولي تكلمينهم يحاولو في ابوك وربي يحفظك ويحقق كل اللي في بالك[/align]

انا من رائي مدام ابوك رافض انك تتعينين برى الديرة

انهك تطلبين منه يدبر لك واسطه باي وظيفه في ينبع ؟ وترى الشيبان الله يخليهم لنا يعرفون يفتحون الابواب اذا طرقوها

وطيعي ابوك وريحي نفسك

الله يوفقك ويرزقك بر والديك اختي الكريمه

استغفرالله الذي لااله الاهو الحي القيوم واتوب اليه

رضا والدك مقدم على كل شيء. ولاتزعلي منه لأنه يحبك ومهتم فيك.


وبعدين ليه شاده على نفسك كذا؟


شوفي من الآخر الماجستير إذا بتكملين عشان عندك رغبة في التعليم وممكن التوظيف الأكاديمي ممكن ادرسي.


لكن عشان تتوظفي لا. ماجستير بدون خبرة= ولاشيء.

والوظائف للماجستير قليلة جدا ارجعي اعلانات الخدمة المدنية.


وكلي أمرك لله .. واختاري منطقتك للتعليمي والغير تعليمي.. ومن توكل على الله كفاه. وامتحني كفايات سوي اللي عليك. والله إذا كاتب لك رزق رح يجي.


وبعدين فكي شوي .. لاتنتظري جدارة جربي مدارس أهلية بنفس منقطتك+ قطاع خاص +مراكز تدريب+مشغل+ ياكثرها لو تحصرينها..

وتابعي قسم الوظائف تبع منقطتك في القطاع الخاص هنا بالموقع.



وبخصوص الماجستير .تمني الخير لهم وادعي الله يوفقهم يونقبلون ترا هالشيء يريحك نفسيا .. وحب لأخيك كما تحب لنفسك.

الله يكتب اللي فيه الخير يارب العالمين لك ولجميع المسلمين ..
نصيحة : أسمعي كلام أبوك والنفس تمنى أشياء واجد ماجات على الوظيفه وبس
واصلاً حطي في بالك أنتي أن لو قدمتي على 45 منطقة أن نسبة التوظيف قليل جدا
مو تحطيم بس لاتحسبين أن يعني أن الوالد سبب في بطالتك لا الإحتياج قليل جدا لهذا التخصص مقارنة بعدد الخريجات اللي منه ..
عموما أقنعيه أنك تدرسين الآن ماستر والله يوفقك يارب

انا مع فقيرة حظ
والله يوفقك

استخيري بامورك كلها ولاتخلي ببالك ان ابوك وقف بطريقك ترى الاهل يتمنون لاولادهم النجاح بالحياة
وكونك تتغربي فكره صعبه على الوالد كيف يهنا له ينام وبنته مو عنده والان المشاكل كثيره
ادعي الله تتيسر لك امورك وقدمي على كليتك بينبع بحيث يتعاقدوا معاك متعاونه راتب مقطوع بكذا استفدتي وتوظفتي ومع الايام وتطور انظمه الجامعه يفتحون عندكم الاعاده وتقدمي بكليتك ورضيتي والديك ورضاهم من رضى الله سبحانه وتعالى
فكري واستخيري بامورك كلها واكثري من الدعاء وفقك الله لما يحبه ويرضاه