شف وانا اخوك قساوة الاباء مو شي جديد خاصتن الجيل القديم،،،،
كل اباءنا الله يرحم الميتين ويطول عمر الحيين كذا،،، النظام القديم ،، الاسلوب القديم،،، والقساوة والجفا والحدة بالطباع،،، تعرف ليش لان تربيتهم قديمة بدائية التفكير والحلول،، ماعنده حل وسط يا اكون طيب مرة او قاسي مرة عشان يوصل لك وش يبي منك او وش يبيك تكون،،،لان شف درجة تعليمهم الف باء تاء والفاتحهة والمعوذات و1+1=2 فقط ،،، مو زينا اللحين مناهج ومقررات وعالم متفتحه ودنيا ثااااانية غير دنياهم وزمنهم وعاداتهم وتفيكرهم ،،، هم جيل تربى على القسوة والشدة والحزم والخشونة،،، يعني نظام امريكي عمرك وصل 16 او 17 اقضب الباب دور لقمة عيشك ولاتفكر انك تعيش عاله على اهلك ونصرف عليك طول عمرنا،،، فهمت قصدي وانا اخوك؟؟ لاتلوم ابوك كذا تفكيره وعقليته واسلوب التربية القديمة الحاد،،، ولاتقدر تبدله وتقنعه بالشي لانه عقلية محدودة تربى على نظام اني اكسب قرشي واخشه وما اثق بحد ولا اصرف شي الا بمكانه الصحيح وبعد مداولات طويلة المدى مع نفسي،،،، والله ابوي الله يسكنه الجنه ويجمعني فيه بالجنة كان يجلدني حلد مو بصاحي مستحيل يعلمني نظري لازم عملي وباداوات محظورة دوليا!! بالعزايم انجلد قدام المعازيم اذا صبيت فنجان غلط او جبت العيد،،، وعادي يعطيك كورس صدقني جامعة اكسفورد ماعندهم هالقدرات التعليمية،،، ومافي شي كان يرضيه الله يرحمه ويغفرله يشوفني جالس قم حط شيل ود جيب،،، يشوفني واقف وراك ماتجلس عسا اللي فيك مايخطيك،، يشوفني نايم انت ماغير نوم لاصلاة
ولاعبادة تقل يهودي،،،،، انتا ورا ماتنام تقل ابليس ماغير عيونك بالتلفزيون،،،، وعلى هالحال،،، وجوابي ابشر وسم وخلاص ماعاد وان شالله،،، مع ان الوالد الله يرحمه ما كان يسمع كنت اكلمه بالاشارة ،،،،
وكان مره عصبي ضغط وسكر وقلب وانسداد شرايان بالقلب وكله بسبب العصبية والزعل الزايد،،، وكان دايما والله يهاوشنا على سبب وبدون سبب،،، وكنت اقول بنفسي يايبه بفهم ليه وش هالحياه ونفس كلامك بالظبط والله ذكرتني بألحلقة الخامسة من حياتي هع،،،، لين عرفت انه خايف علينا وعلى مستقبلنا يبينا نكون احسن منه ونعيش حياه احسن منه وناكل ونشرب وننام احسن منه،،، حاس انه مستقبلنا بخطر،،، ويبي يفهمنا بطريقته الجافه هالكلام بس ماعنده اسلوب متطور لانه تعليمه على قده وجيله كذا طبعهم،،، قسوة الصحرا وحدة القيظ،،،، لاتحسبني صاك 450سنة ترا عمري 25 وداخل بال26سنه عشان لاتقول انت جيلكم غير لا جيلي من جيلك ،،،، وانا اخوك الامور ماتنوخذ كذا ،،،،، وبعدين شفت لو انت اخوي كان صدمتك وسحبتك للبيت وربطتك بالشماعه اسبوع لين الجني اللي فيك يطلع وبعدين اقعد اسولف معك نكمل مواضيعنا،،،،خل عندك صبر واسلوب وحيلة،،، ترا الشياب والله والله لو تحب السما مايجي بالعناد خلك حبيب،،،
،،ولاتحاول تتناقش معاه تقل فيصل الدخيل ، يعني لاتتفلسف عليه وتسولف معه عن فيلكس وتويتر وانشتاين وعلم النفس لانه راح يجيك علم الجلد ،، ناقشه بتفكيرة وباسلوبه هو ،،، نصيحتي من باب تجربة الشيبان وكبار السن خلك نظام سعودي قديم ثوب وشماغ وقهوة وسوالف هياط واقعد معه كل عصر وقهويه ورح معه عزايم ومناسبات ياخي اكسبه بذكاءـ،،،، وطبق كلامي وشف وش النتيجة
حاول تشوف انت وش فيك من بلا وعلة وعالجها،،، يمكن لبسك غلط شعرك غلط مسوي قصه غلط يمكن اسلوبك غلط يمكن دابل كبده بالسهر والفرفرة بالشوارع مع اخوياك وسهر الليل ونوم النهار ولا صلاة ولاعبادة؟؟؟ عدل ديكور حياتك وعقبها ازعل وعصب ،،،، وصدقني لو انهم شافوك ذيب ومنت راعي علوم سهر وذا وان شالله انك ذيب وكفو باذن الله راح يوقفون كل اهلك وربعك وكل من يعز عليك معك ،،،،
اي صح نسيت اقولك من ناحية المصروف وانه مايصرف عليك شف وانا اخوك دامك ماكل شارب نايم بالبيت وش تبي اكثر ياخي المفروض انت تنحرج تطلب من اهلك شي وتقدر الوضع،،، ياخي رح صور شهاداتك ولف الشركات والمستوصفات الخاصة وحط ملفك وارقامك وصدقني بفضل ربي تلقى ،،، لاتتوقع يجيك مندوب للبيت ويقلك تعال اشتغل معنا،،،،
ياخي لاتخلي لحد فضل عيك ولا منه،،، راح تتعب اول شي بس بعدين راح ترتاح،،، ترا لاتجحد فضل ابوك عشرين سنه وهو يربيك او اكثر حليب وحفظات وعلاجات ومصاريف مدارس لك ولخوانك،،،
وتقول مايصرف علي ،، اكيد ماراح يصرف عليك الا باشياء ضرورية ولوازم البيت واغراضه،،، انا اخر خمسة حمرا شفتها بثاني ثانوي عام جدي،،، ومن وقفت دراسة وانقطعت طبيعي ينقطع المصروف حقك فطور غدا عشا،،، شي ثاني عض الجدار ،،، شين وقوي عين،،، اجل تبيه يصرف عليك مثل شنو؟؟؟ سفراتك؟؟؟ طلعاتك مع العيال كشتة واستراحات؟؟؟ مقاهي وفرفرة بالاسواق؟؟؟
ياخي دامك خلصت دراسة مالك حق تطلب فلوس ومصاريف مالها لزمة///// فطورك وغداك وعشاك بالبيت ويجيك لحدك،،، غير كذا خواتك وامك اولى بالفلوس يصرفون منها،،،، انت المفروض تشيلهم مو تزيد تعبهم وهمهم وحزنهم ،،،، ترا بالمشاكل اللي تسويها مع ابوك والرجة والثورات اللي تسويها بالبيت تخلي بيتكم متوتر وعصبي ومشدود والكل ضايق خاطره ومتنكد وتضايق امك وتحزن قلبها وتحرق قلبها عليك ،،،، فكر وانا اخوك اقعد مع نفسك لو ساعه وتلقى جواب لوضعك وحل صدقني،،،

بر ابوك اخدمه شيلو شيل من الارض ارضيه باللي يبغى وانت ادرى بابوك ! بسسسسس شهر وشوف كيف يتغير معاك
انت بس تتشكى فيه حلول كاتبينها الاعضاء ولا علقت عليها ابدا حتى لو علقت ترجع تدور بنفس الدائره !
خد رأيي مابتندم