السلام عليكم

انا توظفت قبل اسبوع في احد الشركات .. وقعت معاهم يوم الاحد على وظيفة ( مشرف سكن )

طبعا انا كنت موظف قبلها في شركه .. لكن اغروني انهم بيعطوني سكن لان الشركه في الصناعيه الثانيه في الدمام ومثل ما تعرفون الصناعيه الثانيه بعيده عن الدمام والاحساء .. يعني تضطر تضرب مشوار في كلا الحالتين .

كان اتفاقهم معاي اثناء المقابله وقبل ان اقدم استقالتي في الشركه التي كنت اعمل بها

1- الوظيفه مشرف سكن ( وبنفس الوقت اشرف على حراس المصنع )

2- السكن يكون لحالي

3- الدوام مفتوح 24 ساعه ( يعني دوامي كله ملاحظات على السكن والحراس وليس دوام رسمي محدد بساعات )


في اليوم الاول من تقديم استقالتي وحذفي من التامينات من الشركه التي كنت اعمل بها باشرت العمل في الشركه الجديده ووقعت العقد معهم وتم تسجيلي في التامينات

<< طبعا الحين الدوام .. وين دوامي ؟؟!

دوامك يا فلان في ( البايكه ) يعني غرفه صغيره بجنب السكن ( عشان اشرف على السكن والحراس ) وهذا ما كان اتفاقنا

<< اليوم الثاني .. اكلمهم ( البايكه مقفله ) كيف اداوم .. >> يردون علي بنفتحها لك بس بعدين

<< اليوم الثالث ( البايكه مقفله وين اداوم ؟!! ) المفتاح مو عندي عند رئيس القسم الفلاني

<< اليوم الرابع ( اتصلوا علي ) << طبعا انا جالس في السكن وينك يا فلان ( انا موجود ، يقولون لي ليش ما داومت ، ارد عليهم وين اداوم مافيه مكان اداوم فيه ) << يبوني اجلس عند الشركه مثل الطرار او في المصنع ادور او في البوفيه ( بالعربي عشان يجي مكتب العمل يشوفك سعودي تشتغل )

*** طفشت كذا وانا خريج كليه تقنيه وحاطيني في هالوظيفه وياليت على الاتفاق

ونقضوا الاتفاق في السكن ( جابوا معاي واحد غثيث ومزعج ) طيلة الاسبوع عدد الساعات اللي نمتها لا يتجاوز 24 ساعه مقسمه على كل الاسبوع بسبة السكن

*** وياليته سكن ورب العباد النجاسه في كل مكان 95% منهم كفار و لا من غرف ولا من دورات مياه

*** ونقضوا العقد وقالوا لي انت تداوم 8 ساعات رسمي من الساعه 7 الصباح الى الساعه 3


> خلوني اطلع من الشركه اللي قبلها بس عشان يسعودوني وتمشي معاملاتهم في مكتب العمل وغيره .. وانا بالحريقه قاطيني عند البوابات ..

كلمتهم اليوم بقدم استقالتي بطلع << تتوقعون وش جوابهم ( مالك الا راتب يومين ، ليش يا فلان لانك انت دوامك من 7 الى 3 واحنا ما نشوفك الا ساعه في اليوم )

^_^

سعوده اجل يا وزير

ويا اصحاب الشركات

طيب خذوا اسمي واستفيدوا منه مو تذلون خلق الله رايحين جايين من صباح الله وتجلسونا على بوابات المصانع مثل الطرارين


طبعا ادري كلامي مو مرتب بس من حرة ما بقلبي اكتب كلامي وكاني اسولف مع اخوياي

نصيحه بس للشباب


انتبه توقع على عقد مالم تتطلع على الوظيفه وحسب تخصصك والزامهم بمسمى وظيفي واحد ( يوهمونك بمسميات وظيفيه كثيره تشغلها بمسمى وظيفي واحد ) انتبه من هالشي


& بالعربي .. اذا حسيت الشغله سعوده اتركها لهم لانك والله راح تطلع لانك ماراح تحس بطعم العمل ، ماراح يهتمون فيك . وتحس انك ذليل وعديم الفائده .. والاجانب يمرون جنبك ويضحكون عليك ويتكلمون عليك وانت ما تدري وش يقولون ( قهر )


وعلى فكره هم اللي محتاجينك ( انا ليوم طلعت من الشركه وكان تقييم الشركه اخضر منخفض في التامينات الاجتماعيه ، يوم حذفوا سمي اليوم صار تقييم الشركه اصفر ) يعني ما تمشي معاملاتهم

وعليكم السلام ورحمة الله وبركاته

وقعت بنفس موقفك .. الفرق أن المسمى الوظيفي مدير إداري لشركة كبرى لديها مجمعات طبية بجدة

( طبعا بدون ذكر أسامي )

وأتفاجئ بأول ثلاث شهور بمسمى مسؤول علاقات عامة ( معقب ) ويا كثر العاملين الأجانب بالعيادة بس الواحد يتفادى ويحاول ما يفتح إذنه كثير للي حوله .. كملت مدتي بحسرة داخل نفسي ووكلت أمري لله عز وجل قلت خليني اخذ شهادة وأجي ماشي كل معاملاتي كنت اتممها من البيت ماني ملزم بدوام رسمي

بعد فترة بسيطة يجي خبر من الأمانة بغرامات بمبالغ طائلة وتحقيق من وزارة الصحة وإقفال بعض الأقسام المهمة داخل الشركة وما زال النطاق للأسفل لين اليوم .. ماني شمتان فيهم لكن كما تدين تدان.

أنت بس لو صبرت شوي تشوف ايش اخرتها وعلى فكرة السعودة تفيدهم بالمعاملات .. لكن مكتب العمل يكون متواصل معاك ويسمع لك في حالة وجود مخالفات .. ماشاء الله عليك ما انتظرت على طول سحبت نفسك عطلت مصالح الشركة .. ما الومك .. لكن عساها خيره لك ويبدلك بأفضل ويغنيك بحلاله

اخواني

انا اشتغل في مركز صحي ومليانه مخلفات ..

السعوده فيها قليله ..المركز غير مرخص .. وجود عاملات على اقامات ازواجهم..

مع كثير يجونا من البلديه و وزارة الصحه بس مافي اي قرار يتخذ وبديت اشك السالفه فيها رشاوي..
والله مستائه من العمل بس ما ابغى استقيل واجلس في البيت

الله يعين