[align=right]بسم الله الرحمن الرحيم
السلام عليكم ورحمة الله وبركاته

كيفكم إن شاء الله بخير ؟ عندي كلمتين وآتمنى توسعها قلوبكم يا لبى قلوبكم

الكلمة الأولى

انا أشوف كثير يكتبون أو يتكلمون عن مشاريع ويقولون أرباح مضمونة أو أرباح خيالية
وفيه من يكتب 100 ألف وشهرياً مضمون لك 10 آلاف وبعضهم يتكلمون عن مشروع معيّن
مثلاً مغسلة سيارات ويقول والله أرباحها ذهب أقل شي أقل شي 20 ألف شهرياً !!

يا اخوان هذا أكبر خطأ .. لا أحد يتّخذ مقام الله تعالى .. بقولكم ليش ؟

الله كتب أرزاق الجميع يعني هذا ما يزيد له ريال وهذا ما ينقص له ريال
فلان من الناس الله فتح عليه بشغلة معيّنة ولقى خير من وراها هذا مو معناه
إن فلان الثاني مجرد ما يسوي مثله بيلقى مثله .. يعني بقولكم والله فيه مغاسل
ملابس تطلع أكثر من 5 آلاف وفيه مغاسل ما تطلع هم المحل وبعيد عن أمور التجارة
من حيث المكان ونسبة السكان وكذا .. الله مقدر لكل واحد رزقه .. فــ خطأ كبير يجي
راعي المغسلة الأولى ويقول أفتحوا مغسلة الربح مضمون !

صحيح يمكن يستفيد أحد منه أو من المشاركة لكن مقصدي واضح وهو أنه لا يتكلم
بهذه الألفاظ ( مضمون - ذهب - أقل شي كذا ) هذا كأنه يعلم الغيب إذا يتلكم عن
تجربة سابقة يحق له يقول ربحت ذهب وكذا .. لكن يتكلم عن المستقبل هذا يتكلم
من راسه ولا يعرف شيء وعنده خطأ كبير ..

لكن ما أقصد إن الواحد يتردد أو يتحطم صحيح الله كتب للناس أرزاقهم لكن ترك لهم :
( العمل بالأسباب والتوكّل عليه ) ومن التوكل على الله إنك تعلّق أرباحك بمشيئة الله
تقول إن شاء الله .. وعزة جلال الله إذا الله كاتب لك ما تربح لو الدولة عطتك البترول
وصار ملكك ما راح تلقى ريال واحد .. وإذا الله كاتب لك تربح لو تبيع فصفص غير تربح !!
يعني تقول الأرباح المتوقعة بمشيئة الله .. مو بذكاءك أو لأن فلان قال أو فلان جرّب ..

ومن العمل بالأسباب إنك تفهم السوق وتفهم إمكانياتك وتحاول تتطور من نفسك
وتركز وتصبر وتجتهد بعد ما تختار طريقك المناسب التجّار وأصحاب الملايين ما جاتهم
من يوم وليلة .. الريال يجيب ريالين والألف تجيب ألفين والمليون يجيب مليونين وكذا ..


الكلمة الثانية

.. اعمل بذكاء ولا تعمل بجهد .. وخلونا على سبيل المثال نلتقط بعض الأفكار
من مجموعة من الأذكياء لنعرضها عليكم - طبعاً فرضية - :

( مرزوق )
1- إذا كانت أرباحي المتوقعة من السوبر ماركت 10 آلاف شهرياً -صافي الربح-
وعندي رأس مال جيّد لماذا لا أحوّل النشاط إلى مطعم أرباحه المتوقعة 15 ألف
شهرياً-صافي الربح- ؟

( خالد )
2- إذا كنت مربوط ومنشغل عن التجارة بالوظيفة أو الأهل ولدي رأس مال جيد
لماذا لا أفتح محل تجاري بإسم أخي أو صديقي بوكالة مشروطة وأسلّمه الأمور
ويكون لي نصيب الأسد شهرياً من الأرباح المتوقعة ؟

( عبدالله )
3- إذا كان المقهى لم يكن بالمستوى المؤمل من حيث الأرباح والزباين ..
لماذا لا أوسعه وأغير الديكور وأضيف إليه أنشطة أخرى كالبلياردوا والإنترنت ؟


( أمل )
4- آلاف التاجرات في الإنترنت كيف سأدخل بينهم بقوّة ؟ مالذي أغفلوا أهميّته ؟
نعم الإعلان .. سأعلن عن نفسي وعن منتجاتي في حساب هاشتاق السعودية
مليون متابع رقم ممتاز حتى لو كلفتني الإعلانات ألف ريال ..

( مرام)
5- ما عندي فلوس للإعلان في حساب هاشتاق السعودية .. اش أسوي ؟
أووه لقيتها .. أروح لخانة المتابعين لحساب هاتشاق السعودية وآبدأ أتابعهم
كل يوم أتابع 1000 واحد منهم .. وفيه من راح يتابعني وبكذا أكسب شريحة
أعلن لهم مجاناً كل يوم !

(فهد)
6- الحمد لله .. 10 شهور في التاكسي وقدرت أجمع 20 ألف ..
المرحلة الثانية خلني أشتري فقاسات بيض بلدي حتى يرتفع الدخل الشهري
ان شاء الله .. وبستمر على التاكسي فترة معينة حتى اتجهز للمرحلة الثالثة ..

(سلمان)
7- والله ما تسوى حراسة الأمن .. خلني أستهدف أمل ومرام وبقية التاجرات
وأنشر إعلاناتهم في النت .. أنشر الإعلان في 60 منتدى بـ 100 ريال وأرسل الروابط لهم
يعني 3 ساعات في اليوم على النت ولا 8 ساعات حارس بس واقف !!

(طال عمره هههه )
8- أشغلتني ذا الشركة وخايف على الملايين .. خلني أبني 6 عماير على الدائري
وأريّح دماغي

(مجنن طويل العمر)
9- خلني استأجر العماير اللي على الدائري من طويل العمر أتكفل له بحلاله
وأحوّلها فنادق ومحلات تجارية .. ماش ما ناسبتني المقاولات ..


/


إبراهيم واحد من العيال .. يمشور على سيارته يودي ويجيب اكتشف إن أفضل وقت
وأفضل شريحة هم العمال (استبعدتوها صح) فصار كل يوم ياخذهم الصبح من أماكن
تجمعاتهم على دفعات ويعطيهم رقمه .. وياخذ بعضهم قريب أذان الظهر .. وبعضهم
قريب أذان المغرب .. شغله صار ما ياخذ أكثر من 4 ساعات متفرقه !
يرجع البيت وفي جيبه 200 ريال

" اعمل بذكاء وليس بجهد " ولا تنسى " تعلق آمالك بالله بعد العمل بالأسباب "

أعتذر على الإطالة ..
حبيت أدردش معكم شوي .. وتابعوني في موضوعي الآخر
بدأت بعربية خضار وأخطط على التحكم في أسعار البصل
أكتب لكم المستجدات والتطورات حتى أصل للهدف بإذن الله
.. وشكراً ..