بسم الله الرحمن الرحيم

سلآإم عليكم ورحمةِ الله وبركاته

الله يعافيكمِ ، طلعتِ النتيجة حقت ثالث ثانوي بعد العنآ
صارت النسبةِ فوق 80% والقياس 65% .

كنت بدخل المعهد اللفني للتدريب الصحي لكن صار برسومِ تقريبأَ ب 49 الف
حتى ان بعت سيارتي وجمعة سطول البوية
المنتثره فالحاره وبعتها "سكراب" ماوفرت حقِ الدراسه .


ابي نصيحتكم وتوجيهمِ للوظيفه ام الراتب الزين !! وشكراَ ()

تنويهِ : الي بينصح بكلام مسموع عن وظيفه وتسذا لا ينصح، ابي نصيحة واحد عن تجربه وا اقاربه سجلو بالوظيفه وكانت ممتازه !


انا من الرياض ~
انتظركم

بالتوفيق لك يفيدونك الآخوآآن

نصيحة في حال كانت ظروفك العائلية فوق المتوسطة ومقبولة

كمل دراسة

فيه جامعات كثير تقبل النسب فوق 80% حتى لو كلفك الامر
تدرس تخصص " مشي حالك " وتجيب معدل وتحول
وتقدر بنفس الوقت تتوظف ( وظيفة مسائية ) تاخذ منها خبرة ومادة
وبتقدر بشوية جهد توافق بين الثنتين ..
لاتضيع عمرك نصيحة .. واستغل حداثة السن وحداثة التلقي فيك
وكمل ,, بكرة تقول يَ ليت ( رغم ان الجامعة بهالوقت ماتأكل عيش )
لكن حتلقى فرص اكثر من الآن ومجالات اوسع .. وشهادة عليا ..
ولا انصحك بالمعاهد الفنية ( سوى الكلية التقنية فقط )
فيها تخصصات مطلوبة بالدرجة الاولى لدى ارامكو وغيرها
مثل التبريد والتكييف وبرضو تقدر تشتغل بعمل حر .
طبعا في حال مارغبت انك تكمل في تخصص نظري او علمي بحت
وحبيت تتجه للقطاع والتخصصات الفنية ..
واي مشورة تحت امرك الخاص امامك .. سبقناك بالتجربة .. وذقنا المر ولسى مالقينا فرج والامل ب الله كبير

نصيحه الاخوان في محلها ان كانت ظروف والدك المادية كويسه وداعمك ماديا ادرس ...

ون كنت تقدر تدرس 4 سنوات وعندك الطموح والظروف الحمدلله مستوره كمل ان صارت لديك الرغبه ان تدرس للاخر ون درست لاتحط في بالك الوظيفه خلاص سكر اذانك عن الوظائف وركز بالدراسه ...

انا كنت ادرس وجتني وظيفه وطلعت وخسرت الوظيفه وخسرت الدراااسه والحين جالس ادفع الثمن ..

تخيل كل الوظائف الشاغره حاليا ( كاشير - مقدم طعام - مصفف ارفف - عامل مستودع ) بهرفي ولا بمجمع ولا بمطاعم يعين انسى انو فيه مستقبل ومان وظيفي لكن الشكوى الله سبحانه ماراح ينساني ...

والحين الناس ماتحترمك الا لاصرت موظف قسسسسم الزمن تغير صارت الوظيفه ستر الرجال ون صار بدون وظيفه كانك مدرس شسمه وعذرني على هالكلمة ماودي اقولها ومن واقع تجربه صدقني مذله...

بما انك خريج جديد وتوك صغير استغل نسبتك ومعدلك بالقياس وسنك ..

بانصحك ونت خذ الي يعجبك والي ماعجبك لاتسمعه اهم شي مصلحتك ياولد الاجواد ...

الدراسه اربع سنوات = مدرس راتبه فوق 8000 ريال وخمس وجمعه والدوام من 7 الى 12 ونصف

وكل عيد متربع عند اهلك ..

وزيادتك السنوية 500 ريال .....

طبعا لازم تجتاز القياس للمعلمين لكن يجيلك تعين وتخصصك يكون مرغوب مثل عندك كيماء مرغوب بالشركات والتعليم

وعندك انجليزي نصيحة محب لك شيك مفتوح بمعنى الكلمة لو الزمن يرجع ورى راح ادرس بكالريوس انجليزي سواء قطاع حكومي او شركات راح يبحثون عنك لكن لابد تكون لديك الرغبه لتعلم الانجليزي عشان ماتفصل وتطفش ..

ولد اخوي حاليا قطوه برفحا وراتبه 9000 ريال وعليها .... بحكم وجود بدلات لتعنيه خارج منطقه بدل منطقة نائية وبدل مادري شسمه الزبده ان يستلم فوق 9000... وتتقاعد ونت بقوتك وعافيتك حتى لاصرت طويل بال ماترفع ضغطك عشان الطلاب ...

عندك شركات مثل سابك قدما فيها ورامكو والتحلية وصدارة وسكيكو ...

بيدلعونك بالراتب مثل سابك ورامكو راتب اساسي قوي + بدلات تبرد القلب + تامين طبي لك ولابوك ولامك ولعيالك ولزوجتك +بدل سكن 5 رواتب بالعربي يجيك كل رمضان 18 ألف حسب الاساسي + يعطونك بيت بعد خمس سنوات او شقه اذا تزوجت + زياداة راتبك لما تودي لهم صك الزواج + بونص من ارباح الشركة + هدايا + مادري من من كثرهم

لكن الدوام شفتات وكررررررف والدام مكلف يمكن تجيك اصابة علم لاقدر الله ولاهو بكل عيد موجود لكن معوضتك بالراتب والمزايا وكل شي له ثمن ...

انا ولد خالي يشتغل بسابك بعد 7 سنوات حاليا راتبه 11 ألف

حاليا يملك بيت ملك هو شاريه ...قولو ماشاء الله ..

يقول معه الاوفر تايم طبعا هو الي يطلب الدوام الاضافي يستلم 16 ألف او 18 ألف ..

على فكره شهادته ثانوية عامه ...

..............

نصيححححححه ادرسسسسس وكب الوظائف اللى الحكوومي انتبه تروح لشركه وتقووله مرتبهاا 3000 الاف
والله يمصوون دمكك مصص اكرره اخررمرره ادرررررررس انتبه تقووول ابي اريحح سنه

والله يووفقك

[align=center]

وش تبي بالعسكرية وانت لسى " عودك طري " ,, حرام تقتل وجناتك بالعسكرية

اذا ضروف اهلك المادية كويسة ,, مثل ماقلنا لك كمل جامعة ,, وخذها تجربة

ادخل انجليزي , عندك جامعة الامام ,, جامعة سعود ,, عندك جامعات في القصيم والمجمعة

شوف انت في اي مدينة وجرب الخيارات الي حولك ..

جرب تخصص الانجليزي , شد حيلك , واجتهد وحتمشي , مامشيت لاقدر الله , تقدر تغير تخصصك

مافيه شي مستحيل وصعب .. في كل الاحوال ..

لكن لاتضيع عمرك وتندم بكرة

[align=center]