بسم الله الرحمن الرحيم
من منطلق "حب لأخيك المسلم ماتحب لنفسك"
راح أذكر تفاصيل مقابلتي "أمس الاربعاء في مستشفى الحرس الوطني" وأخطائي فيها ولا أحب اني أدعي الكمال وأتسترعلى أخطائي اللي يمر فيه معظم المتقدمين وكل هذا يا اخوان عشان اللي ماحضر مقابلات يكون بالصورة وكل شي يكون له واضح وماينصدم مثلي كونها أول مقابلة لي وجا فيها أشياء ماكانت على البال أبدا وصارت بمثابة درس لاينسى وبرضو عشان اللي اجرى مقابلة يستفيد زيادة من أخطاءه وأخطائي وتكون عبره للمقابلات الجاية
بعد تفاصيل المقابلة راح أبين لك طريق النجاح في المقابلة الشخصية بإذن الله عن طريق أكثر من فيديو بنزله هنا
اولا تفاصيل المقابلة
ملاحظات حول المقابلة أرجو وضعها بعين الاعتبار
- يمكن تواجه الاستفزاز في بداية المقابلة مثلا يمد يده لك وانت تمد ايدك عشان تصافحه ويسحب عليك ويسوي نفسه مشغول في اوراق او ما شابه
هنا يشوفون ردة فعلك تنرفزت طاح وجهك ارتبكت لكن خلك عادي رجع ايدك وانتظر لين يقولون لك استريح -ولاتجلس من دون مايقولون لك
-كل مايشوفونك تجاوب في مجال معين ويكون كلامك فيه منطقي وتمام تلقائيا يطلعون بك لموضوع ثاني ويقاطعونك وانت تتكلم بعد
-واذا شافوك غرزت في سؤال يركزون عليه ويحاولون يستفزونك ويتخطفونك كل شوي واحد يسألك ويمكن يسألونك في في وقت متقارب جدا ولازم تركز
-حاول تجلس جلسه معتدله ولا تلعب في الكرسي وتدور لاشعوريا مثلي هههههه
لأن هذا يوضح القلق والرهاب اللي انت فيه وانتبه لايدينك ولاتلعب في اصابعك او تشبكها خلك عادي جدا
-تواصلك البصري لازم يكون تمام
يعني تتواصل بصريا مع اللي يسألك وتناظر فيه واذا جاوبت خل نظرك موجه للي سألك لاتقعد تتلفت او تناظر تحت او فوق
-لاتتوتر اذا ارتبكت صدقني معظم المتقدمين يرتبكون وهذا قلق طبيعي لكن احذر يكون فوق الطبيعي
ويمتد لين يحوس معلوماتك ويأثر سلبيا على تفاعلك معاهم
-ركز على السؤال جيدا وشف وش المطلوب وجاوب على قد السؤال فقط
-اللي ماتعرفه لاتقعد تعطيهم توقعاتك وتكون في صورة اللي مايثمن كلامه ولايعتمد عليه قلهم ماعرف مادري أحسن من تعطيهم كلام خطأ
أغلب الأسئلة اللي جتني في المقابلة
بعد كيف حالك والترحيب بي
عرفنا بنفسك
وطبعا هنا أخطيت خطأ كبير وخلطت مابين عرف بنفسك وتحدث عن نفسك يعني بديت بداية تمام
عطيتهم اسمي كامل ومن أي جامعة ووش تخصصي واضفت جملتين مجهزها لتلكم عن نفسك وهذا خطأ عشانهم ماطلبوا مني الحديث عن نفسي
الهدف من هالسؤال طريقة كلامك ونبرة صوتك وطريقة تواصلك اللفظي فقط
بعدها ليش دخلت تخصصك
عن رغبة ولا .....
وهالسؤال الحمد لله توفقت فيه
وين طبقت واستفدت من تطبيقك او لا
طبعا اذا قلت لا راح تكون في موقف لايحسد عليه لأنه يدل انك مهمل ولااستوعبت التطبيق ولا فيه أي أثر للعلم فيك
واحرص اذا قلت ايه في أي سؤال انك تكون قده لأنه بعد ماتقول ايه يقولك اشرح لي بين لي وضح لي كيف الخ
وهذا الحمد لله توفقت فيه
بعدها ملاحظتك على المكان اللي طبقت فيه هل هم يطبقون نفس اللي تدرسه في الجامعة ولا صعبه يطبقونه
اذا قلت لا وش فايدة التطبيق؟
قل ايه نفس اللي درسته وبعدها راح يسألك مثل ايش؟
بعدها لو وجهناك للقطاع الفلاني كيف راح تفيدنا؟ وش تضيف لنا؟
هل لو تم تعيينك في أي مكان عادي؟
مايهمك مايأثر عليك؟
لك أهداف بالحياة؟
حاول تذكر أكثر من هدف
وش انجازاتك؟ هذا بصراحة غرزت فيه لين قلت بس
لأنه مافيه شي انجزته بحيث تكون الوحيد او المميز بين زملائك واللي يحسب الشهاده انجاز فهو مخطئ عشان اكيد كل المتقدمين مثل شهادتك
وش مميزاتك؟
رغم اني مجهز كلام كثير ومرتب إلا انه ضاع في المقابله واكتفيت بجملتين لكن الحمد لله كان الكلام مختصر وظهرت بصورة اللي مايمدح نفسه
أخيرا وش سلبياتك
وحط هالسؤال بعين الاعتبار اذا قلت ماعندي عيوب تذكر ان مافيه انسان بدون عيوب
واذا قلت ايه لاتجيب العيد وتقول عيوب تمنعك من الوظيفة
عاد انت وشطارتك انا ما ألقنك وش تقول عشان ماكون غشاش
وعشان تكون لكل شخص بصمته انا اقولك اسلوبهم ووش اسئلتهم وانت وشطارتك في الاستجابه لهم
أخطائي في المقابلة والدروس المستفادة
الاجابات مختصرة اكثر من اللازم
ماستغليت معلوماتي الكبيرة في بعض الأسئلة
تحريك الكرسي في بداية المقابلة والمفروض تكون ثابت من البداية
ماخططت لكل سؤال وجيتهم بدون أي استعداد من ناحية المعلومات اللي بقولها
مادربت نفسي على بعض الاجابات اللي كنت اظن اني بقولها بكل سلاسه واللي أنا أصلا حافظها بغض النظر عن المقابلة
أخيرا حاول تتدرب صدقني راح تستفيد فايدة عظيمة ومستحيل تكون مثل اللي ماتدرب لو تسأل نفسك وتجاوب مثلا تحدث عن نفسك حاول تجاوب وش مميزاتك وسلبياتك أو تخلي زميلك يسألك او اخوك والهدف من هالتجربة هو كشف القدرة على التعبير والاستمرار فيه لأنك راح تغرز كثيير عندهم اذا ماتدرب على الكلام اللي راح تقوله
أخيرا أتمنى تكونون استفدتوا من الموضوع وياليت الأعضاء الي أجروا المقابلة يذكرون الأخطاء والدروس المسفادة لتعم الفائدة

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــ
ثانيا طريقك إلى النجاح في المقابلة بإذن الله

مقاطع تفيدك بإذن الله