صباح الخير على الجميع .. والله يوفقنا وياكم الى مايحب ويرضى ..
مدري وش اقول بس بتكلم والله يسدد قولي ويرزقني على نيتي ..

ويوفق اللي يرشدن ويساعدن ويجمل ذكره بين ربعه .. ويرفع قدره عند احبابه ويكفيه شر اعداه .. ولايخيب ظنه ويطيب خاطره ويوفقه وين ماكان ..
ابي رايكم في شي بذكره .. وابي منكم النصيحه واعتبرني اخوك الصغير .. او ولدك .او واحد غالي عندك تحب له الخير ..
انا خريج ثانوي طبيعي هذا السنه وعمري 19 ونسبتي 82 .. ط 168 واحيان 170 .. حسب الوزن .. المهم خاطري في العسكريه الامن العام .. لكن متردد بشي ؟؟

اللي هو على ماقيل توني صغير عليها ويمكن اني بعد اهرب من الدوره لو دخلتها ..
لانهم على حد سمعي .. الدوره والمدرب والباقين به ادرى .. اقصد بالنفسيه والقدره على التحمل والتدريب ونفسيات المدربين وكذا ,,

لاني انا عارف نفسي فيني صبر صح واحيان طولت بال الى حد الغباء اللي مايعرفن .. وراعي كرف واحب الشغل يعني اتحمل ..
بس مشكلتي طايش في قراراتي حمق سريع الغضب ازعل قاصر النظر حاليا والفكر .. بس لا فكت عني ذا العصبيه اندم واعتذر اذا كنت مخطي ,,
وهذا اللي مخليني اتردد واخاف افصل لاسمح الله ثم عاد ماتقبلن القطاعات الثانيه .. الا بفيتامين و .. وانا الله يرزقني من عنده ولايولي علي احد ولاحتاج غيرك يارب ..

بعد ماذكرته سابقا .. وشفتوا السيره الذاتيه حقتي .. ابي شوركم علي بما يلي ..
مع كتابه السبب لتوضيح لي

1- اتوكل على الله وادخل العسكريه وانتظر فتح التسجيل بقطاعات الامن العام .. مباحث مكافحه امن المنشات قوى الامن الخاصه قوى الطوارى .. هذا اللي ابيه واطمح له

2- اطور شهاتي يعني ادخل جامعه . كليه . اخذ دورة حاسب .. بما معناه ارجع يابو عبد الاله لدراسه ابرك لك ..لما يجي عمرك 22 وكذا ثم ارجع قدم
العسكريه حلمي لامحاله داخلها داخلها ولايعوق بشر

3- اقعد بالبيت واخذ شوور سنه سنتين ثم اقدم لما اكبر واصير متفهم وينضج عقلي وكذا ثم يابو عبد الاله قدم من جديد .. واسجل بحافز وكذا

..هاه هذا الكلام اللي بخاطري وابي منكم الشور الطيب شور اخو لاخو يبي له الخير ..

لاتقولوا رح شركات وكذا شايل ذا الششي من راسي ماحب القطاع الخاص حدي حارس امن ولا بعد فوق راسي اجنبي يامر علي .. ونفس شينه وكني عبد له ..

وانا نفسي عزيزه ماذلها ومع ذلك
فقير حظ .. منتف جيب ..كثير الاحلام ,,عنيد راس ,,كبير الطموح ,, طويل لسان ..
قليل العقل .. خفيف دم .. واقول واطول اللي ابيه وش رايكم ..

الله يوفق ويرزق ويسدد ويبعد الشر والاعداء والحظ الردي ويفرح خاطر اللي يرد علي ياارب
وله دعوه بظهر الغيب

اقولك كمل تعليمك وخذ شهاده جامعيه ولا تفكر بالتجنيد راح تندم
وتوك صغير وعمر قدامك

وانسسسسسسسى عسكريه خلها اخر اهتمامك واخر حل

كمل داستك احسن بالف مره من العسكريه

أنـا أشوف إن نسبتك زينه
إدخل الجامعه وإدخل قسم تحبه أو تميل له
ثم بعدها قدم على الكلية الأمنية
تتخرج برتبة أفضل من دخولك للمعاهد والدورات العسكرية .

إلا إذا انت منتب راعي دراسه وانت أدرى بنفسك
يعني تدخل الجامعه 4 سنين ثم تتخرج بمعدل ضعيف
أكيد الأمنيه ما تقبلك وتصير ضيعت وقت وعمر على غير فائدة .

لاتقول توني صغير وماتحمل .. انا حاليا في دوره بامن المنشات وعمري 19 وخلصنا ال 45 + الفرد الاساسي وماسكلي سريه كامله (رقيب سريه)

ملازم الرووح

أجل مالك إلا تقدم على إحدى الدورات اللي ترغبها
وتصبر في الـ 45 يوم لأنها هي الأساس وإذا تعديتها
الباقي يهون وهذا كلام أغلب الطلاب العسكر .

شف طال عمرك

كل واحد ادرئ بنفسه

لكن لاجاء الوقت اللي تحدد فيه مسار حياتك ومستقبلك الحين

وهذا اصعب وقت

لكن انت لاتشيل هم الدورة كلها ايام وتعدي

بس فكر لبعد 10 سنين 20 سنة اذا الله اعطاك عمر

تكون توك جندي وانت ابو عيال وانواع الاوامر عليك ( التجنيد للي منحد )

بس انت توك العمر قدامك ومافيه شي صعب على الشخص

والعسكرية تراك محكور على وضيفتك سفرات برى قروشة وماتفتح سجل تجاري باسمك

خش جامعة كلها 4 سنين تعدي وتلقا الوضايف المدنية المريحة اللي بينك وبينهم دوام ولاحد له عليك كلمة

وحتى اذا مالقيت تخش كلية عسكرية او رتبة حلوة


الله يوفقك ويدلك على اللي فيه خير

وكثر من الدعاء والاستخارة

انا انصحك تكمل دراستك افضل لك حتى لو تدخل تربية رياضية حلو والله واذا مرررررة منت راعي دراسة ومالك بالدراسة ونفسك بالعسكرية نسبتك تدخلك معهد الدراسات الفنية الجوية او البحرية اقلها تتخرج وكيل رقيب وترقيات اسرع ورتبة معقولة وانقليزي وبعدها لو حبيت تكمل جامعة إنتساب يكون الإنقليزي موجود

نصيحتي لك لا تتسرع في قراراتك فكر والله يوفقك