يعطيكم العافيه ..

ابي استفسر عن الكليه التقنيه اللي بالرياض ..

سجلت فيها وعلى حسب نسبتي طلع لي مكانيكا وكذا ماقريت الباقي

وطلع لي حاسب دعم فني هذا وش التخصص ووش فايدته وله مستقبل ووش يحتوي عنه

وهل هو انجليزي او يتطلب الدراسه فيها لغه انجليزيه ..

ابي واحد منه او درس فيه ابي التفاصيل عن ذا المجال ,,

وبعد طلع لي محاسبه ..

ايهم افضل كطلب لسوق او عمل

وايهم افضل لاني ناوي بعد التقنيه ادخل عسكري تنفع اي وحده منهم


وجزيت خير ياللي ترد ..

إذا ناوي العسكرية أي وحدة منهم تأهلكـ لرتبة وكيل رقيب بالأمن العام

بالتوفيق

زي ما قالك الأخ "سكرووو" كلها تأهلك لمرتبة وكيل رقيب

أما بالنسبة أيش الأفضل: أنا ما عندي خبره في المحاسبة لكن أذا عندك خبرة في الحاسب الألي روح الدعم الفني جداً بسيط.. تتخرج بمعدل عالي وتروح الأمن العام أذا حاب طبعاً,, لأنه نادراً ما تجد من خريجين التقنية متوظفين في غير القطاع العسكري..

عندك أنا خريج قبل سنتين تخصص شبكات معدل 4,92 وخلها على الله .. الطول ما يساعد ولا الأمن العام زين .. لكن الحمد لله نكمل بكالوريوس وعين الله ..

بالتوفيق ..

أنصحك بالحاسب ،،
فيها شوي مصطلحات إنجليزي ،، لكن راح تمشي التزم بالحضور وربك بيسهل لك ..
هذا إذا كان شهادتك الثانوي علمي -
إذا كانت ادبي روح للمحاسبة ....

[align=center][/align]نظام الكلية يسمح لك ترتع في أي قسم تحب بس لازم تجيب الترم الأول معدل عالي يعني فوق 4.75 بعدها أشر وتبشر بالي تحب من الأقسام

بالنسبة لي أشوف المحاسبة أفضل

لأنكـ إذا نويت تكمل وأنت على راس العمل يمديكـ تكمل انتساب

والله يكتب لكـ اللي فيه الخير

انا اشوف تخصص تقنية الادارة أفضل لك محاسبة او تسويق او مكتبية


المحاسبة :

متوسط السهولة :تركز على الفهم والممارسة والمذاكرة في البيت ملاحظة لا تخف (مافيها رياضيات ابد ) وتعبر مادة المحاسبة مثل السلسلة يعني لازم تفهم من البداية واذا طفت اي شي ما راح تفهم الدروس القادمة لانها راح تكون عليك متراكة وصعبة


ركز وظيفة المحاسبة رائع جداً ومتوفرة بكل مكان مافي شركة بالعالم او حتى بقالة او حتى مستوصف او حتى الدوائر الحكومة المدنية او العسكرية الا وفيها قسم محاسبة او الادرة المالية.

وتقدر تكمل بعدين بكالوريوس



التسويق :

سهله :مادة نظرية وحفظ ويطلبون بعض البحوث


تقدر تكمل بكالوريوس على حسب كلام المؤسسة بالمرحلة القادمة


الادارة المكتبية :

سهله جداً : في مادة الطباعة , ممكن ما تطلع من القاعه الا وتطبع صفحتين او ثلاثة . يحسب لك السرعة وعدد الاخطاء والوقت , والدرجة يعطيك اياها البرنامج نفسه وايضا التخصص فيه بحوث ايضاً.هذا الي اعرفه

تقدر تكمل بكالوريوس على حسب كلام المؤسسة بالمرحلة القادمة

الدعم الفني : يتكلم عن الفورمات وعن الصيانة وعن فك الجهاز وعن بعض البرامج

تقدر تكمل بكالوريوس



انا حريص على نصح اخواني وحاولت أبين لك كل التخصصات علشان ما تندم على الاختيار .