الطيب فرصة والجماليل توافيق

المار · #1 (**permalink**) 21-06-2008, 11:05 AM

الطيب فرصة والجمايل توافيق
ومن لاتوفق ماكتب له جماله
ومن لارقى للطيب روس الشواهيق
مازان له وقته على ما بداله
وما دام لفعول الجمايل عشاشيق
كسب الجمايل ما يجي بالسهاله
ولو أنها تشرب مع فكة الريق
كلن خذاله كل ما أصبح بياله
والطيب منوه للقلوب المشافيق
كلن يتوق ومنوته راس ماله
والمدح ما يزهي على الرجل ويليق
إلا لا صارت وافيات خصاله
يستاهله رجلن يفك المزانيق
اللي يقال ونعم لا جا مجاله
ومن ساقته نفسه وهو ما بعد سيق
لأجل الجميل يزين الله فاله
والمرجله ما هي بتحتاج تنسيق
من قلب اللي عشقها وباله
ومن عادة الدنيا تخون المواثيق
تفتر مكرتها سوات المحاله
ولولا اللوازم ما عرفنا المخاليق
ما نعرف الرجال لين انعناله
والكفو تظهر فزعته حزة الضيق
وينشاف في الشدة بعين العداله
نسل الرجال متعبين الملاحيق
متوسطن من بين عمه وخاله
واللي يطيق ولا بغى قال ما أطيق
تحرم عليه المرجله والشكاله
والهينه تكبر على اللاش والهيق
له في الرخا قاله وفي الضيق قاله
والطيب شاره والضماير صناديق
واللاش طيبه ما تعدى ظلاله
وأنا أسبر قلوب الرجال المغاليق
والصامت أقطع غايته من مقاله
وما دام في الدنيا رجال ومطاليق
نصيتهم واللاش مالي وماله