الموظف السحلية: هذا قدام ربعه وجه ومن ورا ربعه وجه اخر ... يبدل جلده حسب المصلحة (اعرف موظف يسوي نفسه انه يكره سفارة بلاده ومن تحت لين تحت يتصل على السفارة ويضبط معاهم بالكلام الحلو) ... تلاقي الموظف السحلية مع المطوع يسو نفسه مطوع ومع الفاسدين يسوي نفسه فاسد .. الخ


الموظف القرد: هذا وظيفته يضحك المدراء ويوّنسهم (اعرف موظف في جهة عمل مشهورة عالميا ترقى 3 درجات في 4 سنوات لانه يونس مديره بالنكت والسوالف الحلوة)


الموظف الثعلب: هذا ذكي ويعرف من اين تاكل الكتف ويترقى بسرعة رهيبة بذكاءه ولكن جبان نوعا ما ومايقدر على الاسد والنمر


الموظف الثعبان: هذا موظف يلدغ ربعه وينشر الفتن بين ربعه عشان يتهاوشون ويتقاتلون وعقب هو يتسيد الموقف .. وغالبا يكون مريض نفسي بسبب تاريخه السيء (اذكر كان معانا موظف وظيفته ينقل كلام ويفتن بين الشباب على طول ... مايعرف يعيش بدون غيبة او نميمة او اساءة لاحد ... والسبب ان تعرض لاضطهاد من ابوه وربعه وهو صغير)



الموظف الخرتيت : وهذا دوم تلاقيه يناطح الناس بسبب وبدون سبب ويكون معارضة في الغالب.



الموظف الطاووس: هذا موظف مغرور او متكبر او مخيس النفس, ودائما مايتنتف ريشه في النهاية ... (خير شر ما اذكر موظف مغرور ماتنتف ريشه)



الموظف الضفدع: وهذا موظف دوم يتذمر ويتشكى ولايسوي شيء ..تلاقيه مثل الضفد جالس في البركة وينعق يصوته... ويامكثرهم بس


الموظف الهدهد: موظف على درجة عالية من الحكمة ويعرف كيف يقرا السطور ولكن للاسف مايتحرك ولايسوي شيء



الموظف الغراب: هذا موظف نمام وينقل الكلام بين الموظفيين وغالبا هدفه فرق تسدج



الموظف التمساح: هذا يسوي نفسه طيب ومتدين وراعي اخلاق وفي النهاية يغدر في ربعه في لحظة ماينتبهون لها



الموظف الذبانة (الذباب): اذا رايت موظف مامنه فائدة وتسال نفسك ليش الدولة موظفة هذا الشخص فاعلم انه هو الموظف الذبانة ... وهو مايطلق عليه بطالة مقنعة



الموظف النحلة: قليل الكلام وكثير العمل, يعطي عسل صافي فيه شفاء للناس ... وهم الوحيدون الصادقون في نياتهم ... اما الباقي فكل يبحث عن (حاجته)


الموظف الذئب: هذا موظف لايعرف كيف يعمل لوحده ... بل يبحث عن قطيع ليعمل معهم ويبدا بوضع الخطط للسيطرة على العمل ومفاصل الشركة ... وهو مايطلق عليهم بال (شللية)


هذه هي الحياة



هذا والله اعلم