السلام عليكم ورحمة الله وبركاته..
أنا طالب جامعي , حصلت على عمل 6 ساعات يوميا لكن المفاجأة !

إخواني انا قدمت على شركة ليتل سيزر وقبلوني الحمدالله , المهم سويت المقابلة وكل شيء وتيسرت , كنت مبسوط إلا إن الموظف اللي سوى المقابلة معي بدأ يحطم أمالي أمل تلو الآخر , المهم يوم جيت أسالة عن الدوام قال الدوام 6 ايام بالاسبوع ويوم إجازة ولازم تكون مو مسجل بالموارد البشريه.
طبعا يوم الإجازة يقولك تاخذة من الأحد الى الاربعاء غير كذا لا يعني بالويكند مستحيل آخذ إجازة, أظف إلى ذلك إن اول 3 ايام الدوام 6 ساعات , وثاني ثلاث ايام 8 ساعات الى آخر يوم بالدراسة يعني الخميس والسبت والأحد 8 ساعات , هذا وأنا طالب جامعي , لكن الحاجة حدتني.

قلت له ما أستطيع أداوم كذا أنا دراستي تحتاج متابعة.
المهم ما علينا , سألته عن الراتب فقالي اول شيء تداوم فترة لين تترسم قلتلة كيف وكم الراتب بيكون؟
يقول بتداوم اول شهر او شهرين او مدري كم لين تثبت نفسك بعدين نرسمك , طبعا مصلطلح
(نرسمك) ما عجبني لأني في شركة خاصة 100% , المهم قلت له كم الراتب إلين أترسم , سألته ويا ليتني ما سألت , يقول 10 ريال على كل ساعه تداومها يعني أحسبوا 3 ايام الدوام يكون فيها 6 ساعات , وثلاث ايام 8 ساعات.. اي ان الراتب راح يكون مجمعه 1680 ريال فقط لا غير إلى أن أترسم.

انا حقيقة الوضع مو عاجبني جدا.

بالله عليكم وش رايكم؟
راتب 4000 الآف مع دعم الموارد وش رايكم؟
وش رايكم بعدد ساعات الدوام كطالب ماهي ظلم؟
ايضا راتب ما قبل الترسيم ماهو حرام أندعم ويعطوني 1680؟
تسأؤلات كثير تدور في ذهني لكن شوروا علي بالشور الطيب.

اشكركم كل الشكر إخواني الكرام والله يوفقكم ويسعدكم..

اتركهم ابحث عن الافضل والطلاب لهم دوام جزئي

يارجال ذولي يلعلو عليك ارتكها بارجل حارس امن 4400 من غير دعم وكبام فاضي ارتكها

عندك هرفي وماك هرفي ٤٨٥٠ ريال وست ساعات واجازة وقت الاختبارات

هذولي نصابين شوف لك شي ثاني مثل ماقالو لك الشباب ولا تتحسف عليهم اذا تركتهم مافيها خير الشركة هذي ابد

ماك وهرفي وكودو ازين لك ياخوي قدم لهم برنت انك طالب ويراعونك ورواتبهم حلوه هدهم بسس ولاتستعجل دور وابحث