بسم الله الرحمن الرحيم

قبل كم يوم شفت موضوع هنا لأحد الاخوان الله يجزاه خير
حط فيه ارقام لبعض المؤسسات اللي فيها وظائف للجنسين
جربت اتصلت على كم رقم.. وفيه اللي يقول ارسلي السيرة على الايميل واللي يقول بالفاكس
واذا توفر شاغر بنتصل..
لحد ما وصلت لرقم من الارقام ورد علي شخص مهذب كثير
سألته عن التوظيف عطاني رقم وقال دقي عليهم لو ما أحد رد عليك ارجعي لي
وفعلا دقيت ومحد رد..
رجعت ابلغه..وطلب مني افتح السايت تبع المؤسسة واعبي بياناتي وبعد كذا
أعطيه رقم السيفي عشان يتابعه..
سويت كل شي طلبه مني ورجعت ادق عليه عشان اعطيه الرقم حق السيفي
سألني عن مؤهلي وبلغته اني بكالورويس لغة عربية تربوي واني اجيد استخدام الحاسب
وعندي دورة بعروض الملتيميديا وبأصمم على الفوتوشوب يعني ممكن اصمم اعلانات لهم..
وسألني عن الانجلش وقلت له مش تمام
قال طيب بحاول ادور لك على مؤهلاتك.. وقفل على اساس يرجع يتصل لما يلاقي شي مناسب
وقلت اكيد بياخذ اذا ما كان ماعاد بيتصل..
بعد ساعتين تقريبا.. رجع اتصل علي قال وش رايك بوظائف البنوك.. قلت له اشتغل اي شي
اقدر عليه.. قال بس مو تبع مؤسستنا راح اكلم لك ناس بالبنك العربي وبيرد علي
قلت له اوك.. راح ورجع قال لقيت لك شغلة تسويق بنكي في ساب.. وش رايك؟
قلت له خلني افكر وانا كل هدفي استشير أهلي..
كلمت ابوي وعلمته على السالفة كلها.. أبوي قال انا اثق فيك وأعرف انك لو شفتي ان هالوظيفة ماراح تناسبك ولا تناسب وضعك(كأنثى يقصد) راح تتركيها..
وعطاني حرية التجربة مع انه ما يرضى فيها لخواتي الاصغر مني بس بحكم اني كبيرة وواعية
عطاني هالفرصة..
رجعت دقيت على الرجال.. وقلت له اني موافقة خصوصا انه علمني ان الراتب 3500 ريال
واتفقنا انه يشوف لي الوظيفة..

ثاني يوم اتصل علي قال وظيفة التسويق في ساب جاهزة ولو تبغي من اليوم راح تكوني فيها
لكن فيه دورة مجانية من بنك الأهلي إذا تحبي تلتحقي فيها ومدتها شهر .. اذا حبيتي الموضوع فهذه الدورة راح تعطيك فرصة أكبر تكوني موظفة رسمية في البنك وطبعا افضل من وظيفة التسويق.. بصراحة انا فرحت كثير بالدورة بس برضه طلبت منه فرصة افكر.. ورجعت استشرت ابوي الله يحفظه.. وقال لي ان الدورة على ما يبدوا مفيدة خذيها وكلها شهر وبعدها يصير خير.. واستشرت كذا شخص من اصحاب الثقة وأشاروا علي بنفس الشور..

رجعت اتصلت عليه وقال وش قررتي : الدورة حقت الأهلي ولا وظيفة التسويق في ساب؟
قلت له عندي سؤوال: لو قبلت الدورة ممكن الحق على وظيفة التسويق؟
قال ايه طبعا بس انا ابيك تاخذي الدورة عشان تدعمك بعدين وتترسمي بالبنك
أنا بصراحة كنت مرة مبسوطة واخذت قرار اني آخذ الدورة.. وشكرته ودعيت له
وقلت له الله يعطيك العافية وماقصرت ياخوي..وأنا بنفسي ادعي له من قلبي
قلت لو واحد غيره كان قال ماعندنا وظيفة وانتهينا.. لكن هو ولد حلال وقف معاي
وهذا شي حنا البنات نحتاجه لأن احنا بمجتمع ذكوري لازم يكون لنا واسطة رجالية عشان تمشي امورنا..
المهم هو اتصل علي اليوم وبلغني اني انقبلت بالدورة (البنك الأهلي)
وارسل لي ايميل فيه كل بيانات الدورة ورقم المسؤولة عن الدورة اتصلت عليها
وبلغتني فعلا اني مقبولة وان اسمي من ضمن المدرجة اسمائهم بالدورة
بس قفلت منها الا الأخ يتصل .. شكرته وقلت له معروفك ما انساه وحاولت انهي معه المكالمة لأن فعلا ماعاد فيه شي ينقال..

بعد كذا كانت الصدمة
قال لي: ممكن اتصل عليك في المساء؟
قلت بكل هباله : ليه؟
قال يعني مو حابة؟ وأنا لحد الحين مو مستوعبة
قلت له: طيب يعني فيه شي ؟ أنا بديت اوسوس بس قلت يمكن فيه شي بلاش أظلمه
ولا اتهور..
قال: يعني عشان نتكلم في امور الحياة وهمومها
قلت له: مافهمت(طبعا انا فهمت بس ودي انه يستحي ويسحبها ولا يلفها من هنا ولا من هنا)
قال : ودي نكون أصدقاء<< صدمة
سكت وأنا كلمة (لا) منعقد فيها لساني وأكثر منها ودي اسفل فيه واقفل
بس انخنفت .. ويلي من هالسنين اللي ضاع فيها عمري وانا ادور وظيفة
تسندي بكرة وويلي من هالمجتمع اللي مافيه حد يقدم مساعدة لوجه الله
انتبهت وهو ينادي اسمي .. قلت له نعم وانا العبرة خانقتني .. قال وش قلتي؟

رديت: قلت الله كريم
قال يعني ما اتصل ؟<<,وقاحة

قلت لا.. لا تتصل لأني ما اقدر اكون صديقة أحد وقفلت

مر كم يوم وأنا احلم بالوظيفة وانهار كل شي

بعد ربع ساعة اتصل من تلفون الدوام دريت

قال أنا فلان يا استاذة... حبيت ابلغك ان كل بيانات الدورة واضحة عندك بالايميل
وان هذا آخر اتصال <<يعني ماعاد لك شي عندي

أنا كذا ولا كذا ما كنت راح ارجع اتصل عليه بعد طلبه
بس انقهرت .. ليش كذا؟!!
مافي حد يسوي شي لله..

ودي اسألكم آخذ الدورة اللي دبرها لي ؟
أخاف أقبلها وما تنفعني عقب لأني كنت معتمدة عليه لانه وعدني يكلم ناس معاه
عشان آخذ وضع كويس

يارب عوضني خير

ادعولي ربي يوفقني بوظيفة

يالله
والله ما ادري ايش اقولك يا اختي
انا بجد مصدومة اكثر منك
نصيحتي لك لا تاخذي الدورة ما تدري يمكن لما تداومي في الدورة يكون تكلم فيكي عند احد هناك
تلاقيه يقولهم هذه البنت انا اعرفها وساعدتها ومن هالكلام
ويمكن يتكلم فيكي كلام وحش عشان مارضيتي تكوني صحبته
لا تزعلي من اللي حصل وهذا اعتبريه درس لك

وعموما انت برضو شوفي اللي يناسبك
والله يوفقك

لا حول ولا قوة الله بالله

عن جد ناس ما تستحي ولا تختشي ونصيحة مهما حاول لا تعطينه مجال وزين الي سويتيه بس برضوا دام اسمك ثبت بالدوره روحي وخذيها ولا تفوتيها فرصه لك تكون دعم لك بالسيره الذاتيه لما تقدمي على اي بنك بعدين ولا تشيلي هم انو انك طنشتيه طنشتيه وانه كان يمكن يكون يساعدك او من هالكلام لان الرزق كله بيد الله مهو بيده ثقي بالله وانشاء الله ترزقين بالوظيفه الزينه.

تحياتي لك

اختي لا تأخذين الدوره ولا الوظيفه اتركيهم ,,,, اذا من مكالمه صار كذا اجل بعدين كيف!!!!

لابصراحه واثق بزياده يبي يشكي همومه !!! والله شفنا العجب بهذا الزمان

من ترك شيئا لله عوضه الله خيرا منه,,,


والله يرزقنا بالوظائف الحلال ويبعدنا عن الحرام ,,, وجميع المسلمين والمسلمات

انتي رهيبـــــــهـ


طبعا طنشي دوورته اكيد جابها من معارفها ولمن جاء يدبرها له يقول لبنت اكلمها !!


فأتركيها يابنت الحلال وربي صدقيني يعووضك بفرصه احلى منها بكثيير


ومن ترك شيئاً لله عوضه الله خير منه ,,,,,,,,,,,,,,,,,,,,,,,,,,,,


ولاتتحسري صدقيني تفرج والله تفرج بثقه اقولها ربي ماينسى عباده فما بالك باللي ترك منكر عشااااااااااااانه !!!!!!!

أنسـان ماعنده أي ضميـر اللـه لايوفـقه هو واللي على أشكـاله

ممكـن ترسليلي رقمـه بالخـاص

عشـان أدلعـه شوي أخر الليـل

مدري صراحه
الله يعينك قلبي
بس على الدوره مدري والله
يمكن محد يدري بسالفتك
انا احس حرام تفوتيها روحي يوم تجربه شفتي الوضع شين
انسحبي
وبعدين انتي قايله لابوك كل شي اذا رجع اتصل ثاني خلي ابوك يتفاهم معه

مدري متى العالم تكبر وتفهم

قلبي استخيري ربك
وانا اقول جربي يوم عشان ماتتحسفين بعدين

موفقه يارب

انا عن نفسي اقولك خدي الدورة من حقك عادي لانك انتي لمن اتصلتي ما كنتي تقصدي المصخرة
بس هو ساعدك على اساس انك تصادقيه فهادا شي راجعلو

الله يعين
هاذي مشكلة عند بعض الناس مايخدم إلا بمقابل شي (تفكيرهم كذا لا يتغير)
إذا ماشاف عندك شي يستفيد منه لا يــــــمكن يخدمك

اما سالفتك ماسغربها وكان عليك التوقع لمثل هالشي
وبصراحة ماقدر انصحك على شي راجع لك يمكن تكون هالوظيفة مصدر رزقك
واكون من اسباب قطعها براي او العكس

مدامك طلبتي الاستشارة والله اعتقد ان راي اختي Dazzling girl
يكون اقرب لك
والمصدوم لا يقتنع براي لأن الصدمة شي لا يمكن ينســـــــــــى

عش كثير تشوف كثير

تحـــــــــياتي