[align=center]السلام عليكم ..
مساآء السرور والرضى من الرحمن ..
عندي استفسار ياليت احد يفيدني فيه واكون شاكره له .. لأن
خلفيتي في هالموضوع صفر ولا عندي اي خبرة فيه ..
انا بعد عطاله سنين ولله الحمد لقيت عرض وظيفي مناسب لي كوظيفة مو راتب .. في شركة بقسم نسائي
سويت المقابلة والحمدلله حسيت انهم قابليني بإذن ربي من صيغة الكلام معاي ..
انا تخصصي سكرتارية تنفيذية - معهد الإدارة العامة
لكن الشغله المعروضه علي اخصائية عقود بحكم انه في فترة الثلاث شهور هذي هم بيدربوني عليها وهم اهم شي
ان معي لغة وهذا السبب الاكبر بقبولي ..
طيب بعدها كلموني اوقع معاهم ورحت انتبهت ان العقد او بالاصح عرض العمل
مو محدد فتره زمنية بس تاريح الالتحاق .. فلما سألت شرح لي شؤون الموظفين ان هذا عرض عمل مدة 3 شهور
وان بعدها يكون عقد ..
و الراتب سألوني عن توقعي و جاوبت على اللي سمعته و مر علي انه ما يقل 4000 وخصوصا ان فترة العمل
طويله صراحه من 8 الى 5 بمعنى اني اشوف المفروض انه يكون اكثرمن كذا مقابل التعب و طبيعة العمل المتعبه
والدقيقه .. في وقتها قالي توقعي انه يكون اقل لانه عرف ان ما عندي سالفه واني ابخست حقي ..
في الاخير وقعت فترة ال3 شهور بنفس المبلغ .. وقلت حاليا مو مشكله هال 3 شهور منها اعرف طبيعة الشغلة
والبيئه واذا ناسبتني او لا ومنها ادخل جو العمل واتعود عليه .. بالرغم ان ما فيه في هالفترة الا بدل سكن
بواقع شهرين بس وما فيه بدل مواصلات الا بعد الفتره التجريبية فالمواصلات علي ..
اسألتي هي :
- هل عادي ان العقد مو محدد فيه بدايته ونهايته بحكم انها فتره تجربية و اللي فهمته انه اذا مو
محدده اكون انا اقدر اتركهم او هم يزحلقوني بدون محد يطالب احد بشي.!

- في العقد جزئيه انه يتم تعيني بوظيفة كذا عالمرتبة كذا في الرياض او في اي فرع بالمملكة ..
بمعنى انهم لو بغوا ينقلوني وانا ابدا ما يناسبي برا الرياض وسألت المدير نفسه عن هالنقطه و قالي
هذي صيغة صورية للعقد وانهم يحتاجوني هنا ولا عندهم فكرة نقل بس انا سؤالي هل من الاحسن
اني اصر على تعديلها ان كتب ربي بعد ال 3 شهور اضمن .!

- طيب بعد ما اخلص ان شاء الله واثبت نفسي ونجي نوقع العقد شلون اعرف الراتب اللي استحقه
مع العلم اني مسجله عالمرتبه السابعه بس ما اعرف اي درجه وانا ما سبق لي توظفت ولا عندي خبره
وهل كل مرتبه راتبها معين او ممكن يكون اقل ..!

- هل الدعم اللي من الموارد يكون نص الراتب و النص الثاني الشركه لانه هذا اللي اعرفه لكن شفت ناس تقول انه
لا ينزاد على الراتب بمعنى اني لو اخذ 4000 ينضاف نصها زياده من الموارد وما اتوقع صحيح ..!
وهذا الدعم وش وضعه من الاساس و وش تفرق اذا گـنت مدعومهومن الموارد او لا و ليش يشترط احيانا انك ما تكون مدعوم منهم .

- هل البدلات والاجازات لازم تكون مكتوبه بالعقد ولا هي شي تلقائي معروف ..!طيب و البدلات اللي نوعا ما تكون في اغلب الشركات ( بدل سكن - بدل مواصلات ) وايش ..

- تسجيل التأمينات هل هو شي فارق او لا ..! و هل الفترة التجريبية تكون من ضمنه ..!

- هل اذا انتهت فترة ال 3 ولسبب ما الله لا يقول ما حبيت اكمل معاهم هل احرص انتبه عالتاريخ لاني
فهمت انه بعدها لو ما انهي العقد تلقائيا يعتبر مجدد كعقد عادي ..!

اعتذر لو اطلت بالموضوع ولو اسألتي كان فيــہإآ شي من الغباء بس فعلا ما عندي اي خلفية
لا سلم رواتب ولا مراتب ولا بدلات ولا مكآفآت و لا غيره ..
وما حبيت الاحساس وقت التوقيع اني ما افهم بهالشغله لكن بحكم انها فتره تجريبية
قلت خلال هالوقت اعرف اللي و اللي علي ..


شاكرة لكل من بيرد عالموضوع او حتى مر





.
[/align]

وعليكم السلام

راح أجاوب على أسئلتك حسب ترتيبها ( بس المره القادمه مسموح 3 أسئله فقط ... أمزح )


المهم بسم الله

1- بالنسبه لتحديد العقد فيه شركات تقدم عرض بالبدايه وفيه شركات تقدم على طول عقد محد وغير محدد

تقدرين تتركينهم متى مابغيتي وهم يقدرون يستغنون عنك بأي وقت

لاكن المهم بأن العقد الجديد يكون من تاريخ مباشرتك الفعلي الي هو بداية التجربه ولايكون فيه فترة تجربه

نركز زين على هالنقطه

2 - أنتي بأي منطقه أحرصي كل الحرص بأن الي يكون الي مكتوب بالعقد نفس منطقتك والفرع الي يناسبك

لأنهم بأي لحظه يقدرون يقولون روحي للمنطقه الي بالعقد

3- راح يكون مكتوب بالعقد الجديد الراتب وبدل السكن وبدل المواصلات ولاكن أنتي تستحقين بدل مواصلات

حتى بفترة التجربه

كل شركه تختلف راوتبها عن الثانيه


4- أذا كانت الشركه بنطاق الممتاز يقدرون يدعمونك حتى 4 الاف

لاكن هنا هنا هنا نركز زين صندوق الموارد البشريه لايدعم سوى مره واحده فقط بالعمر

الصندوق الأسود

يعني لو طلعتي ورحتي لشركه مدعومه ماتقبلك


5-نعم تكون مكتوبه مافيه بدلات غير الي كتبتي فيه بعض الشركات عندها بعض البدلات

مثل بدل خطر


6- الشركه راح تحرص على أنها تسجلك بتأمينات عشان تحسبي ظمن نسبة السعوده

سواء كان بالتجربه ولا بعدها


تعبت


رجعنا

7- نعم أحرصي على التاريخ قبل لاتنتهي التجربه بتكملين كملي بتطلعين أطلعي


لاتسيانا من دعائك


أي أستفسا ر أنا حاضر ِ

[align=center]
ان كانك متوظف الله يزيدك ارتقآء ..
وان كانك ماتوظفت الله يرزقك بالوظيفة اللي تريحك و على
ڪَـيـفـڪَ .. بما اننا بالبطاله
ما قصرت الله لا يهينك ..

- بس فترة التجربة اللي كانت بعقد لحالها لازم تحسب ضمن العقد الجديد ...؟

- انا عارفه اني استحق بدل المواصلات وخصوصا من عذره الغير مقنع و اللي ماله اي علاقه
( انتي عملك مكتبي وحنا عندنا ناس تطلع مثلل مهندسين وكذا وهذا المقصود فيه ) حسيت ما شاء الله
اني اجيهم طايره بالهواء
وماعندي ان شاء الله مشكله بهالفتره لاني حاليا اروح مع اخوي او ابوي وقريب من دوامي و توقيتي لكن
بناقشهم ان شاء الله وقت التوقيع عشان في حال احتجت اجيب سواق ..

- طيب دعم الموارد ليش لو طلعت ورحت لشركه مدعومه ما تقبلني هل لانهم بيون الموارد يدفعون النص
طيب اذا كانوا يحتاجون تخصصي هل يبرفضون الين ما يلقون احد مدعوم .
وكيف اعرف ان هذي الشركه مدعومه او لا ..!

- بالنسبة للتأمينات حاليا ادخل هويتي يطلع اني مو مسجله عندهم ..
وهل التسجيل عندهم منه فايده كبيره غير انهم يشيلون 9 ٪ من الراتب كتقاعد ( الله يحيينا )

ادري كثرت استفسارات بس لا غنا عنكم الله ينفعنا ببعضنا البعض ..

و من جد الله يعطيك الف عافيه على وقتك ..

- [/align]

1- أوكيه تحسب بالعقد الجديد بس يكون بداية العقد من تاريخ مباشرتك الي هي يقولون عنها تجربه

2- بدل المواصــــــــــــــــــلات يعني من المنزل الى العمل هذا النظام

ماله دخل بالعمل الميداني , العمل الميداني يصرف له بدل تنقلات

3- عادي يرفضون لين يلقون وحده نفس تخصصك الا أن كانت شركه قويه يتعاقدون معاك مباشره

4- لحظه نستنا نصبر أسبوع ونشيك وكل بعد فتره نشيك عشان نتأكد سجلونا بتأمينات

واهم شي اختي تاخذي صوره من العقد

حتى تثبثتي حقك بعدين

ترى ناس كثيره تبهذلت لان مامعها صوره من العقد