السلام عليكم ورحمة الله وبركاته

كل عام وأنتم بخير / وجعلني الله وإياكم ممن يدخلون الجنة من غير حساب ولا عقاب ..


أخواني اناموظف بقطاع خاص وجمعت لي كم قرش وبخاطري اسوي ( مشيريع ) صغير ..

بصراحة انا عاجبني محل الخضار .. وخصوصا أنه مايكلف ولا يتطلب رأس مال كبير ..

فإذا ربي كتب لي وفتحت محل ماراح اجيب عامل لأن بنشتغل فيه أنا واخوي ..

ابي أرآئكم ..
- هل هذا المشروع ناجح او لا وخصوصا أنه بيكون بالرياض وتحديدا غرب الرياض .
- التكلفة التقريبية لعمل مثل هالمشروع .
- الإيجابيات والسلبيات للمحل .
- اجراءات استخراج رخصة هل يتطلب وجود سجل تجاري

.. ولكم جزيل الشكر

من ضمن مشاريعي الدفترية و(التخيلية) وحسب ما قرأت ومن الخبرة إنه فيه خير كثير الله يرزقك من واسع فضله وانا أقول توكل على الله ,,والتكاليف تعتمد على الموقع والمساحة بالنسبة للإيجار!؟ والمصادر اهم شيء وتأمينها فجر كل يوم من السوق المركزي(الحراج) بالإضافة الى خدمة التوصيل للساكنين بالموقع وممكن تطويره مع الوقت الى متطلبات المنزل اليومية(خضار ولحوم وتموين)

وعليكم السلام


مشروع ممتاز وفيه خير كثير بس محتاج همه ونشاط وحسن معاملة الزبائين وأهم شئ لا تبيع وأنت لبس ثوب بلمحل البس أي لبس غير الثوب مو عشان شئ بس غير عملى وبعض الزبائين يوم يشوفك سعودي يفكر أسعارك دبل هذا شئ

والشئ الثاني خلى عرضك حلو وديكور مرتب وحط كميات

وبخصوص الأجرءات أن شاءلله تكون سهله مجرد رخصه من البلديه وأنتهى الموضوع

بتوفيق أن شاءلله

بتوفيق ان شاء الله

بالتوفيييييييييييق

رجل يبي ينجح / يعطيك العافية .. تتوقع مبلغ ال30 ألف بيكون كافي ويغطي كل إحتياجات المشروع ؟!

عابر قآرات / مشكور ياتاج راسي .. بالعكس في ناس إذا شافوك سعودي تشتغل بمحل يتساعدون معك وينبسطون من هالشي .. وإذا عندك خلفية هل في إشكال إذا صار إسمي مسجل بالتأمينات إني موظف قطاع خاص .. يعني إخذ رخصة محل وانا موظف قططاع خاص ؟

أم سهيلة + نقطة آخر السطر / ربي يوفقني وإياكم إنتم ومن تحبون ..

وياليت الإخوان اللي عندهم خبرة بالمشروع يفيدونا .. ولكم جزيل الشكر ..

مشروع ناجح بكل ماتعنيه الكلمة
ولكن لنجاح المشروع اهتم بالآتي /

اهم شي وقبل كل شي الموقع ثم الموقع ثم الموقع .. مثلا الموقع على شارع تجاري حرك مكون من فتحتين والمساحه الداخلية فيه ممتازة + جمبك تموينات او سوبر ماركت او بجانبك مسجد سواء كان جامع او عادي

صلاة الفجر والاستغفار احرص عليها

خلي شغلك نظيف .. بمعنى يكون خضارك نظيف وجودته عاليه وغلف الخضار بالنايلون على نص كيلو وربع كيلو وكيلو في فلين

لاتجيب للزباين من اردى الفواكه والخضار بل من أجوده , كبداية املأ المحل من الخضار والجح والورقيات والتمور وقلل من الفاكهة , مثلا الكيوي والخوخ والعنب على صندوقين ,, الموز والتفاح والبرتقال على ثلاث صناديق ويختلفن بالادوار ,, الكرز والبخارى والمشمش على ثلاث صناديق والباقي خضار وورقيات وجح .. بعد كذا مع مرور الايام اذا شفت الناس انكبت عليك وخصوصا يوم الجمعة وكثروا زباينك فلابد ان تملأ المحل بمبلغ 4 الاف - 5 الاف ريال ولاتخاف كلها بتتصرف وبتروح

غلف الورقيات بالمناديل والنايلون حتى ماتخرب عليك

خلك سمح في البيع لو نقص عليك ريال وريالين بيعه لاتمنعه من الشراء واكسب الزبون بالابتسامه الطيبة وبعض الفكاهة والاحترام والكلام الطيب الحسن واستقبله بالبشاشة والترحيب

اذا عرفت زبائنك لمدة اسبوعين الى ثلاثه اسابيع يجونك دايم ويشترون عندك ورغب بالتسجيل عندك الى نهاية الشهر فاسمح له

جب لك ثلاجتين عرض تبريد

اهتم بالانارة الداخليه وتبريد المحل بالاسبلت .. اهتم بلوحة المحل تكون واضحه وكبيرة شوي على مقاس الفتحتين واهتم بالانارة الخارجية

اهتم بنظافة المحل

عامل يساعدك في التحميل والتنزيل وتنظيف المحل ويكون ايضاً توصيل الدباب

مبلغ 30 الف غير كافي لفتح المشروع على وصفي .. انا ماحطمك !! ولكن هذي الحقيقه اذا كنت تبغى الشغل اللي عليه الكلام ودخل شهري فوق الممتاز

اما اذا تبي تطقطق فمبلغ 30 الف ينفع لك داخل حارة تكون الفتحه ب8 الاف الى 10 الاف وبيغطي مشروعك بالراحه .. بس في الشهر يجيب لك 5 الاف تحطها في جيبك ويكون زبائنك محدودين

عمي الصابر / تشكر على الكلام الأكثر من رائع .

وكل اللي تكلمت عنه ممتاز ويستفاد منه ..

لكن استاذي الفاضل فيه نقطة اخالفك فيها .. اللي هي أنك تبدا بمحل فتحتين او بمبلغ شوي كبير على مشروع بسيط مثل الخضار ..

لما تتكلم عن السلعة الأساسية اللي هي الخضار ممكن ماتكلف 5000 ريال .. وباقي المبلغ بيكون كماليات لا أكثر ...
يعني أيجار محل ترتيب وتجهيز .. إلخ

ومثل ماقلت اهم شي البضاعة تكون جودتها ممتازة وبعد نظافة المحل وترتيبه له دور في أن الزبون بيرتاح لك ويرجع او انه ياخذ فكرة من أول مرة ويبطل يرجع .. وأنت بالأول والأخير بيهمك الزبون أكثر من أي شي ثاني

خلاصة الكلام
أنا أول مرة اسوي محل وادخل مشروع بسيط مثل هذا فصعبه أنك تبدا بداية قوية ..
بالأول محل صغير لين اعرف اسرار الشغلة واشوف نفسي إذا اموري تمام كملت واذا تخربظت الأمور أبطل وبكذا مااكون خسرت شي كبير اتحسف عليه واولا وآخرا الرزق من ربنا سبحانه وتعالى


وارجع اقولك .. كلامك جداً جميل ولك كل الإحترام ...

حبيبي الغالي فتحه وحده لمحل خضار مايصلح بيصير المحل ضيق عليك واحتمال ماتقدر ترتب فيه البضاعه بل واحيانا تضطر انك ماتكثر بضاعه واجد لصغر المحل

لكن لو تاخذ فتحتين فأول شي راح ينشرح صدر الزبون للمحل من وسع المحل وثانياً تعرف ترتب بضاعتك صح

البداية القوية هو انك ماتبدأ بملئ المحل من جميع الاصناف بالدرزن وماتبالغ في شراء الثلاجات والرفوف , اما البضاعه كبداية لك 1000 ريال

الايجار لفتحتين (بالنسبة للخضار ) لو كان في موقع ممتاز جدا فلا يهمك الايجار خذ المحل وانت مغمض لانك انت اصلا الكسبان

نصيحه اخوية لك : تبي الشغل التمام وماتتحسف عليه ؟ اصبر الين تجمع لك مبلغ محترم في حدود الـ90 الف والله ترتاح بالمحل وبتنبسط اكثر اذا شفت الناس متكاثرة عليك وانت تبيع وتشتري وتاخذ وتعطي معهم ومحلك مرتب متعوب عليه وخلال 3 - 4 شهور بيصير في يدك يومياً 600 الى 800 ريال ربح صافي لك يعني شهريا مايقارب 20 الف الى 25 الف ريال لك .. والله ياشيخ ان تذب وظيفتك وتستمر على تجارتك بالخضار

انا ماابغاك تضيع هالمبلغ اللي معك واذا شفت الناس مايجونك بتمل وتتحسف وبتيئس ثم تسكر محلك , لان مبلغك هذا ماينفع الا بمحل داخل حارة ونادر احد يجيك وزباينك بيصيرون محدودين واحيانا باليوم مايجيك الا 10 اشخاص فقط اللي يبي بصل واللي يبي خيار واللي يبي بقدونس يعني يمكن تبيع في هاليوم 60 الى 80 ريال .. اجلس في المحل طول يومي وفي الاخير مايجيني الا ربح 120 - 150 ريال في اليوم وش الفايدة !! اجلس على وظيفتي ابرك

اذا بتفتح محل خضار في موقع ممتاز فلا بد من فتحتين ولا وش الفايدة .. اقل شي يجي ربحي باليوم 500 ريال ولا مااجلس بالمحل ,

الخضار مافيه خسارة نهائيا , فقط يحتاج منك همة ونشاط مع الامور اللي ذكرتها لك بالرد السابق والله بيوفقك وبيرزقك

الصابر / الله يجزاك كل خير ويوفقك على كل المعلومات الحلوة اللي بتفيدني ان شاء الله ...


وشاكر ومقدر ..