السلام عليكم ورحمة الله وبركاته


كل عام وانتم بخير


كتبت موضوع قبل العيد إني عندي أرض وابي ابيعها واشري تريلا


المهم أخذت نصائح بعض الأخوان هنا ومابعت الأرض ودبرت مبلغ معين وقلت نبدأ به


المهم شار علي واحد يقرب لي وقال تعال نشري برسيم الحين ونبيعه بالشتاء لانه يغلى .. قلت تم


والله ونروح وناخذ لنا مستودع للأجار بتسعة ألاف سنوي ( طبعا داخل مزرعة حقت واحد مومحتاجه )


وعطيناه الفين وقال الباقي بعد ست شهور يعني بالشتاء بعد مانبيع


قلنا نبيلنا 3 أو 4 تريلات إلى 5 كحد أقصى مبدئيا ونشوف وش يصير


قلنا عاد من وين نشري البرسيم


وبعد السؤال تبين ان برسيم الجوف الافضل على مستوى المملكه


ورحنا للجوف وسألنا عن المزارع قالو فيه مكان عند محطه يتجمعون عنده اهل المزارع


وكل وحد على ددسن ومعه عينه من البرسيم حق مزرعته وانت تسوم على سعر الحبه


هنا بدت الغبنه كل ماجينا نسوم جانا الباكستاني وزود نص ريال ....... وأنت ماشي على كذا


صراحه بغينا نرتكب جريمه تخيلو ماعطونا مجال مره ضيقوها علينا وين مانروح الباكستانيين يمشون ورانا والكاش معهم


ويالله ونشري تريلا على 9.25 مع انهم يقولون البيع بحدود السبعه ريال بس عشانكم الباكستانيين رفعو السوم


طبعا التريلا بها 800 لبنه والتحميل ب 700 ريال قطوع والتنزيل 500 وأجار التريلا 1800 للمستودع


طبعا اغلب المزارع مستأجره من مصريين او باكستانيين وأنسى يبيعون لك لو لبنه وحده


هذا الكلام صار اليوم بس قلت اكتب لكم تجربتي



ولكم جزيل الشكر

وعليكم السلام ورحمة الله وبركاته

الله يوفقكم ويرزقكم

لابد تبحث عن صاحب مزرعه وتشتري منه

واصحاب المزارع واجد
ولاتنسى
السوق هو الحكم بينكم وراح تاخذ مثل السوق او اقل اشوي

السؤال المهم

بعد التخزين وين المنطقه اللى تبيع فيها؟

على حسبتك اللى فوق

ال خمس تريلات يكلفنك مع اجار المخزن
61000
على عددالبرسيم
4000
راح تطلع عليك اللبنه بسعر
15.25

اذا كان البرسيم في المنطقه اللى ناوي تبيع فيها بالستاء
اعلى من السعر هذا الان
الامور طيبه

شف أخوي

أولا : هذا بالنسبة للتريلا الأولى

بكرا يمكن أرخص

ثانيا : البيع راح يكون أقل شي ب 18 ريال للبنة وتتعدى القيمة 20 ريال حسب التصريف يعنى

إذا تبي تبيع التريلا كامله أو تصرفها تفريد أنت وشطارتك ( حسب أسعار الأعوام الماضيه ) ... والبرسيم اللي من الجوف هو الأغلى لأنه الأجود في المملكه

ثالثا : التصريف في أي مدينه تريد لايوجد أفضلية لمدينة على أخرى .. على حسب موقع مستودعك


رابعا : وهذا الأهم أنا الآن ما أبحث عن المكسب الكبير ... أنا أحاول أن أتعرف على كل صغيره وكبيره بهالشغله

يعني لو كانت التريلا لك

أو كان المستودع لك

أو المحصول لك


كم سيكون مكسبك

اعتقد بان تبوك كذلك يوجد بها مزارع


طيب تصريفها في مدينة الرياض شلون تحياتي لكم

والله يرزقكم رزق الحلال

ياخي اكلونا هالعمال اقسم بالله شي يقهر
المشكله هي ان السعودي غير متفرغ ويبي وظيفه ودخل اضافي من مشروع يتاجر فيه
وهذا مره صعب يعني مثلا انا عندي مزرعه ومتوظف ابي احد من الشباب يديرها ويستثمرها والربح بيننا وللحين محد حسيت انه صامل واغلب الشعب متردد
بس العماله جايه من بلدها طفرانه ومديونه يبي يشتغل بالتجاره باي طريقه كل يوم جايين طاقين بابي نبي المزرعه اجار نبي نشتري التمر تمنيت يجي لو مره سعودي بس للاسف كلهم عماله وافده وغير نظاميين بعد

السلام عليكم

البرسيم مشروع ناجح فيه عمال يشترو من المزارع على دينا يحمل الدينا حوالي 200 حبة برسيم ويمشي الفجر وحوالي ساعة من المزارع إلى حائل ويصرفها على اهل الغنم بمكسب كل برسيمة ياخذ عليها ريالين او يبعها على القرى المجاورة يعني لو اخذ 200*2=400 ريال لو اشتغل مدة 15يوم *400=6000 ريال شهري ايش رايكم اجنبي متغرب وعمله مايتعدى من المزارع إلى حائل 80 كيلو او اقل يعني قريب الموقع واخر شي يطلع شهري حوالي 6000 ريال
ياناس بلدنا فيه خير وفيه تجارة غير البرسيم بمثل الخضار او الحديد السكراب من غير التجارة الاخرى بس المشكلة
حنا ياشباب نبي شي واحنا مرتاحين نبي وظيفة طبعا الوظيفة حلوه لو كان الدخل محدود اقل شي تستفيد تقاعد هذا اهم شي

انا عملت بهذا المجال والى الان اعمل فيه

ولي تقريبا سبع سنوات


عمل ممتاز ومربح جداً



واقدر أخدمك او اي شخص اخر في جميع انواع الأعلاف


من وادي الدواسر