السلام عليكم ورحمة الله وبركاته
في هذا الموضوع راح احاول اني الخص لكم مقابلتي مع قوات الامن الخاصه في ام الحمام لهذا اليوم الاثنين 12/10
وبداية موقع المقابله في مقر قيادة قوات الامن الخاصه بأم الحمام وهي في نهاية طريق خريص باتجاه الغرب مخرج الامير تركي بن عبدالعزيز
جيتهم الساعه 5 والموعد كان 6:30 طبعا خلونا ننتظر حتى الساعه 6 وجاتنا باصات واخذتنا الى داخل القياده ...
عددنا كان كبير حوالي 500 متقدم .. حضرونا بالاسماء بالترتيب الابجدي ودخلونا مبنى لتدقيق الاوراق طبعا لازم يكون معك ملف اخضر فيه صورة بطاقتك والاصل وصورة كرت العائله والاصل وصوره مصدقه للشهاده حقتك وصور شخصية مكشوف الرأس اما نموذج الانترنت مو مهم ولا احد سأل عنه ..
بعد تدقيق الاوراق رحنا لمكان الفحص وكان الفحص عباره عن كشف على عظام الساق والذراعين علشان ماتكون مقوسه وكذلك كشف على العيون لسلامة النظر وكذلك الطول لازم يكون 170 مافيه تساهل والوزن علشان يكون متناسق مع الطول .. بعض الي وزنهم نازل خلوهم يشربون ماء وعصير علشان يثقلون
وبعدها يعطونك كرت اخضر فيه موعد بالمقابله الشخصيه انا موعدي يوم 25 / 10
جيتهم الساعه 5 الفجر وطلعت من عندهم الساعه 11
تعب وارهاق وانتظارات طويله وسوء تنظيم للأسف وعسكر نفسيات ممنوع الكلام ممنوع الجوال كل شي ممنوع .. انصح من بيروح لهم انه يفطر ويروق ويهدي باله والله يوفق الجميع واي اسأله تفضلوا ..

بيض الله وجهك وماقصرت والله

طيب بخصوص اللي وزنه زايد كيلو او كيلوين وش وضعه

بـ التوفيق ان شاء الله . يعني مو مهم النموذج ؟ لاني عجزت اطبعه

الوزن الزايد كيلوا او كيلوين يتغاضى عنها والنموذج ماطلبوه ولا احد سأل عنه

طيب يالغالي سؤال أخير جهاز قياس الطول اكتروني ولا كرتون ع الجدار نفس الطواري ولا عادي

وعلى اساس الموقع انا ماادل فالرياض بس مره طالع من الرياض قبل صلبوخ في لوحه قوات الامن الخاصه يمين < هو الموقع أو داخل الرياض

اخوي وش وضع الي باقي عن 170 سانتي وهل لازم احلق ولا عادي اخفف
وهل توجد واسطات تمشي بالطول وبالتوفيق

المشكله اني ماادري وين ام الحمام هذي ياريت توصفها لي وهل فيها فنادق او سكن او اي شئ ولا مقطعه