اكمل والا ما اكمل ؟؟

انفاس مبعثره · #11 (**permalink**) 01-09-2013, 05:39 AM

اقتباس:

المشاركة الأصلية كتبت بواسطة عاطله وفقرانه

كملي دراستك الفلوس بتروح وبتصرفينها سواء جات الحرب ولاغيرها شيطانك مثل شيطاني بس انا يوسوس لي بمشروعي اكمله ولااوقف عشان الحرب بس المكتوب مااحديرده كل شيء بقدر ورحمة الله وقدرته فوق كل شيء توكلى على الله وادرسي فرصتك الحين ماشاءالله تبارك الله لاتضيعينها وقولى لشيطانك الخلاااااااااا ,,الله ييسرامرك ,,

وامرك ان شاء ..

ان الله راد اني باقول له الخلاااا الخلاااا ياشيطان الغفله ..

جزاكم الله خير جميعا شجعتوني واخرستو المتمرد اللي نشب لي وناشب بكل شي اسويه كن ماعنده غيري

عبيراء · #12 (**permalink**) 01-09-2013, 06:08 AM

وعليكم السلام ورحمة الله وبركاته
حياك الله
بخير جعلك بخير

بصراحه شرف كبير لنا كأعضاء في المنتدى تجين وتستشيرينا فجزاك الله خير وشكراً على الثقة الغالية .
يبدو لي استقريتِ على الإكمال وهذا زين ما اخترتِ

انا شفت موضوعك قبل ما يرد الأعضاء بارك الله فيهم وتشائمت لما شفتك تطرين انك تنوين تكنسلين الثانية

تعوذي بالله من الشيطان ودوسي عليه وأي مثبطين من حولك لا تلتفتين لهم وكأنك ما سمعتِ شي .
الفرص المتوفره لك والي بتوفيق الله انعم بها عليك الصحه والمال والحصول على التخصص الي تتمنينه شي يفتقده البعض بسبب العجز المادي او النقص في الصحه وعدم التمكن من دخول القسم المحبب للشخص .. كثير لما كملوا ندموا على الاقسام الي اختاروها او وقف بعضهم في نص الطريق وما كمل .
مسألة ان الشهادة مثل ما يقول البعض تتعلق في المطبخ او غيره من الالفاظ مو وارده عند كل من تخرج من الجامعه .. فيه كثير اجتهدوا وثابروا لحد ما وصلوا للي يتمنون من وظايف او إكمال ما جستير ودكتوراه .. تابعي المنتدى وبتتأكدين من هالشي .
اما سالفة الحرب فشي علمه عند الله ولاهوب اكيد انها بتصير فليش اعطل نفسي واضيع سنه من عمري وانا خايفه من شي مشكوك فيه .. الرسول صلى الله عليه وسلم يقول : ( إذا قامت القيامه وفي يد أحدكم فسيله فليغرسها ) هذا والناس في ذاك الوقت لاهين بالطامه ومشغولين بحدث عظيم ومع هذا امرهم بإتمام عملهم فكيف لو صارت انتظار حرب ممكن تصير وممكن لا .
يقول عليه الصلاة والسلام : "المؤمن القوي خير وأحب إلى الله من المؤمن الضعيف وفي كلٍ خير، احرص على ما ينفعك واستعن بالله ولا تعجز وإن أصابك شيء فلا تقل: لو أني فعلت كان كذا وكذا، ولكن قل: قدر الله وما شاء فعل، فإن لو تفتح عمل الشيطان "
نسأل الله لك التوفيق والسداد والنجاح الدائم والوصول لما تحبين وتتمنين .
تحياتي لك

عاشقه كوريا · #13 (**permalink**) 01-09-2013, 06:58 AM

-

انا تعليم عن بعد جامعة الامام
وفيصل وجامعة الامام يتشابهون
وعلى فكرة الدراسة سهلة ويسهلون عليك
ذاكري الملازم واجتهدي وتجيبين معدل كويس
وترا فية موضوع في المنتدى عن التعليم عن بعد يعلمونك عن كل شي

الراآسيه · #14 (**permalink**) 01-09-2013, 07:53 AM

واضح تمامااا أنك اتخذتي قرار إيجابي ويرضي رغبتك أنت
يارب وفق أحتي وكل الأعضاء إلى مافيه خيرهم ومصلحتهم

بروسيوس · #15 (**permalink**) 01-09-2013, 10:30 AM

خلاص نويتي تكملين اخ بس من شيطانك لو انه عندي كان مردغت فيه ماقدر عليك هههههههههههه

المهم يالغاليه اتمنى مااعتبر من المثبطين
انا اعتبر ان الدراسه نوعين
دراسه بقصد الدراسه والتحصيل العلمي ومواصلة المشوار الى مراحل متقدمه دون الاتفات لموضوع الوظيفه والتوظيف فهذا النوع من جد لو يدرس باخر الدنيا ماعنده اي مشكله لان هدفه واضح

النوع الثاني
الدراسه بقصد الوظيفه هذا من المفروض مايدخل مجال الا يعرف ويتأكد ان دارسته بعد ما يتخرج يحصل على وظيفه غيرها ورب البيت مااضيع دقيقه بدراسه ماتوصلني لههدفي

والمجالات الوظيفيه المتاحه للبنت السعوديه بالوقت هذا فقط هو التمريض والتعليم لكن التعليم خلاص تشبع باقي التمريض

بالاخير خيتو انفاس اتمنى لك التوفيق وهذي وجهة نظري و اتمنى ماتأثر عليك

جانيت · #16 (**permalink**) 02-09-2013, 01:48 AM

أنفاس
الله يوفقك وتكملين دراستك على خير..
صدقيني كثير من البنات اللي تركوا الدراسة بعد مادارت فيهم الدينا ندموا على اللحظة اللي قرروا فيها هالشي..
ولو تلاحظين الحين أغلب الشباب رجعوا يكملون دراستهم وبقناعة شخصية منهم..

المهم
نصيحة ابعدي عن كلية العلوم ولايغرك مدح الناس..
طالما إنك بتدرسين بتدرسين ادرسي شي تستفيدين منه..ويخلف تعبك
أول شوفي ميولك وشوفي كل الكليات والتخصصات اللي عندهم..
وبعدين قرري ولاتسمعين لأحد..
والله يكتب لك الخير

انفاس مبعثره · #17 (**permalink**) 02-09-2013, 01:49 AM

هلا وغلا عبيراء كلامك جميل سليم والشرف لي انا اللي استشرت ناس واعيه ومثقفه مثلكم ..

عاشقة كوريا شاكره لك وان شاء الله.. الله يسهل ,, وبسنتر بذاك القسم وانشب لهم ..

حجابي نجاتي .. امين يارب العالمين واياك بعد .. واشكرك من كل قلبي < لعلمكم ترى هي اللي قالت انشدي الربع

بروسيوس .. ابشركم غلبته اخرسته وسددت وتدبست

شاكره لكم جميعاً من اعماق اعماق قلبي

انفاس مبعثره · #18 (**permalink**) 02-09-2013, 02:00 AM

اقتباس:

المشاركة الأصلية كتبت بواسطة جانيت

أنفاس
الله يوفقك وتكملين دراستك على خير..
صدقيني كثير من البنات اللي تركوا الدراسة بعد مادارت فيهم الدينا ندموا على اللحظة اللي قرروا فيها هالشي..
ولو تلاحظين الحين أغلب الشباب رجعوا يكملون دراستهم وبقناعة شخصية منهم..

المهم
نصيحة ابعدي عن كلية العلوم ولايغرك مدح الناس..
طالما إنك بتدرسين بتدرسين ادرسي شي تستفيدين منه..ويخلف تعبك
أول شوفي ميولك وشوفي كل الكليات والتخصصات اللي عندهم..
وبعدين قرري ولاتسمعين لأحد..
والله يكتب لك الخير

امين يارب ويوفقك بعد ..

وصدقتي انا وحده منهم ندمت على الكليه الخايسه اللي درست فيها وطاحت وثيقتي بكبدي ..

اخذت ادارة اعمال مدري حسيتها انسب شي لي راح استفيد منه اكثر من التخصصات الاخرى بعدة مجالات .. والشي الثاني والاهم اختي ادارة اعمال انتظام تساعدني

شاكره لك جانيت

أُتـرَجة · #19 (**permalink**) 02-09-2013, 04:29 PM

هلا أنفاس

الف مبروك مقدماً ,, والله يوفقك يآرب

وبما أنك صرتي خبرة ..عادي أسجل ماستر عن بعد ؟..>بالدس يعني >جهة عملي رافضة >أول مره بحياتي أشوف أحد يرفض أحد يتعلم رغم تعهدي > أنتهت القصه ..

انفاس مبعثره · #20 (**permalink**) 03-09-2013, 05:45 AM

اقتباس:

المشاركة الأصلية كتبت بواسطة ≈●• أُتـرَجة •●≈

هلا أنفاس

الف مبروك مقدماً ,, والله يوفقك يآرب

وبما أنك صرتي خبرة ..عادي أسجل ماستر عن بعد ؟..

>بالدس يعني

>جهة عملي رافضة

>أول مره بحياتي أشوف أحد يرفض أحد يتعلم رغم تعهدي

> أنتهت القصه ..

هلا والله ..

الله يبارك فيك ويسعدك ..
وصلتي راسي السماء

والله ياخيتي مدري بس فكري فيها وش دراهم انك تدرسين ؟ ووش درى الجامعه انك موظفه .. يمكن مايدققون على هالحكايه خاصه الجامعه .. يعني ادرسي واذا جاء اختبارك خذي اجازة < ولا من شاف ولا من دري

زي اخوي بيدرس ومايبيهم يدرون قلت طيب ووقت الاختبار وش بتسوي قال ادبر حالي

والله يكتب لك اللي فيه الخير ..