بسم الله الرحمن الرحيم

السلام عليكم ورحمة الله وبركاته

اخواني اعضاء المنتدى ابي مساعده وابي استفسر منكم من يعمل

في موبايلي او يعرف عنها حاجات كثير قبل ماروح اسوي مقابله

بكره الصبح ..

اليوم الصبح اتصل علي واحد من هناك وقال هل ترغب

في العمل كمندوب مبيعات ؟ بصراحه انا ماجاوبته قلت بكره اجيك

ونتفاهم ماقلت لا ايه ولا لا وبصراحه انا ابي اجابه منكم او اي واحد

يشوف الموضوع او يعرف عنه اي شي والاسئله اللي ابيها

هل هي وظيفه ممتازه ولها دخل ؟

الرواتب لمندوبي المبيعات كم ؟

كيفية العمل والدوام هل هو جزئي او دوام واحد ؟

واللي عنده اي معلومه ثانيه وعنده معلومات عن مندوبي

المبيعات لموبايلي يساعدني ويكتب لي رد يريحني

لان بكره عندي مقابله !!

واللي سوى مقابله او عنده خلفيه عند مقابلات مندوبي

المبيعات يعلمني او يفيدني كيف اقنعهم اني ابي اشتغل و و الخ

معليش طولت عليكم بس تكفون من هنا لبعد العشاء

لازم القى اجابه تكفون لاحد يخيب ظني والله يوفقه ويرزقه ان شالله

تحياتي اخواني

ياشباب ابي اجابه اليوم تكفون ساعدوني

كم الراوتب وكيف طبيعة العمل بالتفصيل

تكفى ياللي اشتغلت او تعرف احد بموبايلي

بكره المقابله ابي اعرف قبل ما اتفق معهم على كل شي

تكفون تكفون

اهلين اخوي
انا كنت شغال في شركة متقاولة مع موبايلي لبيع الشرايح المفوترة
الراتب 3000ريال ولك تبيع 80 شريحة في الشهر

وش صار عليك بخصوص زين اخوي متبهدل ما رحت صندوق الموارد البشرية مرة ثانية

كلمت واحد من الشباب يقول تعتمد على نفسية اللي يقابلك يقولي صلح مقابلتين الاولى قمة في الاحترام والثانية قمة في المسخرة هههههههه استفزازية ممكن توصل الى درجة يقولك وش اسم اختك؟؟ اي شي يرفضة المجتمع كعادات وتقاليد !!!! طبيعي الشي هذا لانك تبي تكون في خط النار مع الجمهور مباشرة وتبي تقابل الزين والشين اهم شي ملابسك كانك رايح تتزوج والطيب الطيب اللي لا ثقيل ولا خفيف اذا تدخن وقف التدخين يوم المقابلة خلك مبتسم اعلان كريست بالعربي ههههههه احفظ سيرتك الذاتية بالانجليزي واساسيات مثل ليش اخترت موبايلي ريشبهم طبعا وممكن يسألونك وين تشوف نفسك في موبايلي تقولهم اشوف نفسي قائد فريق وممكن يقولك اقنعني باي منتج في جيبك اني اشترية منك يعني يبي تشويق اللي هوا تسويق اقعد قعدة مستوي قفلي قالابي الثوب لا تحرك يدك وانت تتكلم ثبتها على ركبك حاول توصل قبل المقابلة بساعة اقل شي عشان تريح وتسترخي قبل بداية المقابلة واخذون عنك فكرة انك حريص على الوظيفة وانسان جاد اذا سألك عن نقاط ضعفك ويبي يسألك قلة كمثال نقاط ضعفي اني احب اساعد الناس وما اترك مكان عملي الا وانا مخلص كل المهام الموكلة اللي ممكن يقولك ايش يعني لك العميل قلة يعنيلي باب رزق احرص علية والعميل دائما على حق واحاول اني اعطية صورة واقعية وجيدة عني الشركة من خلالي حيث اني امثل الشركة وانا واجهتها.

في النهاية تشكر اللي مسؤلي التوظيف اللي قابلوك مهما كان انطباعك عن نظرتهم لك
ولا تطول ولا تتلعثم في الكلام وخفف الحرص الزايد

ملاحظة كل اللي قلتة لك يبون يقولن منة 3% الى 5% وما راح يطلع عن هذا الاطار
ومعليش كلامي معك داخل في بعض بس لاني مشغول شوي وحبيت اعطيك اللي عندي قبل لا انسى وموفق انشالله

مشكور اخوي فيصل على مساعدتك لي وجزاك الله خير وربي يرزق ويعطيك العافيه

بصراحه استفدت من كلامك شي كثير والله يوفقك وييساعدك ويعطيك الخير ان شالله

..........


اما بالنسبه للرواتب اذا كنت تبع الشركه نفسها كم يعطوني ؟ راتب مع البدلات

ومره ثانيه اشكر اي واحد مر على موضوعي ورد علي ولا مارد واللي عنده

شي يفيدني فيه ياليت مايقصر ويعطيكم العافيه ..

اما بالنسبه لصندوق الموارد البشريه كل ما ابي امر عليه انشغل اكثر يعني

وانا رايحله كل ما اشوف شركه انزل واحط اوراق والله يوفق الجميع ان شالله

تحياتي مره ثانيه وشكرا

ماعندي خلفية عن رواتبهم متبهدل اقراء هذي راح تفيدك

اخوي ياتذاكر مافيه رابط ولا شي ياليت ترجع تنزله مره ثانيه علشان

استفيد

مشكور وتحياتي لك

اخووووووووووي


انا اختبرت المقابلة المبيعات في معهد النيوهرايزن على طريق خريص بالرياض

اول ماتجي تسوي مقابلة وهم يبون يعرفون عن معرفتك في شركة موبايلي ومدى

فهمك بالمبيعات ( مامعني غطيناها , لية اخترت موبايلي , كيف موظفين موبايلي ,
جاءك عميل معصب وش تسوي معة ) هذي اغلب الاسئلة

اذا جتزت المقابلة تروح تسوي اختبار طباعة عربي انجليزي على الكمبيوتر

لمدة ربع ساعة عربي وربع ساعة انجليزي

ثم تختبر على الاكسل تسوي جدول عميلية حسابية