السلام عليكم ورحمة الله وبركاته ...


ترددت مليون مرة قبل لا أكتب هالموضوع ..ما كتبته الا طلبا في مشورتكم ونصيحتكم خصوصا من له خبرة في التجارة وخصوصا في مجال الاستيراد وعقد الصفقات ..

بكل اختصار ... ( واعذروني يمكن افكاري مشتتة لان موعارف من وين ابدا )

عرض علي صديق صيني ( صفقة ) مربحة جدا وهو مدير في احد المصانع في الصين . الصفقة هي شراء كمية من جهاز كهربائي مشهور جدا وله موقعه الخاص ( موقع امريكي بعلامة امريكية ) لكن تصنيعه في الصين في نفس هذا المصنع .. .. الجهاز هذا منتشر انتشار رهيب وفي فترة قياسية والكل شهد له بالنجاح من كل دول العالم .. عملي جدا وسعره حلو .. (له علاقة بالطبخ)

حتى في موضوع في قسم البيع والشراء اظن شفت احد التجار يبيعه بس بمبلغ شوي غالي ..

المهم .. ارسل صاحبنا الصور وكل التفاصيل .. تحمست كثير وطلبت حبة كمعاينة .. حسبها لي مجانا فقط دفعت تكلفة الشحن عبر DHL شحن سريع ل 3 أيام .. من الصين لي البحرين ..

جربت المنتج وعجبني وعجب اهلي..

تفاصيل الصفقة :

هو طلب مني ان اول شرط للشراء من المصنع هو ان الكمية ما تقل عن كونتينر حجم 20 قدم .. حيث يحوي في حدود 6000 حبة .. يعني الـ MOQ كونتينر كامل ..

كوني لست برجل اعمال ولا راعي شركة استيراد وعايش ع قدي ماخليته (هالكلام من شهرين) الا لما ينزل لي من الكمية شوي شوي الا ان تعب معي حيل .. اليوم فقط ارسل لي بموافقته ان اقل كمية راح يخليها 1000 حبة فقط وقبل شهر كان مصر ان اقل كمية هي 2000 حبة ..

الخلاصة :

كيف اقدر استفيد من هالصفقة .. علما اني ما املك راس المال ولا عندي القدرة لا للتخزين ولا للتصريف لكن نيتي اني اسوق هالصفقة على التجار الكبار اللي يقدر علي هالنوع من الصفقات وعارف كيف يصرف علما ان الربح بكل امانة يتجاوز 300% .. (حسب خبرتي المتواضعة جدا)

كيف اقدر اعرض على التجار هالصفقة بنجاح لاني بكل صراحة خايف يسرقون الفكرة اوتفاصيلها او المعلومات وبنفس الوقت ابغي اربح ولو القليل ولو عمولة كوني سوقت للصفقة .. ما اعرف شلون راح تكون الاجراءات !!!

كيف اكون ذكي وفي السليم ؟؟ كم احط لي ربح يخليني على طريق النجاح بشكل صحيح..؟؟

حيل محتار ومتورط ..

ابغي افكار ونصايح لو سمحتوا