السلام عليكم ورحمة الله وبركاته
اخواني بغيت نصيحتكم بخصوص القوات الخاصه اخوي انقبل فيها لكن مشكلتنا الناس كلهم يسبونها والكل يقول نصيحه لاتروح كرف وتعب وماتصلح بالمره مه العلم هو مقدم على المباحث ومعاه شهادة حاسب الي وشهادةة كامبردج والكل يقول ماراح يقبلونه المباحث حيرونا ارجو من الاخوان تقديم النصيحه جزاكم الله خير

واللي عنده خبر اكيد متى يبدا التسجيل في الامن العام يفيدنا وشكراً

ياخووي الله يرضالي عليك لاتسمع لكلام الناس وخل اخوك يرووح موعده هي صح الدوره كرف بس بعدها يرتاااااح ويحط رجل عل رجل احسن قطاااع في الداخليه والاخوان ان شاء الله يفيدونك ااكثر


تحيااااتي

وعليكم السلام ورحمه الله وبركاته


طبعاً الأفضل مالباحث وبعدها قوات الأمن الخاصة

وكل وظيفة ولها سلبيات

شف ونا اخوك انا نزلت موضوع قبل اسبوع نفس موضوعك وكتبت نفس كلامك ولو تشيك على المواضيع حقتي بتلقاه بس انا فالحرس الملكي والعالم كل ماشفوني محلق راسي وعرفو اني انقبلت قالو كرف ومدري ايش والله يعينك ،، بس كلمت الاخوان هنا واستخرت ووكملت االاجراءت كلها وبقدم الاوراق وبنتظر الدوره ،، العسكريه لا تسال فيها عن الراحه والله يعيننا وياك ،، ادخلها وربك ييسرها يمكن مايقبلك المباحث وتندم مثل ناس اعرفهم .

انا الان بدوره قوات الامن الخاصه رقم 43 خلصنا الفرد الاساسي ولله الحمد باقي لنا اعمال خاصه

الدوره بشكل عام ممتعه للي بياخذها بروح حلوه
الي تسمعه عنها ترا خرطي بخرطي

بعلمك جدولنا اليومي وش هو


صحيان الساعه 2:30 نظافه وشد سرير واشياء تافهه الى صلاة الفجر
تصلي الفجر وبعدها نتوجه للميدان تكميل ونبدي حصة الهروله الحصه الصباحيه
بعد حصة الهروله نرجع السكن ندخل الميز نفطر ونتوجه للسكن نبدل رسمي
ونطلع الميدان حصة مشاه 45 دقيقه بعدها نرجع السكن راحه وكانتين > مثل المقصف
عصير وبساكيت وككاو والخ

بعدها نتوجه للفصول التعليميه ومدتها تقريبا ساعه
وبعدها نرجع للسكن نريح حق ابو ربع ساعه ونطلع نوضي وع المسجد نصلي الظهر
بعد الصلاة تكميل حق ابو 10 دقايق وصرف على الميز
اذا منضبطين نرجع من الميز على السكن الى العصر نوضي ونصلي العصر ونبدل رياضه
طبعا اذا انتهت وجبة الغداء اعتبر اليوم انتهاء لان باقي اليوم فلللللههه
حصة العصر ممتعه بشكل ما تتخيله ضحك ووناسه ومعنويه فل حتى المدربين حقين العصر
كلهم زي العسسسل وتعامله تعامل رجال مو مدرب وطالب

نخلص حصة العصر نرجع السكن نبدل رسمي ونجهز لصلاة المغرب نصلي المغرب ونروح للميز عشاء نطلع ع المسجد نصلي العشاء وناخذ تكميل حق 30 دقيقه وبعض الاحيان من المسجد ع السكن نوم


الدوره بشكل عام وربي ممتعه للي بياخذها بفله ولا تنسى انك بقطاع من اقوى قطاعات الداخليه ويعتبر القطاع الثاني من بعد المباحث العامه بداخليه وله اهتمام كبير من الامير محمد بن نايف
وله تخصصات كثيره وتقدر تاخذ دورات بالهبل وتطور نفسك يعني طبيعي تحصل جندي يستلم راتب
وكيل رقيب او رقيب بالطقاعات الثانيه مثل امن وحمايه عندنا الجندي يستلم من 9500 وفوق تخيل !!

الامن العام صح راححه بس ما تسوى مع هيبة وراتب القوات ولا نكذب على بعض زمنا ذا زمن فلوس معك راتب جامد تعيش زمن الراحه مو لنا هذا لعيال الماما والسسرقات

واستخير وشوف الي يناسبك ي بعدي

اخوي اسمع كلام بريطاني وبأذن الله ماتخسر ..

ان جا فالرياض جاك علمهم من بريطاني ..

وان جا عندنا بذهبان (جده) ف هي اطلق واطلق بفرق بسيط واهم الفروق الصحيان عندنا قبل الفجر بثلث ساعه يعني اربع ونص نشبع نوم ..

عالعموم القطاع ممتاز جدا ومايتفوت

وخله يستخير واللي فيه خير بيقدمه ربي